رواية برد وجفا ونسمة هوى -65
تذكر مواقفها معه..والأبتسامه انرسمت بشفاته ولف يناظرها وشافها مغمضه...وتمناها لو تفتح وتحس بمشاعره اللي تسببت فيها..وكأنها حست فيه فتحت عيونها وطاحت عليه وهو يشوفها
وعلى طول ردت تغمضهم وهي تخفي ابتسامتها الخجوله...!
ظلت سهرانه معه لحد الصبــح
تحكي معه وتسولف له عن وحدتها في غيابه..واذا استوقفت عند موقف احزنها تدمع عيونها وتمسحهم بسرعه..واذا تذكرت موقف مفرح ..تضحك بجنون..وتخلق الأبتسامه بوجه الوليد..
لمن غالبها النوم..وتثاوبت اكثر من مره..لكنها صامده لحد الآن..وتقاوم ارهاقها عشان تجلس معا اخوها بأطول وقت ممكن..والوليد ماكان اقل تعب منها..لكنه مقاوم لعيون اخته المشتاقه..
ومن كثر تعبه كان يغفي بدون مايحس وابتسام تخبط على راسه بخفه عشان يصحصح
ابتسام وهي تتثاوب وعمــى..لاتنــام..
الوليد وهو يحك شعره مانــمت...ويغمض عين ويفتح عين ..كملي السالفه وبعدين عزيز وش سوى..
ابتسام لاوالله....ورصت على اسنانها..اي عزيز يالخبل..انا اقولك المراقبـه المراقبه اللي بالدوره اصحــى..
الوليد ظحك على نفسه بتعب شديد والله اني مدري شلون مطاوعك لحد الأن..وضربها بالمخده...قومي فيني نـــوم...
مسكت ابتسام اللي انخبطت براسها وردتها له بقوه مااااااالت عليك هذا جزانــي اني اسولف معــك..
الوليد بقل حيله والله سوالفك روعــه لكني تعبان...حسي فيني..!!
تفشلت ابتسام من كلامه..وهي تتذكر انه اكيد تعبان من السفر.وهي الغبيه ماحست فيه من كثر ماهي مشتاقه قامت من على السرير وهي خجلانه من روحهاواتجهت لباب اوكي..سماح هالمره..لكن بكره مالك مفر منــي فهمت..
مارد عليها لأنها دهمان خلااااص..
ابتسام وعادت كلمتها فهمــت..
رفع راسها من على المخده مفزوع فهمــت..بس روحـي ياشيخـــه..
ظحكت عليه ابتسام وقالت تصبح على خير..
الوليد وبسرعه قال وانتي من اهله..سكري الباب بليييز
سكرت الباب ابتسام وراحت لغرفتها وألأرض ماتشيلها من السعاده اللي تحس فيها
الوليد رجع..رجع ونور الــدار بعد ماكانت سوداء بعينها
ويوم دخلت غرفتها..تذكرت جمانه..اكيد بتجــن اذا درت عن الوليد..
وعشان تجننها اكثر..رسلت لها مسج كتبت فيه انه الوليد رجع..وانتظرت كم دقيقه..ومالقت رد..وعرفت انها اكيد نايمـه..قررت تنام وهي اكيد اذا صحت بتشوف الرساله..!!
صلت الفجر بصعوبه شديده..وكل ماركعت تحس انه الدم يتجمع فوق راسها..طوت السجاده وحطتها على الطاوله..وغطت رجول جمانه اللي كانوا ظاهرين من السرير وهي تضحك عليها كل ماتذكرت كيف قامت تصلي الفجر وهي نص نايمه ونص صاحيه..
حست بملوحه بلسانها..لكنها قاومت شعور العطش وحاولت تنام وتريح جسمها..مافيها حيل تنزل تحت..!!
وبسب هالأفكــار حست انها عطشت اكثر..فتحدت نفسها ونومه اللي يعلن وجوده وعاندت وحاولت تنام..
لمن تنهدت بصوت مسموع وقامت بسرعه من على السرير ونزلت تحت بخطوات بطيئه تدل على ارهاق صاحبها..
دخلت المطبخ وشربت الماي لمن ارتوت وخذت كاس ثاني معاه..ويوم بتطلع صوت بالصاله..ويوم قربت اكثر سمعت احد يكح بصوت عالي..وانصدمت يوم شافت جدها مايل ظهره ويكح وماسك صدره بصعوبه..راحت له على طول وهي خايفه عليه ومرتعبه..
راوين وهي جالسه بمستواه وتحاول ترفع راسه جــدي..انت تعبــان..ويوم ماسمعت رد منه عطته الكاس اللي ماسكته..وقربته من فمه وهي تحاول تشربه باللي تقدر عليه..
ابعد الجد الكاس من فمه يوم حس انه الكحه خفت..وتدريجيا لون وجهه بدى يرجع طبيعي بعد الحموره اللي كست وجهه واطرافه..كل هذا وراوين تراقب ملامحه..وتنتظر أي كلمه منه تريحها وتطمنها
راوين بعيون حايره سلامات ياجدي..ماتشوف شر..!!
الجد بوجه باين عليه التعب وقل الراحه الله يسلمك يابنتي..ليش صاحيه اللحين..!!
راوين ومازلت خايفه ومو متطمنه ابد كنت نازله اشرب ماي..وسمعت صوتك..جدي خذت دواك..
الجد اعتفست ملامحه واشتدت اعصابه دلاله على كرهه لهالموضوع وانا وش اللي تاعبني غير هالحبوب..!خليها على ربك..الله يعيــن..
راوين بس ياجدي..صحتك مهمه لنا كلنا..وبعيون راجيه..الله يخليك داوم عليها..
الجد وبوجه منورّ لاتحاتين يابنتي..جدتك مو مقصره تذكرني فيها حتى لو نسيتها..لكن هذه حكمت ربك المرض نعمه مو نقمه..!!
المرض نعمه..مو نقمه
استوقفت راوين عند هالكلمه..!!وهي متفاجئه من رد جدها..ماتوقعت يكون هذا رده..
جدها انسان مريض بالقلب..وحامد ربه وشاكره على هالنعمه..والتذمر بعيد عنه كل البعد..مو مثل بقية الناس اللي مستلمين للمرض وكارهين الدنيا ومافيها..!!وكأنه موتهم دنى..!!
شعرت بحكمة جدها..وعقله الراجح..!! ودعت في سرها انه الله يطول بعمره..
قامت راوين من عنده وهي ودها تجلس معاه اكثر..لكن هو معترض وهو يشوف كيف عيونها حمر من قلة النوم..ورجعت غرفتها..وهي تتذكر كلمة جدها..!!
"فعلا المرض نعمه..مو نقمه.."
صحت من نومها فجأه وهي مخترعه..وحست بشي غريب صاير لها..ويوم التفت على الجانب الأيمن لقت تركي نايم جنبها وشعره مغطي معظم وجهه..تجمدت بمكانها..وماعرفت وش تسوي..!!
كيف جات هنــأ,,!!
ومين اللي جابها..!!
وشلون نامت بدون ماتحس..!!
هذه اسئله كانت تسالها غلا لنفسها..هي تعرف اجاباتها لأنه مايختلف عليها اثنين..لكن ماتبي تنصدم بالواقع..وتستنتج امور هي في غنى عنها..!!
وصلوا استراليا اليوم الصبح..وطلعوا على طول سيدني لأنه تركي حجز من قبل بفندق
"فور بوينت شيرتون" ..
دخلوا الغرفه..وهي على طول استقلت تحميل تركي للشنط ودخلت وحده من الغرف وتروشت..واول ماخلصت وحست انها مرتبه..طلعت للصاله وشافت تركي جالس على وحده من الكنبات ويفرر بالمحطات..جلسته على كنبه منفصله بهدوء وحست بتعبه الواضح بملامحه..ولحد الآن تنتظر أي كلمه بينهم تكسر هالصمت المحرج
لكن لا تركي نطق..ولاهي نطقت..
هو دخل على طول للحمام وخذ دوشه وطلع لها وجلس هالمره جنبها
تركي وكسر اخير الصمت جيعانه..!!
غلا وفرحانه لأنه تكلم وبصوتها الناعم نطقت وهي تتذكر انه توهم فاطرين بالطياره الصراحه لا..وانت..!!
تركي بنظرات تذوب نفس الشي..
غلا وماتدري ليش صوتها ينعم اكثر اذا ردت عليه طيب..
تركي ويحاول يقلد نبرتها لكن عبـث طيـب
هي بهالكلمه سكتت والأحراج واصل لنهايته..وحلفت بداخلها انها ماتنطق الا اذا نطق..!!ولفت على التلفزيون وخذت الريموت من جنبها تغير المحطه..
تركي طلعت منه الكلمه بدون سابق انذار اوكي ننام..!!
غلا بسرعه نطقت لااا..وسكتت وهي ترمش بعيونها بتوتر..قصدي مافيني نوم..
قام تركي وهو رافع حاجبه على راحتك..دخل الغرفه وخلى الباب مفتوح شوي
يوم تطمنت غلا انه دخل..خذت المخده اللي جنبها وضربتها على وجهها وهي تقول
"غبيــه..غبيــه ..غبيـــه"
وبعدها ماتذكر شي لأنها غفت على الكنبه بدون ماتحس..
وهو طبعا اكيد شالها ونومها على السرير..!!
ويوم تخيلت الوضع اللي كانت فيه مــاااااتت احراج..!!وغمضت عيونها..ماتبي تتخيل اكثــر..ماتبي ابدا..
لكن كيف ماحست بنفسها...كيف..!!؟؟
"ياربـــي"
قامت غلا بصعوبه وهي تحاول انها ماتصحي تركي.. دخلت الحمام عشان تتوضا
تنفست الصعداء يوم قفلت الباب وهي تتمنى لو تصيح من اللأحراج اللي تحس فيه..كفايه عليها اللي صار الصبح..!؟الله يستر من اللي جــأي..!!
افضل سنه من عمرك الآن..انجاز عظيم..!!
مدت لها الكتاب اللي جذبها عنوانه..وابتسمت وهي تكمل رحلتها الممتعه مع هالكتاب 12 سؤال يارواين..12 سؤال بس ..غيروا فكري لـ لحظه وحده..
راوين وهي تتصفح اوراق الكتاب بعشوائيه وش اكثر شي استفدتي منه
فكرت فجر..وماعرفت من وين تبدى..الكتاب كان مميز بنظرها باأختصار شديد..اخذت دخل اكبر من معلومات اناجاهلتها..واعطاني افكار حلوه عشان اكون علاقات ناجحه مع أي شخص.. واللي اجمل من كذا انه بنهاية الكتاب ورشة عمل صغيرونه تقدرين فيها تجاوبين على الأسئله اللي يطرحها لك بحريـه..هذا غير السعاده الروحيه اللي استشعرتها وانا اقراء الكتاب..
الصراحه توني اليساندروا قدراته مميزه..ولاحظت وانا أقراء حروفه انه عنده غنى روحي جميــل..وبساطه اجمل..
اندهشت راوين..وتحمست انها تقرى الكتاب بأسرع وقت ممكن الصراحه..شدتيني لهالكتاب بشكل ماتتوقعينه..!!
فجر وصدقيني لقيتي احسن خيار..!!
ابتسمت لها راوين بثناء..وبدت اول صفحه تقراها..لكن استوقفتها فجر
فجر بتقرينه هنا..!!
راوين وعقدت حواجبها ايه..ليش السؤال..!!
فجر بااعتراض لا مايصلح الناس طالعه وداخله..واللحين بيحطون الغداء..
الكتاب يبيله تركيز وعقل متفرغ..نصيحه.ا.قريه بجو هادي..او قبل ماتنامين..!!
..رجع..الوليد.. الوليد.. الوليد.. رجع.. رجع..
الوليــــد
هذه الكلمه اللي ترن في بال جمانه.
بالصدفه وهي ماره بتدخل الصاله..كانت ام احمد ولطيفه ومريم جالسين مع بعض ..و لطيفه تتكلم عن بنت شافتها بالعرس وعجبتها وتتمنى لو يخطبها الوليد
مريم بس صغيره ذي يالطيفه..!!
لطيفه بظحكه خبيثه والله كان ودي لو احجزها لعزيز..بس حرام اضيع شبابها فيه..صحيح انه شايف نفسه لكن بيظل ولد زوجي...يحمد ربه الف مره اني اخطب له...
مريم ومتى بتبشرينه بهالبشاره..!!ليكون اللحين..!!
لطيفه لا عاد توه جاي من السفر امس..صبري شوي..
وماقدرت تكمل حديثهم اكثر..اللي سمعته منهم كان كافي وموجع
دخلت غرفتها وهي ضايعه..
بدال ماتفرح بهالخبر..وتطير من السعاده برجعته
قلبها اعتصر حزن والم..ماتدري هل هي متضايقه من الكلام اللي قالته لطيفه وعن البنت اللي رشحتها..!!
او لانها اخر من يعلم عن وصوله المفاجأ للسعوديه..!!
فعلا مو عارفه وش سبب ضيقتهــا..!!
وتدريجــا..ومن كثر ماكانت تفكر وتهوجـس..تذكرت الرساله وموافقتها الجريئه.!!
كل يوم تثتبت لها الأيام انه كانت غلطانه بقرارها..!!
واليوم كان اكبر اثبــات..
طلعت من الغرفه وهي مخنوقــه..ماتبي تفكر اكثر وتتعمق باأمور تحاول تتناسها..
وشافت امها طالعه من المطبخ..لحقتها وهي تناديها
هند شفيك..تبين شي..!!
جمانه بعوينه كلها رجا يمه..ابي اخوي..
هند اخوك.بالغرفه نايم..بس لاتصحينه..
هزت راسها جمانه بالنفي وكتمت عبراتها اللي خنقتها لا يمه..لا..ابي ناصــــر..ابي ناصر يمــه..
هند واستغربت من اسلوب بنتها وتوسلها طيب نروح له المغرب..مو فاضيه لدلعك جمانه خليني اخلص شغلي
وقفت جمانه بمكانها وهي تشوف امها تدخل الصاله..وتتركها..
تتركها وهي تحس بالضياع..
كانت تبي ناصر..تبيه بهالحظه هذه بالذات
هو اللي بيفهمها..!!
كانت محتاجه له..مو عارفه وش اللي بتلقاه عند اخوها..!!ومالقته عند أي احد.. حتى امها اللي اقرب الناس لها..!!
مو عارفه ليش كاتمه دموعها..وعبراتها اللي تخنقها لهالحظه..
مو عارفه ليش تبي تصيح قدامه...وتفرغ مشاعرها بقربــه..
حست بلحظه انها غريبه عن الكل..وناصر هو الوحيد اللي بينسيها احساس الغربه المر..!!
غلطه اختلقتها جمانه..وكبرت مع الأيام..وحصدت نتيجة فعلتها بايدينها..!!هل شعور جمانه بالذنب كان في محله!!؟وهل ناصر راح ينسيهااحساس الغربه..!!
بداية المشوار..واول يوم كيف بيكون مع تركي وغلا .!!؟
الوليد اللي جاهل اخر التطورات اللي حصلت لجمانه..بيظل غافل للنهايه..!!
وطلال بيجاهد للوصول لقلب راوين خصوصا بعد موقفه مع ابوه..!
افضل سنه من عمرك الآن ..كتاب رائع..وانصحكم بقرائته..وتعليقي عليه كان بلسان فجر..
سلامــي وحبي لكم
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك