رواية برد وجفا ونسمة هوى -56
بكل دفاشه وبصوت عالي ياأختي شتبين..اشتغلي وانت ساكته..!!راوين وهي تلف الفطاير باهتمام عجوز العالي..تعالي اشتغلي معي خلينا نخلص..الفطور اليوم جماعي..!!جمانه وعينها على التلفزيون وصوتها لازال عالي جماعي..خاااص..عام..بالطقاق..اهم شي عندي الكواري..والباقي كيفهم...وتلفت عليها..بعدين تعالي..ليش احنا نشتغل يعني..!!الشغالات مالين المطبخ..!!؟حبكت علينا احنا..!!
راوين وودها تشنق جمانه اي شغالات اللي تتكلمين عنهم..انتي شفتي المطبخ..الله يخليك روحي القي نظره وحده..وبتشوفينه كيف معفوس...!!
جمانه بتذمر اووه راوين..لاتكلميني..انتي تشغليني عن المسلسل..الله يخليك خليني اندمج بليز..وبعدين احنا ضيوف.. وابتسمت....يعني عيب نشتغل..!
راوين وعصبت خلاص لا والله..اللحين انتي ضيفه..اجل حتى انا ضيفه..ببطل اشتغل..؟
جمانه وتماطل بالكلام احد طقك على ايدك وقالك اشتغلي..!!
راوين ويأست وقررت تكمل لف الفطاير لوحدها استغفر الله العظيم..اللهم اني صائمه..ماأبي اخرب صيامي... ورصت على اسنانها بضيق...عليك بعض الأحيان حركات تقهر..!!
جمانه باابتسامه خبيثه يكون احســن..
راوين بعصبيه شقلتي..!!
جمانه بصرخه قويه ماقلت شي..
بهاللحظه دخلت العمه..وشافت جمانه جالسه بالأرض وراوين على الطاوله تشتغل..
وماعجبها الوضع ابدا..وصرخت على بنتها استحي على وجهك..ماتشوفين بنت خالك تشتغل..
جمانه بنبره باكيه يمــه شفيك..بتابع المسلسل وبقوم..
هند قربت من التلفزيون وطفته على طول بدون أي نقاش..فزي من مكانك..واشتغلي..عمامك اللحين بيجون..وانتي جالسه زي البزران..
جمانه قامت من على ألأرض وهي شوي وبتصيح..ومن داخلها تتوعد براوين اللي ميته ظحك على شكلها
راوين بهمس وهي تشوف جمانه تجلس على الكرسي جنبها بملل وينك ياعمتي من زمان..!؟
جمانه وتجلس بقوه على الكرسي ارتحتي اللحين..
راوين باابتسامه حلوه جدااااااااا
بعد صلاة العصر الأغلبيه اجتمعوا في البيت الكبير
وضاع العصر بترتيب الفطور وتحضيراته والحلو بالموضوع الكل احظر معه طبق من بيته
ودخل وقت المغرب بسرعه وصارت حركه سريعه بين وضع الفطور للرجال والحريم
وماأستقرت الأمور الا بعد ربع الساعه
لكن شي صار ماتم في الحسبان وتر الوضع بين الجالسين
وافطر قلبين حزن ومراره
كالعاده الأخت لطيفه(زوجة محمد) دايما يفلت لسانها بكل وقاحه وهي ترد على نور المسكينه اللي كانت فرحانه وهي توزع على الجالسين بالسفره الخبز الحار اللي عاملته بالطريقه الهنديه(الجباتي)
لطيفه بقرف وهي تناظر نور لا وع ماأحبه..انا ماأكل هالأشياء..!!
راوين كانت قريبه من لطيفه وسمعتها وعلى طول غصت بألأكل وضلت تكح بخفه عشان محد ينتبه لها..
نور بعفويه وهي تقرب الخبز لها ليش..هو طيب كثير..الكل خذ منه..
لطيفه بنبره اعلى نبهت الكل شفيك..ماتفهمين..قلت لك ماأحبــه..
نور بانكسار وهي تنزل الطبق وتحطه على السفره بهدوء على راحتك..
لطيفه وتمادت اكثر اكيد على راحتي..
الجده ماعجبها الوضع ابدا..ومارضت على مرت ولدها نور هذا جزاها الحرمه تعبانه عليه عشانكم..وتردينها..!!
لطيفه وتقط اللي بايدها بقوه يعني شلون..اكل غصب..!!
الجده محد قالك كلي غصب..بسـ
هند قاطعت امها وهي تحاول تخف التوتر والنقاش اللي بدى يحتد صلوا على النبي ياجماعه..حصل خير شفيكم الله يهداكم..
الجده بقهر وهي تخز لطيفه اللهم صلي وسلم عليه..
لطيفه يمه كلتوني...الواحد يسكت احسن له..
مريم مرت ماجد وقفت صوب لطيفه وحاولت تدافع عنها شفيكم هضتوا على المره..هي ماتحبه ماأظن انها كفرت..!!
راوين هنا ماقدرت تستحمل اكثر وهي تشوف امها تهان مثل كل مره وحقها يضيع بكل سهوله قدام الكل
والمصيبه طلعوها هي الغلطانه..وهي بألأصل مظلومه..
حست بالعبره تخنقها وهي تناظر عيون امها كيف حزينه ومنكسره ومحد بيدافع عنها للأسف هي بتظل غريبه عنهم..قامت بسرعه من على السفره وطلعت لفوق والكل انتبه لها..
مريم بصوت واطي وهي تشوف راوين قالت دلع بنات..
وهذا اللي ذبح نور وعور قلبها..
كل شي عنده يهون وممكن انه ينسي مع ألأيام
لكن احد يغلط على راوين بدون ذنب اقترفته..هذا اللي ماقدرت عليه نور..
كان ودها تقوم لبنتها من اول ماشفتها تطلع فوق..لكنها عرفت انه الموضع بيتحول ضدها وبيكثر الحكي عليهم..
وفضلت انه تجلس وتضمد جروحها بصبرها الطويل..والله مستحيل بيضيع اجرها..
خيم التوتر بالصاله..والأغلبيه كانت اعصابهم مشدوده..والبنات بدوا يقومون من السفره وحده ورى الثانيه ويطلعون لراوين فوق لأنهم متعودين على هالحركات اللي تصير اذا تجمعوا
واول وحده طلعت هي فجر وتبعتها على طول جمانه اللي نست كل شي يوم شافت دموع راوين كيف ملت وجهها بقسوه..
فجر وتحاول تهدي راوين بكلماتها العذبه بالعكس انتي لازم تقوين اكثر وماتهتمين بكلام أي شخص..خليك قويه ياراوين..صدقيني امك محتاجه لك لأنك انتي قوتها..
راوين بصوت باكي معذب انا مو عارفه ليش يتعمدون التجريح فينا..احنا وش سوينا لهم..امي ياجماعه مو ناقصه عذاب..يكفي اللي فيها..والله يافجر اني اذا شفت الحريم مجتمعين احط ايدي على قلبي..اخاف تجي كلمه تجرحها وتخرب عليها يومها..وصار اللي كنت متوقعته..
جمانه وثارت اعصابها اصلا انا مااطيقها هالـ لطيفه..مو عارف كيف ابتسام مستحملتها..احس انها تستمتع بنذالتها هي ومرت عمي ماجد..
فجر وخزت جمانه جمانه الله يهداك مالها داعي هالكلام اللحين..
راوين انا مو هامني ولا احد.. انا اللي ابي اعرفه لين متى بنظل ساكتين عنهم..امي ليش ماتدافع عن نفسها...ليش دايم حقها مأخوذ..!!ليش هي سلبيه كذا..!!
فجر لأنها أصيله..امك اصيله ياراوين..واخلاقها ماتسمح لها ترد على هالنوعيه من الناس..
اسمعيني ياراوين..انتي لازم تفتخرين باأم مثل امك..ماعليك من حكي الناس.وهالنوعيه من البشر مساكين ولازم ندعي لهم بالهدايه..
راوين وبدت تفرغ كل اللي بقلبها انا تعبت..صدقيني تعبت من كل شي..تعبت من سلبية امي..تعبت من ظلم اخوي..تعبت من حقد اللي حولي..تعبت من كل شي..انا مو عادتي الشكوى..لكن من حرقة هالقلب يافجر..
اجي الشرقيه واتوقع اني بنسى معاكم..لكني اشوف الغير متوقع..
اسمع كلمات من هألأهل اللي يتسمون اهل واحاول اني اتجاهلها..لكن الواحد يطنش مره مرتين ثلاث وبعدين خلاص..ينفجر..وانا اللحين وصلت لمرحلة اليأس..ماعدت اتحمل خلاااااص..
جمانه وفجر انصدموا من كلام راوين وانفجارها المفاجأ..وماقدروا يسطرون على الوضع اللي وصلت له راوين..وغصبن عنهم التزموا السكوت وهم يشوفون راوين زادت حالتها اكثر ورجعت تصيح بشكل اكثر من اللي قبله..
ودخلوا غلا وابتسام بوقت حرج..ويوم شافوا راوين تيبسوا في وقفتهم..لكن ابتسام قربت من راوين لمن جلست قبالها وضمتها وهي تحس بألأحراج من عمايل مرت ابوها اسف راوين..مسحيها بوجهي هالمره..الله يخليك لاتصيحين..!!...عشاني اهدي شوي..
راوين كانت ساكته بحظن ابتسام..لكنها تبكي بصمت لمن تركت ابتسام وقامت وهي تقول لهم خلاص انسوا اللي قلته..وتمسح دموعها ..بروح اصلي المغرب..ودخلت حمام الغرفه..
غلا لازالت واقفه شصار..!!؟
ابتسام بحره حسبي الله ونعم الوكيل..
غلا وتلح باصرار قولوا شصار..!!
فجر بصوت واطي اسكتوا وسكروا الموضوع رجاء..البنت ماتبي تتكلم فيه مره ثانيه..
ابتسام ولحد الآن مقهوره كله منها...اجل هذا كلام تقوله..تقول وع على النعمه..صج ماتستحي..!!
فجر خلااااص ابتسام انا اسكت وحده وتجيني وحده ثانيه.. لاتسمعك راوين اذا طلعت..ويالله قوموا صلوا بيأذن العشاء..
غلا لازالت مصره تعرف وش صار بغيابها..ويوم شافتها جمانه قامت وجرتها من ايدها وطلعت معها انا بقولك تعالي نطلع عن هنا..
غلا وتناظر ايد جمانه القويه وكيف هي المتها ايدي..ايدي ابيها..شوي شـوي..
----------
كان يبي يطلع من الفندق بأقرب وقت ممكن بعد ماخذ له غفوه ساعتين وفطر وحل صيامه.. ويتمشى بشوارع باريس الضخمه ويتنفس هواها لعل وعسى يتحرر من هالأحساس الغريب اللي ينتابه ..لكن ثامر كان ضد رأي الوليد وهو يشوفه كيف يقاوم تعبه وارهاقه على حساب صحته..
ثامر وانت وش عاجلك..عندنا الليل كله..باريس حلاتها بالليل..وانت تشوف برجها اللي يضوي .واذا انت تبي تتمشى بالنهار بكره الصبح نتمشى قبل مانرجع لندن..!!
الوليد ويجلس جنبه..ويرجع يقوم ثانيه بتذمر لا..لا بيضيع اليوم..مايمدينا نسوي شي...
ثامر بتشكك ليش,,!!وسكت شوي..انت في شي ببالك..!!
الوليد ويحس انه تايه ويغوص بدوامه مالها نهايه مو عارف ياثامر....وظغط على جبينه بارهاق.مدري...مدري.. ياثامر..
ثامر ولازال يجهله قول..فرغ..اسمعك..
الوليد ويمشي باأنحاء الغرفه بتوتر مافي شي....ويوقف فجأه.
.خلاص اللي تبيه بالليل نتمشى..
ثامر ومستغرب من تصرفاته اوكي..
ضايعه بينهم
وعيونها البريئه تحرك مشاعر أي شخص تطيح عينه على هالعيون..
تايهه بين اللي رايح واللي جاي ..وجسدها الهزيل اصبح جلد على عظم من دخل رمضان ..
ماصار لها وجبه محدده تجلس فيها..في البدايه كانت تفطر وتتغدى مع ابوها...لكن الوضع تغير عليها اللحين..
وضاعت مع هالزحمه..ولاأحد حاس فيها..
وبالصدفه يوم طلعت راوين من الغرفه بعد ماصلت لمحتها وهي جالسه تلعب لوحدها ..
وبدون شعور حن قلبها عليها..وهي تشوفها تلعب مع عروستها بكل براءه وتكلمهم بصوت هادي.. وتمسح على شعرهم ..وتضمهم بكل حنيه لجسمها الصغير..
وماتدري ليش حست انها نسخه مصغره من ريوف..
كانت وحيده وهي صغيره..تلعب لوحدها ماكان لها اخوان تلعب معهم....وتركي اخوها كان مكون له عالم خاص.. وياسر مانولد الا بوقت هي كبرت فيه..
كانت تحس بالغربه من الصغر..وبحكم انه امها هنديه ماكانوا ينزلون الشرقيه الا بالمناسبات
لأنه امها عانت كثير لحد ماتأقلمت مع اهلها..وبصعوبه شديده تقبلوها لأنها هي فرضت شخصيتها الطيبه عليهم..وقدرت تعطيهم الحب وتبادل ردهم لها بالعطاء الكبير..
ماتعرف ليش وجود ريوف هاللحظه هز شي في داخلها..لكنها عرفت انه فتح عقلها بأمور كثيره جاهلتها..
وعلى كثر الألم اللي سببته لها وجود ريوف بهالصوره وهي وحيده على كثر الراحه اللي استشعرتها وهي تشوف نفسها ابدا ماكانت وحيده..
على ألأقل ريوف ماتت امها ومالحقت تقر عينها فيها..
لكن هي امها موجوده..امها معها..امها اذا اظلمت دنياها تنورها بحنانها وعطفها..
وبهالمقارنه البريئه انبعثت الراحه بلقب راوين
وعرفت انه الله حق ..واذا ضاقت بتفرج بمدخل ابدا ماتوقعته..
صورة ريوف..علمتها درس كبير ماراح تتعلمه من استاذ اوبكتاب ممكن تقراه
وبهذه اللحظه فعلا راوين اصبحت سعيده..وياسبحان الله..
من كم ساعه كانت في قمة احزانها..وهاللحين نقدر نقول ببساطه انها راضيه بنصيبها..
لكن السؤال الآن ..هل ستستمر هالراحه في قلب راوين..!!
الأيام كفيله برد هالجواب..!
قربت من ريوف ومالت بجسمها لمن اصبحت بمستواها..ومسحت على شعرها بكل حنيه,,وهمست بالقرب من اذنها ريوف حبيبتي..
ريوف كانت مندمجه باللعب مع عروستها.ومو منتبهه لراوين..لكن راوين مسكت كتفها النحيل برفق وهي تحاول تشد انتباها حبيبتي..ريوف..
ريوف شوي انتبهت لكن عقلها لازال مشدود باللعبه راوين..سوفي العروسه مو راضيه تنام..
راوين طيب سمعيني..شرايك ناكل..انتي جوعانه صح..!!
ريوف حطت ايدها على فمها بامتناع تام لا..مابي..
راوين ليش..هناك عمه هند مسويه كيكه حلوه..فيها شوكلاته..
ريوف اتسعت عيونها بفرحه خفيفه سوكلاته..صج..!!
راوين ايه شوكلاته وحلاو..وكل شي..امشي معي ناكلها بالمطبخ..ومسكت أيدها..يالله حبيبتي..
ريوف وتوتي معنا..(توتي اسم عروستها)..
راوين وتأيدها بطفوله ايه اكيد معنا..يالله بسرعه قبل مايخلصونها علينا..
ريوف وتشدعلى ايدها وتسبقها بخطوات صغيره بحماس كبير ايه يالله..يالله..
بهاليوم يوسف ارتاح من طبخ لؤي ..ولؤي بالمثل ارتاح من هالمشقه لأنهم كانوا اثنينهم معزومين بفيلة الدكتور سمير..
ولؤي اكل وملا بطنه لمن قال بس..ويوسف يشوفه بطرف عينه ووده يخنقه بايده لكنه اكتفى بنظراته الحاده..والدكتور سمير كان يراقب الوضع بسعاده بليغه لأنه لأول مره يجتمع على الفطور بعد وفاة زوجته وولدينه..
يوسف بصوت واطي بس يالؤي..ويرص على اسنانه باحكام... خلاص..
لؤي ماسك بأيده اليمنى قطعة ستيك كبيره..وايده اليسرى كانت تتنقل بين اطباق مختلفه لتلتهم باللي تقدر عليها من مأكولات وانت شحارك..اسكت خلني اكل براحه..!!لي دهر ماكلت كثر اليوم..
يوسف ومات احراج يوم سمع كلام لؤي وخز بعينه الوعد بعدين..
الدكتور سمير ظحك وهو مستمتع خله يايوسف..حلال عليه ..عاد تصدقون عمرن مضى وانا مااجتمعت بوجبه مع ناس.. وباحساس صادق...والله موعارف اوصف لكم الفرحه اللي احس فيها اللحين..
لؤي وهو ياكل ولايهمك يادكتور انت بس اشر واحنا نجيك ركض..
يوسف شدته كلمات الدكتور سمير وتناسى الأحراج اللي سببه لؤي..وحس بالفرحه وهو يشوف كيف السعاده تهل بوجه الدكتور سمير
الدكتور سمير استغرب من سكوت يوسف وسرحانه المفاجىء ووقوفه عن الأكل يوسف..علامك...!؟ليش ماتاكل
يوسف باأبتسامة رضا خيرك سابق يادكتور..كلت والحمدلله..سفره دايمه..
لؤي انا عن نفسي توني بالبدايه..
الدكتور خذ راحتك يالؤي..البيت بيتك..
قام يوسف من على الطاوله وتبعه الدكتور سمير وتوجه بالصاله بعد ماغسلوا
وجلسوا يشربون القهوه العربيه بهدوء.
لمن قطع هالصمت الدكتور سمير يوسف..
يوسف رفع عينه سم
الدكتور كيف الشغل معك..!!ان شاء الله خلصت جزء كبير من اللوح..!!؟
ارتبك يوسف..وماعرف وش يقول..لكن تكلم بسرعه عشان مايحس الدكتور فيه ايه...ايه خلصت لوح كثيره..
الدكتور واشرق وجهه يعني بنشوف المعرض يفتح قريب..!!
يوسف باابتسامه حزينه باذن الله..
الدكتور ونعم بالله..
ورجعوا يشربون القهوه بنفس الهدوء..لكن الدكتور حس بتوتر يوسف وماعرف وش السبب..!!
ولاحب انه يصر عليه مدامه ملتزم الصمت..ففضل انه يسكت وهو مجبر..
ياعمري عليك ياراوين..كل هذا مكبوت بداخلها..!!
جمانه بتنهيده واكثر بعد..بس شتقولين باللي مايخافون من ربهم..!!
غلا تدرين انها بعد ماقمتوا..قامت وقالت بروح بيت اهلي..
جمانه واتسعت عيونها بدهشه صج...!!
غلا ااي والله..
جمانه صج ماتستحي على وجهها..وصج اذا قالوا اللبنانيه..تقتل القتيل وبتمشي بجنازته..
غلا وجهها لوح هالمرت العم...وبحسره وواضحه...آآه يالله الدنيا فانيه..!!
جمانه حطت ايدها على خدها بحركه مسرحيه وقربت من غلا اكثر اذا انا قلت لك فيك شي..يعني فيك شي..!!!وغمزت بعينها....غلوه شخباره تركي..لازالتي ماتعرفين هو نزل الشرقيه او لا..!!
غلا وحست بالوجع بقلبها لاتذكريني ياجمانه..تخيلي وش صار لي امس..!!
جمانه وش صار بعد..
قالت لها السالفه بالتفصيل الممل..وكيف هي مضايقه من هالموضوع..
جمانه الله وهقه..وش بتسوين اللحين..!!
غلا بااستسلام ماأعــرف..
جمانه طيب دقي عليه ثانيه..يمكن يرد..
غلا والله دقي ياجمانه..زهقت وانا ادق..خلاص احس اني متفشله من الح بمكالماتي....وش بيقول عني اللحين..!!ماعندي كرامه..
جمانه اي كرامه انتي الثانيه....وصرخت..لقيتهـــا..
غلا بعجله واضحه قولي...ونفذ صبرها...بسـرعه..
جمانه رسلي له مسج..وبرردي له موقفك..وصدقيني بيدق عليك..
غلا وودها تذبحها مااالت عليك..هذا اللي قدرتي عليه..!!
جمانه ليه...فيها شي اذا رسلتي له..
غلا مدري..صعبه....وتنرفت ورمشت بعينه بتوتر..اوووف..مــدري..
جمانه شنوا اللي ماتدرني رسلي له مسج وافتكي..ولا تجلسين لي كل ساعه تدقين عليه..!!
غلا ماأعرف..
جمانه وعصبت شنوا ماتعرفين...!وين تلفونك..؟؟
غلا طلعته من جيبها هذا هو..!!
جانه وبعد خاشته بجيبك..
غلا ونزلت عيونها بخجل اخاف يدق علي..وماأسمعه..!!
جمانه ونزلت بمستوها لا والله..توك تقولين ماتبين ترسلين له..
غلا بخجل اكثر اوووش..انا ماقلت كذا..بس احسها صعبه..
جمانه بصوت خشن وكأنها هي الكبيره وغلا الصغيره لاتعقدين الأمور...ويالله كتبي اللي اقوله لك..
غلا زييييييين لاتدفين..تعالي تهقين البنات راحوا يصلون..!!مانسمع حسهم..!!
جمانه مدري والله...اقول لاتغيرين الموضوع يالله كتبي..
غلا ياربي جمانه...مو متقبله اني ارسله..!!
جمانه ومستنكره ليش..!!
غلا مدري جمانه...لاتزيديني..!!
جمانه طيب شوفي انتي متى اخر مره كلمتيه..!!
غلا اليوم الصبح..!!
جمانه حلو..دقي عليه ثانيه يمكن يرد..!!
غلا وحست بالأمل يتسلل قلبها تهقين..!!
جمانه جربي..منتي خسرانه..!!
غلا اوكي..دقت على رقمه..وانتظرته يرد عليها..لكن للأسف مارد وانتهت المكالمه..وعورها قلبها اكثر وهي ماتتمنى انه الأمور تكبر وتوصل للزعل..
هي تعرف انه تركي شخصيته قويه..ولازال هناك غموض بتصرفاته
والسبب انه علاقتهم محدوده..وحتى اذا كلمها بالتفلون مايطول..والسبب انشغاله بشغله بالبنك والمبنى..
لكن ماتوقعت ابدا يكون قلبه لهدرجه قاسي..!؟
يأست فعلا وحست بالضيق والألم..
وجمانه ساكته وتراقب وجهها اللي بان عليه الضيق والحزن..
وبنفس الوقت ماتدرس ليش جاها احساس الخوف على بنت عمها ..
تحس انه تركي كبير عليه..وفوق هذا رجل غير معروف بالنسبه لها وللعايله كلها..
لكنها التزمت السكوت لأنها مو بأيدها شي..
وبين هالسكوت والحزن اللي طغى على الجو
دق تلفون غلا وكان اللي معذبها مسهر عينها
"تركي"
وبدون شعور تغيرت بملامح غلا وهلت الفرحه هل بوجهها السموح واتسعت ابتسامته واعطتها جمال رباني
وجمانه ماتت ظحك عليها وهي تشوفها كيف تغيرت بثواني ومحمره خجل..
جمانه كل هذا قدر يسويه تركي...الصراحه اشك انه ساحرك..!!
غلا كانت ترتجف مثل الورقه..وقلبها ينبض بسرعه شديده لحقي علي جمانه..تركي..
جمانه وتذكرت فجأه ردي بسرعه يالمجنونه..
غلا ومن فرحتها نست انها ترد اووووبس..نسيت..وظغطت على الرد وقامت من مكانها وقالت احلى وانعم وارق الو الوااا
جاها صوت تركي الرجولي وهو متسند براحه على كرسي مكتبه هلاااا
رجعت الروح لها..وحست بكل عرق ينبض باسم تركي
قلبها تركي
وعقلها تركي
وروحها تركي
تركي اخذ كل شي فيها بدون ماتحس..بدون اراده وشعور..وصوته بهاللحظه..علمها كيف الحيا حلوه بوجوده..وقربه..وحتو وهو قاسي وناسي..بيظل تركي اللي تحبه بكل عيوبه..
ردت عليه غلا بكل حب..وصوتها بدون شعور كان هادي وناعم بزياده تركي..
تركي شخبارك..!!
رد عليه وهي تشوف جمانه تضحك عليها وتقرب منها وتسوي لها حركات ناس مجانين حب ومشتاقين وتتوعد فيها انها مستحيل تطلع من الغرفه الا لمن تسمع المكالمه كلها.. ..وخذت نفس....انت كيفك..!
تركي تذكر مشروبه اللي كان مسبب له الصداع..وخف بسحريه غريبه بسماع صوت غلا الرنان انا بخير..مدام اسمع هالصوت..
جنت غلا.. واحمرت اكثر واكثر.. وطار عقلها لمكان بعييييد..وماتوقعت ابد يكون هذا رده..توقعته بيهزأها..او بيظل ساكت وبهالطريقه بيأدبها..
لكن اللي ماعرفته انه تركي مزاجي..واذا كان مرتاح ينقلب مزاجه..
وجمانه كانت مفتحه عيونها على الأخير وهي تشوف احمرار غلا..لكن تذكرت ساعتها الوليد وصابها الحنين المفاجأ له ورق قلبها بعاطفه شديده وعيونهااصبحت ناعسه بلا شعور...وتمنت لو يكون موجود بقربها..ويعيش هاللحظات وشهر رمضان بلمتهم الحلوه..
وبهالذكرى طلعت جمانه من عند غلا وتركتها تاخذ راحتها بالكلام..بعد ماكانت تتوعد فيها
ونزلت للصاله..ومن الصاله للحديقه بدون محد يحس فيها لأنه بالأساس الأغلبيه كانوا يصلون ومنشغلين..
وظلت تمشي بالحديقه بدون هدف لمن استقرت على كرسي المرجيحه..
ظلت تتمرجح فتره طويله والجو كان مساعدها ببرودته الخفيفه وهواه اللي يهب بحلاوه..
ورجعت ذكرى الوليد تحتل تفكيرها..وهالمره تذكرت الأحداث اللي صارت لها معاه وخصوصا هالسنه هذه لمن وصلت للرساله اللي رسلتها له..
وانتبهت شي هي غافله عنه..او ماحسبت حسابه..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك