رواية بين ثنايا الايام -60
كتب لي
طيب طيب يا الهنوف
اول ماتوصلين المزرعه اكتبيلي مسج
وياويلك لو ماكتبتي على طول
والله بروح لك المزرعه وبذبحك
وطبعاً بخلي اختي الريم تسأل رهف
عن الوقت اللي وصلتوا فيه
o.k
شوف هذا يهددني
كتبت
o.k
سمعت فيصل يقول : يللا هنوفه دورك
قلت : هااه طماط
الكل : هههههههه وش طماطه هاللعبه راحت عليها .. نايمه انتي
** حنان **
اول ماوصلنا المزرعه .. نزلت من السياره .. كانت سابقتنا سيارة مشعل .. نزل هو ورغد من السياره .. وجا معاها لعند سيارتنا .. يوم نزلت رهف .. سلموا عليها وقالوا : هلا وغلا الحمد الله على السلامه .. طولتوا الغيبه
قالت رهف وهي تسلم : وش اسوي بعد تعرفون من فرنسا الى الهند ومن الهند لروما .. ويعني لفينا العالم
ضحكوا مشعل ورغد .. كأن الحين كلامها يضحك .. وبعدين وش فيها رغد مره حابتها .. والله الكل معاها هالشينه
كنت اناظر في نايف وهو ينزل الاغراض من السياره .. كان مره يجنن وهو يبعد الشعر اللي يطيح على عيونه .. ولبسه كان كشخه مره .. والله انه فارس احلامي
لفيت من الجهه الثاني .. اللي تصير جهة نايف .. عشان بمر بجنبه وبسوي اني تعثرت بحجر وبطيح نفسي .. بيضطر نايف يمسكني عشان ما اطيح
وفعلاً مريت بجنبه .. وسويت نفسي اتعثر بالحجر .. كنت بطيح بس هو لف علي ومسكني بسرعه
وقال : بسم الله عليك .. انتبهي كنتي بتـ...
قاطعته وقلت وانا امثل الضيق والقهر : نايف اتركني .. حركتك هذي مو حلوه .. تمسكني كذا لو شافك اخوي فيصل .. وش بيقول عنا
ورحت اركض مع الباقي وانا اضحك .. ,, بس بدون مايشوفني طبعاً ,,
شفنا المزرعه .. وجلسنا نتمشى فيها .. ونجود طول الوقت جالسه مع رهف ومشعل
شفت رغد راكبه السيكل مع وليد .. رحت قلت لها : تعالي رغوده ابيك
هزت راسها وتركت السيكل .. وجات معي
قلت لها : اشوفك تضحكين مع رهف وعادي
قالت : رهف بتجيب لي اخو
قلت لها : والله وطلعتي غبيه يارغد .. انتي ماتدرين ان هالولد بيخرب عليك
قالت مستغربه : يخرب علي
قلت لها : ايه ابوك بيحبه اكثر .. ورهف بتستغل هالشي وبتخلي ابوك يعطيه كل شي الفلوس والالعاب .. وكل شي لك بيصير له .. بياخذ مكانتك .. حتى نجود وام مشعل بيحبونه اكثر
قالت رغد : حنونه .. ترا رهف مو مثل ماكنا نفكر .. ماتبي منا لا فلوس ولا شي والله العظيم
قلت لها : اكيد بتمثل عليك .. عشان تحبينها انتي وابوك .. وبعدين تاخذ منكم كل شي
قالت رغد : انتي غلطانه .. والافكار اللي في راسك كلها مو صحيحه .. وانا رهف احبها .. لانها تحسسني انها امي .. تخيلي حتى يوم رحت المدرسه .. في التمهيدي راحت معاي .. الكل يقول لي امك حلوه وحنونه
قلت : وععع لا تقولين عن هالشينه حلوه .. رغد ماتوقعت ان حتى انتي الذكيه ينضحك عليك
قالت رغد : حنان لا توجعيلي راسي .. انا بروح بلعب مع وليد
راحت عني وخلتني .. مغروره هالبزره اكيد ابوها مشعل وخالها نايف .. وعايشه بأحسن فيله مستحيل ماتنغر .. بس عقلها كبير الله ياخذها
شقة محمد .. الساعه : 9:00 صباحاً
** الريم **
كنت منسدحه على الكنبه بالصاله .. وجالسه لحالي مو مشغله التلفزيون ولا اسوي شي .. محمد في الشغل .. كل شوي امسح وجهي من الدموع .. من كثر ما ابكي صرت ما احس للدموع وهي تنزل .. انتظر محمد اذا نام او راح الشغل .. واجلس ابكي .. ما ابيه يشوفني وانا ابكي .. كفايه اللي هو فيه .. محمد يموت في الاطفال .. وبدليل جلسته الزايده مع سعد قبل ما ياخذني ..كان محمد يقول لي المستشفى يغلطون احياناً وخلي عندك امل .. بس معقوله كل المستشفيات اللي رحنالها بالشرقيه غلطانين ؟ ماخلينا مستشفى .. وكل مستشفى تحطمنا اكثر عن اللي قبلها
امنية حياتي كانت اني اصير ام .. واجيب عيال كثير
غمضت عيوني .. وتذكرت كلام دار بيني وبين رهف من زمان .. يوم كنا بنات
.
.
.
قلت لها : كم ولد وبنت تبين انتي
قالت لي : ولد واحد او بنت وحده .. تعرفين يعني انا بكون بهذاك الوقت دكتوره .. وهذا بيشغلني
قلت لها وانا اناظر في السما : ع****** انا ... تدرين اتمنى يصير عندي 5 بنات و5 اولاد
قالت : ليه عاد هالكثر .. انتي بعدين بتصيرين دكتوره ما بتقدرين
قلت لها : حتى ولو انا احب اربي .. اوقات اقول لامي .. ليه ماجبتي اولاد وبنات كثير .. تقول
لي انتو الحمد الله كثير ..
.
.
.
فتحت عيوني .. وجلست ابكي بمراره .. وقلبي يحترق ويتقطع .. غمضت عيوني مره ثانيه اتذكر كلام قلته لمحمد
.
.
.
قلت له : محمد الشقه احسها صغيره شوي
قال : عادي حنا بس اثنين
قلت له : بس لاتنسى العيال اللي بيجون في الطريق .. وما بتكفي الشقه
قال بأبتسامه : في هذاك الوقت انا باخذ لك احلى بيت .. وبنملى البيت عيال وبنات
.
.
.
وانا مغمضه تخيلت محمد راجع من الدوام .. وفي يده ولدنا وهو يقول : يااه ولدك اليوم وديته لأمي قبل ما ارجع البيت .. تعبني مرجوج ولسانه طويل
وانا اقول له بعصبيه : لا والله ولدي لسانه مو طويل ولا مرجوج .. اذا الحين ومتعبك اجل وش بتسوي .. في بنتنا رهف اللي جايه في الطريق
فتحت عيوني وقمت بسرعه من الكنبه .. وانا ابعد هالاحلام من راسي .. لانها بتعذبني اكثر
جلست اتمشى في الشقه .. وانا مكتفه يديني .. والشقه مافيها حياه .. اصلاً المكان مايصير فيه حياه الا بوجود الاطفال .. رحت غرفتنا وجلست على السرير .. طلعت البوم صوري يوم كنت صغيره .. ابتسمت بوسط دموعي .. ودققت في ملامح وجهي .. امي كانت تقول لي اني بجيب بنت تشبه لي مثلي حلوه
انسدحت على السرير وحظنت الالبوم .. وجلست ابكي بصوت مسموع
حسيت بأحد يهز كتفي .. لفيت لقيت محمد .. عدلت نفسي وقلت وانا افرك عيوني : محمد .. متى جيت الساعه كم
قال : الساعه 1 الظهر
قلت : معقوله ماحسيت اني نمت
ناظرني بضيق وقال : ريمي كنتي تبكين ؟
ابتسمت وقلت : لا .. وليه ابكي
قال : الا مبين من عيونك
قلت : انا ماكنت ابــ...
ماقدرت اكمل كلامي .. حضنت محمد وبكيت بمراره
مسح على شعري بحنان وقال : حبيبتي ما ابيك تبكين
زدت في البكى .. كانه يقول لي ابيك تبكين
قال : فطرتي اليوم ............... طبعاً لا .. وامس ماتعشيتي .. مو زين اللي تسويه في نفسك
قلت وصوتي متكسر : مستحيل يجيني نفس بعد الــ ’’ وجلست ابكي ’’
قال : ياقلبي .. اصلاً العيال شي مو مهم .. دام انا احبك وانتي تحبيني وش نبي اكثر من كذا
اصلاً وجودك يملا علي البيت .. انا من بعدك ما ابي شي
بعدت عنه وهزيت راسي
مسح دموعي وقال : يللا حبيبي .. قومي نتغدا
قلت : جبت غدا ؟
قال : لا .. بنطبخ انا وانتي
ناظرت في الساعه وقلت : على كذا ما بنتغدا الا الساعه 5
قال : عادي لو نتغدا 10 .. قومي نضيع وقت بالمطبخ
ابتسمت وقلت : وش بنسوي ؟
قال : الكبسه بطريقة امي .. انا بعلمك الطريقه
وقف بسرعه وطلع من الغرفه .. ورجع وهو لابس مريلة الطبخ وماسك الملاس بيده
تخصر وقال : وش رايك بالشيف محمد
قلت : يهبل هههههههههههههههه
قال : يللا دلوعتي قومي لا تضيعين الوقت
مسك يدي وسحبني وهو يركض للمطبخ
المزرعه .. الساعه 1:30 مساءً
** نايف **
بعد ماخلصنا غدا .. تقهوينا وطلعنا برا .. كنت ادور نجود ورهف بعيوني .. بعدين لقيتهم
رحت لهم وقلت : وينها وينها المتحمسه
ضحكت رهف على طول
قلت : وش رايك بالمزرعه ؟
قالت : وربي تجنن .. كشخه
قالت نجود : قبل شوي تقول لي مزرعة نايف حركات مانبي نرجع
قلت : قلت لكم هذي مزرعة ابوي الله يرحمه
قالت نجود : ايه صح الله يرحمه
قلت وانا احرك حواجبي : بعدين بنروح نسبح في المسبح وانتوا بتناظرونا بحسره
قالت لي نجود : مايخصني ابي اسبح .. وانتي رهف ؟
قالت رهف : انا مستحيـــــــــل
قلت : اجل بنرميك انا ونجود في المسبح
ضحكت هي ونجود .. ضحكت معاهم .. بعدين تركتهم
.
.
.
رحت لغرفتي .. وقفلت الباب .. اخذت شنطتي عشان بطلع لي بدله ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك