رواية برد وجفا ونسمة هوى -59
ابتسم يوسف بسخريه....وحط ألأغراض بطاولة المطبخ..وقلبه يعتصر الم وحسره..!!تذكر السمك ..طلعه من الكيس..ودخله الثلاجه..ولؤي يناظره بحزن وهو عارف انه مستلم اجرته اليوم..
يوسف لاتتكدر..بقى عندي فلوس..بدفعهم له..!!واذا على ألأكل شريت اللي يكفينا ان شاء الله..!!
لؤي بس هالمره الأجار علي..مو عليك..!!
طلع يوسف من المطبخ وجلس الكرسي وهو يمرر ايدينه على شعره اللي قضى عليه الشيب انت انا..وانا انت يالؤي..كلنا واحد..!!
سكت لؤي..ماعنده شي يقوله بعد كلمة يوسف..
"كلنا واحد يايوسف..كلنا واحد ياأخوي"
قطع هالسكوت يوسف وهو يعرف انه لؤي حزين ومنكسر تدري وش شريت اليوم..!!
لؤي بدون نفس جبنه فرنسيه..!!
ضحك يوسف من كل قلبه وهو بعز همومه واحزانه اللي كل ماتنفتح من جهه تتسكر من جهات.. لا..!!شي احلى..!!
لؤي ابتسم لظحكة يوسف يعني شنوا..!كيكه بالتوت!
يوسف بهمس سمـك..!!
كانت الكلمه بسيطه....وعاديه...
كان السمك رخيص..وبسهوله ينلقى..والفقير والغني مو محرومين منه..!
لكنها جات بالصميم عند لؤي..
يوسف شرى السمك!!
يوسف بيدفع ألأجار!!
يوسف الأخو..
يوسف الصديق
يوسف كل شي بحياتك يالؤي..!!
ضعف لؤي بهاللحظه..وغصبن عنه دمعت عينه وهو يشوف يوسف روح ياشيخ..الله يفرجها عليك وين ماتروح..!!
ابتسم يوسف على شفافية لؤي..وعشان يخفف الموقف الحزين قال ليش هالدموع..كل هذا عشان سمـك..!!
عرف لؤي مقصد يوسف ومسح دموعه شفت شلون..!!؟
قام يوسف من الكرسي وهو ناوي ياخذ له غفوه تريحه وتنسيه همومه..وقبل مايدخل الغرفه مر على مرسمه وناظره بحزن قاتل
يوسف "شكل هالمرسم بيظل مهجور..لمن الرزاق يفرجها."
تسارعت ألأيام وانتهى هالشهر ومايحمله من خيرات بكل سهوله وخفه
يوسف عيونه تناجي الرحمن..وتطلب الفرج..
والوليد..يبحث بين صفحات هالشبكه العنكبوتيه بدون ملل ويحاول يشبك بين الحروف..
وتركي عايش حالة هيام من نوع اخر
والكل يشكي ليلاه..ويتكيف مع هالبرد والجفا بطريقته عشان يعيش بلحظة راحه..
انتهى رمضان..انتهى شهر الخير والرحمه..
البعض حسه مثل البلسم للجروح ..ابتدى وانتهى بطاعه سلسه..!!ولسان رطب ذاكر..!
والبعض مااستشعر بخيراته..وظل بمعصيته..يكابر ويتقوى على زمن اغبر..!
وارتفعت اصوات ألأذان..وعلت التكبيرات..
ورفرفت الأرواح..وابتهجت الوجوه..ورقصت القلوب فرحا وسرور..
استقبال للعيد الأول..عيد الفطر..
فهنيئا لكل مسلم بهذا العيد المبارك..!!
::::::
مثل كل مره..وبهالوقت بالذات..وبعد ماتصلي صلاة العيد..وتلبس ملابسها
تمسك صورة امها وتعايدها والدموع تهل من عيونها هلّ..
لكن هالمره كانت تعايد شخص ثاني مع امها..
كانت تعايد يوسف بصورته اللي محتفظه فيها وخافيتها عن الكل
كانت تعايده وروحها راجيه ومتأمله وصابره
كانت تشوفه وتحس بالأمل يتجدد بداخلها كل ماتذكرت انها يمكن تشوفه بعد هالسنين المريره
دعت من كل قلبها بصلاتها انه الله يقر عينها بشوفته.ومافي شي عند ربها بعيد..
دعته بقلب راجي..وبعيون خاشعه..
دعته والدموع تهل بدون توقف..
واخلصت النيه لله وحده..
ومن صدق دعواها..ماحست بعزيز وهو داخل عليها بعد ماجاء من صلاة العيد
ويوم شافته وهو لابس الثوب الأبيض والغتره البيضاء ازدادت دموعها وهي تشوف يوسف فيه باابتسامته وروحه المرحه
قرب منها عزيز بأدب وحب راسها وبارك لها العيد..وهي ماأستحملت وضمته بقوه وهي تمتم وتقول"ياريحة هلي والله.. يعل عيني ماتبكيك..ماتبكيـك.."
حاول عزيز يفك نفسه منها..وقدر اخيرا
عزيز بصوته الخشن وهو معترض ومزمجر كله تصيحين..تصيحين..
ومد بوزه ببراءه..خربتي غترتي..!!
ضحكت ابتسام من قلب وهي تعدل غترته فديت اللي اختربت كشختهم.. خلاص حبيبي..هذه استعدلت..!!
عزيز ولازال معصب انا قلت لكم..ماأبي غتره ماأبي.مااحبـها..بس انتوا ماترضون..وينه وليد هو يعرف احسن منك..!!
ابتسام اي وليد انت الثاني..تعال ابوي تحت..!!
عزيز وهو ماسك غترته عشان ماتطيح ايه تحت..ترى بنروح بيت جدي اللحين..!!
ابتسام زين يالله..
مثل كل مره ابو يوسف يفتح باب بيته ويجمع عياله واحفاده بمناسبة اول يوم لعيد الفطر
المجلس مليان من الأهل والمعارف..وقهوه رايحه..وقهوه جايه..والحلويات والبخور ماليه المكان
الكل فرحان وسعيد بهاللمه الحلوه..ويمكن اكثر اشخاص حاسين بالفرحه هم الشباب والبنات اللي يتمنون من كل قلبهم انه الله مايغير عليهم..وتظل هالجمعه لطول العمر..
هيثم لطلال وهو ماسك دلة القهوه ارحمني عاد..وتعال صب عني..ايدي تكسرت..!!
طلال كان مشغول بحديثه مع واحد من معارفه..استأذن منه وقام لولد عمه وهو يرجع شماغه على ورى شعدنك تتحرطم مثل الحريم..!!
هيثم بعصبيته المعهوده لكن بصوت هامس حرمه تشيلك قول آمين..!!
طلال بطنازه وهو يمثل انه يدور هالحرمه وينها هالحرمه ماأشوفها..!!
هيثم مسك الدله وحطها بأيد طلال ياشينك..وياشين مزحك..!!
طلال اقول هيثم....!!
هيثم ويرص على اسنانه صب وانت ساكت..!!
الجد يوسف ينادي طلال..
طلال سم جدي..!!
الجد يوسف قهوه..
الكل انبهر فيها..وبجمالها ألأنثوي الطاغي
كل شي من امها خذته..عيونها الحاده..وانفها الطويل المايل..وشفايفها الصغيره
وبشرتها البرونزيه..كان جمالها هندي لايقاوم..ولبسها للبنجابي الحريري اللي بلون ألأرتكواز والأصفر جعلها اميرة هالعيديه..
ويكفي حركه منها ..وتتحرك اساورها..وخلخالها الرنان وتسحر الموجودين بصوته..
اغتاضت منها جمانه اللي كانت مثل الطفله ببدلتها الورديه الناعمه وقالت بقهر وهي ترص على اسنانها
انتي منوا ناويه اليوم تطيحين ها..!!اعترفي..!!""جمانه
ردت راوين ببراءه وبصوت هامس محد
جمانه وغمزت بعينها علينـا..!!
حمرت راوين من حركة جمانه والتفت حوالينها خوفا من احد يسمع نقاشهم شتقولين انتي..!!.. وبغيض...خرفتي يالعجوز..!!
جمانه لازالت بروحها المرحه اللي تخفي امور ثانيه ورى هالبسمه الطفوليه اوكي سماح هالمره..!!
راوين وليش ياعمري..!!
جمانه وتتصنع الغباء لأنه عيد..!!
راوين غصبن عنها ابتسمت ماأتضحك..!!
جمانه طلعت لسانها تضحك غصبن عنك..
كل عام وانتي لي ..!!
ابتسمت سماح براحه وتناست كل ألأفكار اللي ببالها وهي تقول بخاطرها" نزوه وعدت..نزوه وعدت"وردت على احمد بحب وانت لي
ناظرها احمد من فوق لتحت بنظره اخجلت سماح وارغمتها توطي راسها بااستحياء
قرب راسه احمد منها كل يوم لبسي احمر..حلو عليك الأحمر..
سماح حست انها بتدخل بملابسها من كثر الخجل..واحمد مارحمها ظل واقف بمكانه ويتأمل كل شي فيها
احمد شنوا قلت شي غلط..!!
احمد مسك ذراعها بنعومه
وكأنه يبي يثبت ويقرّ شي لحد يلوموني وقرب اكثر لمن اجتمعت انفاسهم.. حلالي ....
حست انه المسأله مطوله واذا ماتحركت بيستمر احمد بكلامه المعسول..تركته ومشت تلبس عباتها وهي تقول تأخرنا عليهم...!!
و كلمة" حلالي" ترن بأذنها بجنون..
كان واقف سلطان بممر الصاله وحوالينه بنات اخوه يسلمون عليه ويباركون له العيد
جمانه تناظر سلطان بطرف عينها وتكلم غلا المنشغله بتعديل بلوزتها اللي واصله لركبها و بلون جلد النمر اقول غلوه..مدري شفي بعض الناس صايرين بخيلين هالعيديه..!! وعلا صوتها...يااخي ريالين على ألأقل لل ببسي والجالكسي.....احنا راضين فيهم..!!
فهم سلطان تلميح جمانه الواضح وقطع سالفته مع فجر اقول غلـوه..استحي على وجهك..المفروض انتي الللي تعطينا عيديه..توك ماخذه مكافأة هالجامعه ورص عل اسنانه.. يالزطيه..!!
غلا فتحت عيونها الوسيعه وهي ومو فاهمه شي اي مكافأه..واي جامعه..!!شسالفه.!!
جمانه بصوت حريمي عالي وليش ادفع ياغلوه..!!مين الكبير ياقلبي..!!
ابتسام هههههههههه يقطع ابليسك ياجمانه..صج عجوز..!!
غلا وتلتفت لجمانه منوا الللي بيدفع..شنوا بتطلعون.!!وناااسه..!!
فجر شنوا نطلع بعد انتي الثانيه..ماتشوفين البيت مليان..!!
راوين شسالفه..!!
غلا وقربت منهم ممكن تفهموني..!!
جمانه استغربت كيف الموضوع تحول لطلعه"صج الحريم بلوه"
ابتسام احد جاب سيرة الطلعه انتو بعد..!!
سلطان حس انه غلط وهو واقف بين جموع هالبنات..وعرف انه بألأخير هو الخسران وهم اللي بيغلبونه مثل كل مره..طلع من عندهم بسرعه وترك مليون سؤال في بالهم..وخصوصا غلا اللي ذابحها الفضول..!!
واللي فاهم الموضوع كان جمانه وفجر وابتسام ظحكوا على هروبه المفاجأ ودخلوا الصاله..وغلا تصرخ عليهم
وتطالب بأجوبه لأسئلتها..لكن الكل مطنشها..^_^
فوقه سحاب بيمطر..وتحته عشب مخضر
بيمينه نهر جاري..وبشماله ورد بدى يفتح
وقباله لؤي وعبير جالسين بزاويه وصوتهم وظحكهم ماليه المكان
ابتسم لهم..وظل يتمشى بهالحديقه لوحده..وايدينه بجيوبه
منظر لؤي وعبير وهم قريبين حسسه بالحميمه.وذكره بحبه القديم
حبه لفجر..
وغصبن عنه انرسمت ابتسامه بوجهه..وهو يتذكر انه لازم بكل عيديه يهديها فلّ يقطفه من بيت جده..وياكثر الصعوبات اللي يتعرض لها عشان توصل لها بدون محد يدري.
لكنها بالنهايه توصل..وحتى لو ذبلت بأيده توصل..
لكن اللحين لافجر..ولاحتى فل ذابل..
كل شي انتهى..وكل شي اختفى..وانكتب الفراق بينهم بعد ماكان مكتوب اللقاء الحقيقي بيوم ملكتهم
ابتسم يوسف..ابتسم للعالم..ووللسحاب..وللعشب والنهر والورد..
لكن هالمره بمراره قاتله..وقال بصوت مسموع وهو يحاول يهون على نفسه
"اللهم لااعتراض"
بوقت الضحى..البنات غلا وجمانه وراوين وابتسام بعد الضحك والسوالف..بدى التعب يسيطر عليهم..وخصوصا انهم ماذاقوا طعم النوم من امس..
فكل وحده منهم تسللت وطلعت فوق قبل محد يكشفهم..
اما فجر ظلت تسولف مع سماح و سميه اللي كانت رايقه ومبتسمه على غير العاده
والوحيده اللي ماقدرت تنام هي جمانه لأنها ملزومه تظل صاحيه
ابتسام قدام المرايه وتحاول تشيل المكياج طيب وش علينا منك..روحي بيت عمامك حنا بنام ..!!
جمانه واقفه بوسط الغرفه ومنقهره ونعسانه ومتملله يعني لازم نروح اللحين..اووف..ياربي مالي خلق ابي انام..!!
غلا جهزت نفسها للنوم بعد ماشالت الحفله اللي بأيدنها ووجهها اقول طفي اللمبه اللي وراك اذا طلعتي..!!
رفعت غرتها بقوه واحتد صوتها بخشونه عاليه كوابيس سعيده تجيكم ..وطبقت الباب وراها ..!!
غلا بميوعه زايده كريهه..ماطفت اللمبه.!!
قامت راوين من السرير وطفت اللمبه وهي تبتسم لغلا..
اما غلا تفشلت..وغمضت عيونها على طول وراحت بنومه..
طلعت جمانه مع اهلها وزارت عمامها اللي احتكاكها بهم قليل..وبعد ماطلعت منهم مروا على اخوها وزاروه وظلوا معاه 4 ساعات..
وماوصلوا البيت الكبير الا على اذان العصر..وعلى طول وقبل ماتفصح عباتها طلعت فوق للبنات
واول ماتفحت الغرفه شافت الكل نايم ومو بحاس بنفسه..
وماتت قهر..منظر غلا وهي نايمه ازعجها..شغلت اللمبات كلهم..وطفت المكيف..وصرخت باأعلى صوتها
"ياللي ماتستحــون قومــوا "
قامت راوين وهي مفزوعه ومخترعه شصايـر..!!
جمانه عرفت انها خرعت راوين اللي نومها خفيف..هي كان ودها تقوم ابتسام وغلا لكنهم ماحسوا فيها لأنهم داخلين بالعميق
جمانه بخجل خفيف بسكم..خلصتوا النوم ..!!
سكتت راوين وهي تحاول تكتم غيظها..ناظرت ساعتها وشافتها 3 ونص قامت بسرعه وطنشت جمانه ودخلت الحمام تتوضا للصلاه
استغلت جمانه فرصة غياب راوين..وشالت الغطاء حق ابتسام وغلا..لكنهم لازالوا غارقين بالنوم..فقررت تشيل المخدات..وتوها بتشيلها من راس ابتسام الا فتحت عيونها
وجمانه خافت وسحبت ايدها لكن ابتسام مسكتها بسرعه
ابتسام يالنـذلـــه..تعالي
جمانه بسوم اسفه ..وتحاول تفك ايدها...اخر مــره..
طلعت تكلمها بالحديقه...بسبب الأزعاج اللي بالصاله..
ياسمين وانت بخير يافجر..شخبار ألأجواء عندكـم..!!
جلست فجر على واحد من الكراسي وردت على ياسمين شتقولين..!!
ياسمين اقولك شخبار ألأجواء عندكم..!!
فجر حلـوه..البنات فوق نايمين..وانا جالسه بروحي مع الحريم..!!الا تعالي..ليش ماجيتي مع امك بالصبح..!!
ياسمين مدري..استحيت فجر..!!
فجر اللي يشوف يقول ماتجين كل عيديه..!!
ظحكت ياسمين بخجل اعرف...احتمال اجيكم بالليل..!!لأني فعلا طفشت..حرمة اخوي طلعت تزو اهلها من الصبح ولارجعت..وامي غديتها ونامت ولحد اللحين ماصحت..!!وانا كالعاده جالسه بروحي افرر بهالمحطات اسلي نفسي..!
فجر طيب تعالي اللحين..مافي حد غريب..
ياسمين لافشله فجر..شخبار بنت عمتك الصغيره..!!
فجر منوا جمانه..!!
ياسمين لااا..ريوف..!!
فجر بخير..هذه هي تلعب مع العيال..
ياسمين تدرين هالبنت احسها غير..!!
فجر عقدت حواجبها ورفعت شعرها اللي تناثر مع هبوب نسمة هواء كيف يعني غير..!!
ياسمين مدري شقولك..لكن هالبنت احن لها كثير..واعطف عليها..فقدانها لأمها وهي صغيره شي يعور القلب..!!
فجر فعلا ياسمين..لكن شتقولين ..هذا حكمة ربي..
ياسمين بحزن أسر الحمدلله على كل حال..يالله حبيبتي مااطول عليك..
فجر وين..!!
ياسمين بروح اصحي امي..واصلي..!!
فجر اوكي يالغاليه..مع السلامه..
ياسمين الله يسلمك..!!
سكرت فجر من ياسمين ..وقامت بتدخل البيت..لكن شي غريب وقفها....
حنت للماضي..وبدون اراده مشت والهوا اللي يهب بهاليوم كان يتحرك بنفس اتجاهها
وكأنه بيشهد هاللحظه بحلاوتها ومرها معها..
ورجعت لورى البيت..وبالتحديد للزرع..
لمكان اللي ينبت فيه الفل..ويوم طاحت عينها عليه..
ماأستحملت اكثر.وقطفته بحذر وهي خايفه تخرب اغصانه الخضراء..
قربته لأنفها وغمضت عيونها .واستنشقت ريحته الحلوه..
ورجعت تمشي لداخل البيت..والفل بأيدها..
وتوها بتدخل لممر الصاله الا شافت راوين جايه لها..وعلى طول دخلت الفل بجيبها
وابتسمت لراوين اللي واضح من ملامح وجهها انها ماشبعت نوم مساء الخير..
راوين وتحك عيونها وتمد شفايفها باعتراض وبانت كأنها طفله مساء النور..
فجر شفيهم الحلوين معصبين..
راوين بصوت ثقيل بسبب النوم جمانه..الحماره..!!
فجر ماقدرت تمسك ضحكتها شفيها جمون..!!
راوين صحتنا واحنا بعز نومنا..!!
فجر وينها هي اللحين..!!
راوين فوق..وابتسمت فجأه..تتخانق مع بسوم..
صغرت فجر عيونها ليش..!!
راوين ومالها بأرض للحكي مدري فجر..و غمضت عيونها ومطت كلماتها ببراءة اطفال ..مالـي خلـــق..
ماتت ظحك فجر عليها كل هذا مسويته جمانه..انا اشهد انها مو سهله..قدرت عليكم..
راوين تغديتوا..!!
فجر لا لسه ماجابوه..
راوين فتحت عيونها بدهشه وكأنها تذكرت شي مهم تعالي..انتي مانمتي..!!
فجر لا وين انام..انا ماانام بالعيد.. وهزت راسها...ماأقـدر..مايجيني نوم..
راوين بااستنكار ليش..!!
رفعت فجر عيونها ثواني..ورجعت تناظر راوين بحيره اذا عرفت ...بقولك..!!
حكت راوين شعرها اللي كانت رافعته باهمال ونصه منسدل بظهرها وهمست براحتك..
ابتسمت لها فجر ومشت تدخل الصاله..اماراوين مشت للمطبخ تاكل لها شي يسد جوعها
فتحت الثلاجه وتسندت على بابها..مافي شي عجبها بالبدايه.لكن .شافت علبة عصير فواكه ..وخذتها.. مالت راسها وفتحت الدرج وخذت تفاح احمر وغسلته..وحطتهم بالطاوله وصبت العصير بكاسه وجلست على حافة الطاوله تشرب عصيرها وبايدها الثانيه تاكل التفاح..وماانتبهت للشخص اللي واقف قدامه يتأمل فيها بدون مايحس بنفسه..
طلال كان توه جاي مسرع للمطبخ وبايده صينية الغداء ..وماكان يدري انه في احد موجود
ومن شاف راوين وهي مايله بكل انوثه..بهت وعجز يتحرك خطوه وحده..
لكن راوين حست بحركه قباله..
رفعت راسها وشافت طلال واقف ومسرح..ظغطت على الكاس بقوه وهي لسه مو قادره تترجم الموقف..ولاتظبط انفاسها اللي بدت تعلو من حرارة الموقف..
ماطلعت الا كلمه وحده بس تدل على استنكارها للموقف لااا
سمعها طلال وبأقل من ثواني رجع نفسه على ورى وطلع من المطبخ واصطدم بهيثم اللي كان برضوا شايل بأيده صينية ثانيه..والله ستر وماطاحت الصينيه
هيثم بزمجره شفيك..ماتشـوف..!!
طلال بدون احساس لاتـدخل..
هيثم ليش..!!
طلال ويحاول يكتم مشاعره في احد بالمطبخ..
هيثم الخدامه تقول مافي احد..
طلال وماله خلق يكثر كلام يووه شفيك قلت لك مافي احد..!!
جاء هالوقت سلطان وهو برضوا بأيده صينيه ثالثه شفيكـم واقفين..بقى صواني ثانيه..
طلال في احد بالمطبخ..!!
سلطان منوا..!!
طلال وماحب يقول انه شاف راوين ماأدري..
راوين بعد الموقف اللي صار لها مع طلال حست برجفه كبيره..وبروده بأطرافها
حست انها تبي تختلي مع نفسها والا ببيصير لها شي..!!
فكرت انها تطلع فوق.لكن بتشوف البنات..ففضلت انها تروح قسمهم..
مشت لقسمهم ودخلت غرفة امها وقفلت على نفسها الباب..وطاحت على السرير
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك