رواية اعترافات رجل -10
رغد ــ بحجز حق مصر بتسافر معاي ولا لا؟
لهاالدرجة متمسكة بالاجهاض؟؟ يمكن علشان بعد الطلاق ماتتوهق؟
ـــ بروح ..
وقمت طلعت ..
فضيت نفسي هالايبوع علشان السفر ..ومريت منال اقول لها ..
كان عندها مها ..وشيخة ..بنات فالح .
منال ــ هلا جوزيف ....
مها ـ هههه حلوة جوزيف هذي يا عمتي ..
ــ هييه انت مالج خص ...
مها ــ حشا عمي شفيك علي ؟
منال ــ أخوي ما يطيق يسولف معاي انا اخته ..تبينه يسولف معاج انتي وانتي السبب في ...
طالعت منال وأنا معصب ..
مها ــ السبب في ايش؟؟
منال ــ في الكلام معاه!!!!!
ضحكت ..كانت تغطية منال فاشله مثلها ...
مها ــ زين عمي بارك لي على الاقل ..
ــ ليش انخطبتي من بدر؟؟
مها ــ تدري عيل ليش ماتبارك؟؟ خصوصا انا ملجنا يوم الخميس ..
ــ ملجتي ؟؟ مبرووك بس محد عزمني لا على الخطبة ولا على الملجة ..العموم مبروك....لج ولبدر ..
شيخة ــ بس ياعمي ما يسوى ..ريلها مب مزيون ...
مها ــ أحلى منج يالسبال ..
ضحكت على الغيرة ..
ـــ شيوخ ..عمو اذا كل وحده ماتزوجت الا المزايين شخليتي للمساكين اللي الحلا خلا منهم؟
مها ــ عمي الله يهداك ..فديت بدر والله انه حلو...
شيخه ــ شوفو الخبله للحين ماشافته وتتفداه ..
منال ــ شيوخ يوزي عن اختج ..وشالكلام يوسف ؟؟
مها ــ صار ريلي خلاص . وكافي شفت صورته عند عمتي منال ...وهو بنظري حلو ...
ـــ حلو حلو ..كلِ ريقه في حلجه حلو ماقلنا شي ...
مها ــ ؟؟؟؟؟ عمي!!! ....صراحة زعلت منك ..
منال ــ عمج يتطمش عليج...
شيخه ــ قصدج يتطنز عمتي ..
منال ــ قصدي يغلس عليها ..صج انج سبال ..بدر الحين مب حلو؟؟ عيل من الحلو؟؟ ابوج؟؟
مها ــ عاشت عمتي ...عاشت ..صج ابوي حلو في نظري(مع انه مو حلو ) بس كافي انج نصرتيني ..
قاطعتها ــ أصلا لو اني منج ما استانس ,..الا أغيير لان بدر كاان يبي منال من ثلاث سنين وتهاوش هو وجاسم عليها ..وعمتج اختارت جسوم ..
انحرجت منال ومها انصدمت ..
مها ــ الحين بدر كان يبي عمتي؟؟
ــ كانت البنت الوحيدة في عايلتنا ..أكيد الكل كان يبيها كانت حلوة وقمر ..
منال ــ شقصد بكانت ؟؟انا للحيني حلوة وقمر ..
ـــ مش مهم ..عيال عمي تهاوشوا عليها وانتي واختج للحين ماكبرتوا ..مسكين جسوم طاحت في جبده ..
منال ــ مش مهم ؟ طحت في جبده الحين؟؟امحق اخو هذا انا واختك الوحيده. ..قلت لكم عمكم ما يحسب حساب احد ..الله يرحم ايام كنت مستغلني فيها ..
ــ مايسوى لي هالغترتين اللي غسلتيهم والخدامة مريضة ..بتمنين علي لين آخر يوم في حياتي ؟؟
ضحكت البنات ..وانحرجت منال ــ لاتنسى جو...
اسكتت ..بعد ما خزيتها بنظرة ..
ـــ بتمن علي بالجوال اللي قدمته لي هديه يوم عيد ميلادي من ثلاث سنين..
مها ــ عمي لاتنسى فضل عمتي منال ...عمي انت تعرف بدر عدل وأنا استحيت أسأل أبوي ..وعمي منصور مايعطيني ويهه ..شلونه؟؟ زيين؟؟
ــ مافهمت سؤالج؟؟؟ تقصدين بزين يصلح كزوج؟؟
مها ــ اييه ,,\
ـــ شوفي ..بدر أنا خاويته من سنتين في سفر ..وكان خدوم وكريم ..ماشفت عليه شي ...أعتقد انه ريال زيين كزوج ..لانه وايد محترم نفسه ..
مها ــ عمي وانتوا وين رحتوا؟ ماليزيا؟؟
منال ــ هييه يابنت عيب هالكلام ...
ابتسمت ـــ رحنا عمرة بعدين رحنا الاردن ..كان يبي يحضر عرس صديق له...وأنا مارديته منها سيااحه ..
مها ــ عمي كل اللي يروح ماليزيا يقول انه رايح عمره ..
منال ــ عمج مايجذب يالسبال ..لاتخليني اغير رايي فيج...
ـــ ههههه لا ..صدق رحنا بسيارة ...
شيخة ــ المفروض يالخبلة ماتحاسبينه على شي سواه قبل الزواج ..الماضي ملكه بروحه ..
منال ــ بس من هالكلام الماصخ ...حفلة ملجتج متى تبينها؟؟
مها ـــ خليني أول أجر عمي بالكلام وأعرف عن هالبدر كل شي ..
ــ ليش أنت خلاص صرتي زوجته ..تعرفي عليه ..
مها ــ عمي الملجة كانت من ثلاث أيام بس ..وحضرته حتى تلفون ما اتصل فيني كل اللي شفته صورة يقول مغصوب علي ..
ضحكت على هالخبله اللي قدامي ــ وانت ليش مستعجله؟؟ لو مايبيج ماراح خطبج بروحه حتى بدون ماياخذ جسوم ولا عبدالرحمن اخوه معاه..
شيخه ــ مسكينه ياعمي على بالها بيستوي مثل ماصار لرفيجاتها ...
ـــ وشاللي صار لرفيجاتها ؟؟
شيخة ــ حفلة كبيرة يوم الملجة وبعدين يكلمون بعض ..ويطلعون مع بعض ..
ــ مافي طلعه ..في كلام ...بس ..الطلعه بعد الزواج فلاتحلمين بهالشي ..وبعدين يمكن الريال مستحي وناطر الحفلة لين يلبسج الدبل والذهب ..
منال ــ تذكرت شي انت يا يوسف ماسويت حفله لرغد ..الزواج كان خلال شهر ونص بس ..
ــ أنا وهي اتفقنا وخلاص ..
.مها ــ بس أنا ما أبي ذهب أبي ألماس ..قوله عمي قبل لايشتري الذهب ..
ـــ مهوي الغلط مب عليج على اللي معطيج ويهه .عن اذنكم ..
مها ـ زين عمي عطني رقمه وأنا أقوله ...
ــ عنبوج مافي مستحى؟؟ شو تكلمينه هذي؟؟ اذا هو ماكلمج احتفظي بكرامتج .. والله انكم لامستحى ولابطيخ ..يا بنات هاليومين المحترمات ..
شيخة ــ عمي يقولون لامستحى ولاخجل ..
ــ جب جب انتي ..يايه تعلميني..مب قاصره انتي الثانية ..يلا اذلفوا عن ويههي ...
تمت تضحك منال ...ــ قلت لكم ..مايداني الحريم الله يعينج يارغد عليه ..
طلعت وأنا ساكت ..كنت أبي سبب أطلع . اووه ..نسيت اقول لمنال عن السفر ...يلا مب مشكله ..كله يوم...
مسكت تلفوني أتصل في بدر ..
ــ الو السلام عليكم ..
بدر ـ هلا ولد العم ..وعليكم السلام ..
ـــ وينك يالقاطع ..تعرس وأحنا آخر من يعلم,,,
بدر ــ والله اني قلت لعبدالرحمن يتصل فيك ...بس ..السموحه منك يالشيخ ..
ــ يالشيخ!! بدر ..أنا جوزيف نسيتني؟؟
بدر ــ مانسيناك ..بس نتعذر منك ..يالنسيب ...
ــ ها ..شفت مهوي؟؟
بدر ــ من مها؟؟
ــ العرووس يالخبل ..
بدر ــ اييه ...اعذرني نسيت اسمها ..أنا رحت لفالح بس ابي أخطب ..وما سألت عن البنت ..والحمدالله الامور تحسنت ..
ــ بطرش لك رقم تلفونها ..كلمها ..ترا البنت ..خايفه لاتكون مغصوب عليها ..
بدر ــ أنا ماشفتها ..كنت بطلب الرؤيه الشرعيه بس استحيت من فالح ..وأمي ملزمة علي الا اخطب ..تعرف اصغر واحد ..لين شفت فالح مع بنت من بناته ..وقلت في نفسي نجرب ..والله سهل الامور وملجنا ..
ــ تقنعني انك ملجت بوحده ماشفت ويهها؟؟
بدر ــ اي والله ...عاد قولي ..شلونها؟؟
ــ مافيها شي بس خشمها شوي عود ..وبراطمها كنها تكه ..وعيونها تطبيق اندونيسي ..
بدر ــ لا ..لا تقول ..أكيد تطلع على فالح ..وينه وين الحلاه هالريال ..يالله ..والحين شسوي؟؟ .
كان بدر من صجه مخترع ..
ــ عادي عمليات التجميل ببلاش هاليومين ..
بدر ـ لا والله ..والنسل بالله شلون نتصرف معاه؟؟
ــ اووه قصدك جيل الالفيه ؟؟ لاتخاف لما بيكبرون بتكون العمليات بالكمبيوتر .,..بدون الم .....
بدر ـ تنكت يا ولد العم؟؟ والحين بنت اخوك شسوي فيها؟
ـــ بنت اخوي تسواك ....كنت أغلس عليك ولا هي ماشاء الله من الجمال الله ناعم عليها ..بس لسانها طويل شوي ..
بدر ــ أبي أشوفها ..
ـــ تعال بيت منال ..أنا توني طلعت منه ..برجع الحين ..فز طولك وتعال هنا ..
بدر ـ بس أنا ما اكلم جاسم ..
ــ اوكيي باخذها بيتي ,,,أشوفك هناك ..
بدر ــ مشكور يا ولد العم ..
صكرت من عنده ورجعت دخلت البيت ..
ـــ مها ..مها ..
مها ــ عونك عمي ..انت هني ماطلعت؟؟
ــ ايش هذي عونك؟؟ حنا في مسلسل بدوي؟؟
مها ــ لا عمي بس امي دايم تقولها لاناديناها وخذيناها منها ..
شيخة ـ شمعنى ناديت مهوي ؟؟
منال ــ ها اخوي ليش رجعت؟؟
ــ شرايكم أطلع من البيت؟؟
منال ـ لا حياك ..بس ..غريبه طلعت زعلان ..
ــ تذكرت ان مهوي عرووس ..قلنا آخذها معاي البيت ...
شيخه ــ ياليت عمي ..بروح السوق مع عمتي وهي مب راضيه ...وطرق بيتنا بعيد والوقت بيمر علينا ..ومانلحق ..
مها ــ يمه منكم بس تبون تفتكون مني؟؟
منال ــ كلام شويخ صحيح ..هي تبي السوق وأنا ابي اييب شي للبيبي ..لازم ..قبل لا اثقل وما اقدر اشيل نفسي ..
مها ــ امي تقول مب زين نتشرى للياهل قبل ان يي ..فال مو زين ..
منال ــ عيل تبيني بعد ما اولد أتحوط في السوق؟؟ مابيكون عندي حيل اطلع والياهل وين احطه وهو عريان ماعنده شي يلبسه علشان الفال؟؟
ضحكت شيخه ..ــ وييه ..طاح ويهج ..شيليه شيليه ....
ـــ بس عاد ..يلا مها ييبي عباتج وتعال السيارة بسرعه ..
مها ــ زيين عمي ..خلينا نستانس مع زوجتك ..اللي مانعرف عنها شي ..
سكت وطلعت .. اتصلت في رغد ..
ــ الو..رغد ..
رغد ــ نعم يوسف ..
ــ بيوننا ضيوف ..جهزي الجاي والعصير ..أنا بمر أييب العشا ..اوكي ؟
رغد ــ حاضر ..
ـــ رغد ..جهزي الصالتين مع بعض ..
رغد ــ ليش بيون حريم؟؟
ــ لا ..مها ..بنت فالح ...
رغد ــ شفيها المها؟؟
ــ ملجت ..وريلها يبي يشوفها قبل الحفلة ومستحي من فالح ..فقلت اخليه يشوفها ..
رغد ــ فهمت ...هي تدري؟؟
ــ لا ..ماتدري ..جهزي لها بدله راهيه ..لانها لابسه دراعه كانت عند عمتها..وتعرفين سوالف الحريم ..
رغد ــ فهمت ..
صكيت من عندها وشغلت المسجل ..وكان أبو عبده يطرب ..
((ليت ربي ماكتب لحظة وداع ..ولافراق ولادموع ولاضياع..ليت كل الناس خل مع خليله ..وكل ماقالوا النهايه الفراق ..قلت أحبه حيييييييييييل ....
كلما أدفن خياللك ياعنيد ..تمطر الدمعه وينبت من جديد ..
شفت وش سوى بي حبك يابخييل ...))
مها ــ سوري تأخر عمي ..بس شوي ادبت شيوخ ..
ــ لايكون طقيتيها؟؟
مها ــ عمي .. انا أطق؟؟ الله يهديك ..انا أكسر العظام ..
ــ عاشت بنت اخوي..
مها ــ الله يسلمك ..
طلعت الشريط ..
مها ــ عمي من يسمع محمد عبده؟؟ الله يهداك عمي ..عاصي الحلاني موجود وانت تسمع هالاشكال ..
ــ حدج ..بوعبده ماارضى عليه انتي وهالاشكال اللي يبتيها معاج ..
طلعت الشريط وحطته ..وبدا الصوت الجبلي ..بأغنية عذبوني . الاغنية ماكانت سيئة بس ماحبيتها ..
ــ شوف اغنية غيرها ..
مها ــ اوكي عمي ..مالي صبر حلوة ..
ــ ماسمعتها ..
وحطتها مها ...
وبدت تقلب في دروج سيارتي ..
مها ــ محمد عبده محمدعبده محمد عبده ..عمي أشوف ماعندك غير أشرطته...لا ..فيه تغيير ..عبادي .
ــ عطاني هالشريط جاسم ريل عمتج ..لليوم ماسمعته..شيلي هذا عاصي وحطي عبادي ..
مها ـ اذا مو عاجبك بحط عبدالمجيد ..لكن هالجيل القديم مابحط ..
ــ وأنتي شايله اشرطتج معاج؟؟
مها ــ عيل شفايدتها؟؟ خلينا نستمتع بالطلعات ..
طلعت الشريط وحطت شريط لعبد المجيد ..
ــ أي شريط..
مها ــ منت رايق ...أحب أسمعها عمي ..
ــ لا ...حطي شي فرفشه ..
مها ـ خلاص عندي ميامي ...
ــ تدرين ,,خليني احط الراديو احسن ..
مها ــ عمي انت مايرضيك شي ..
ــ عبدالحليم ..وش تبين أكثر من جي؟؟
مها ــ على حسب وداد جرحي يابوي راح أقول للزين سلامات ..سلمات ..سلمات ..
ــ بس انتي وصوتج النشاز ..بنمر مطعم ..ونشل عشانا معانا ..
مها ـ كل هذا علشان مدام رغد ماتطبخ؟
ـــ كل هذا علشانج يالــ ..ماراح أتكلم الحين ..بس لوتبين..أنزلج أشربج عصير لين مايخلص الطلب ..
مها ــ عمي لاتصير لي مثل طلال ..خذني في سيارة أبوي من شهر على أساس يشربني عصير شربني كرك من المعصرة وردني البيت ..
ــ لا لاتخافين عمج مابيشربج كرك ..بيشربج عصير فرش كوكتيل ..
مها ــ لا عمي أبي أيس كريم ..
ــ عسكريم؟؟
مها ــ آيس كريم ..فانيلا ..
ــ يسمونه عسكريم هني .. ما أردج خايبه يالعرووس ..
مها ــ أحرجتني عمي ..
بعد العسكريم ....
ــ لا ..تعالي شخبار الثانوية؟؟
مها ــ قربنا نخلص ..أنا قلت لابوي اني بدخل موازي من الحين ..مافيني شدة نسبة عاليه ..
ـــ لا والله؟؟ بنت فالح هذا كلامها؟؟ تدرين أمج من كانت؟؟
مها ـ أمي؟؟ كانت مدرسة جغرافية ..
ــ أمج الله يرحمها ..أم طلال ..كانت طبيبة ..
مها ــ أمي أنا كانت طبيبة؟؟؟؟
ــ اييه ..درست في الخارج ..هناك تعرف عليها ابوج ..لانه درس طب أول شي ..بعدين حول قانون ..
مها ــ أمي؟؟
ــ اييه ..امج ساره..الله يرحمها ..
مها ــ ما كنت أدري امي جواهر ماتكلمت عنها ابد ..
ــ لانها ما تعرفها ..فالح تزوج وحده من بره العايله ..ناس غير كان لنا معاهم عداوة ..والوالد الله يرحمه ماحب نسبهم ...ليش أعور قلبج وأنا محضر لج مفاجأة ..
مها ــ الله ..أموت في المفاجآت أنا ..أرجوك عمي ..شالمفاجأة؟؟
ــ بدر .. بيي بعد شوي لبيتي ..
فجأة مهوي ام لسانين سكتت ..وهي مصدومة....
ابلعت ريقها
مها ـ شلوووون؟؟
ــ مفاجأة صح؟؟
مها ـ بس ..ما ..
ــ أدري أنا قلت لرغد تجهز لج بدلة من البدل اللي عندها ..وهي بتساعدج..
مها ـ بس عمي ..ما ..
ــ اش ...توج تشكين وتبين تكلمينه بدون حيا ..من وين نزل هالحيا عليج ؟؟
اسكتت مها وفجأة السوالف اختفت ..
دخلت البيت ونقلت العشا المطبخ ..كانت رغد لابسه دراعه ..جنان ..روعه ..
رغد ــ قال لي يوسف يا المها انج يايه على غفلة ..تعالي ..عندي بدلة بتعجبج ..مالبستها للحيين ..كانت هديه من أختي وما يات مناسبه ..وأنا متاكدة انها بتيي قياسج ..
المسكينه مها لسانها اختفى ..
ربع ساعه ووصل بدر ..
بدر كان وسيم ..أسمراني وخشمه حاد مثل السيف ..وعيونه ناعسه ..وحواجبه مرسومة بدقه ومعقوده ..
له عارض مخليه شوي رزه ..
ــ هلا بدر ..تفضل البيت بيتك ..
بدر ــ هلا ولد عمي ها بتوريني عروستي؟؟
ـــ انطر شوي تقهوا عندنا بعدين نطلع لك البنت ..شالعيله..
بدر ـ ولد عمي أكيد هي شافت صورتي ..ها شقالت عني؟؟
ـــ قالت شلون هو بهالسمار وهالجكر ومسمينه بدر؟ عيل لوكان حلو شيسمونه؟؟ جيكر؟؟
بدر ــ من صدقك؟؟
ــ لا ..أمزح معاك ..البنيه للحين نونو ..توها في السبعطعش شتبي يطلع منها؟
بدر ـ ولد عمي برد لي قلبي أرجوك ..هي راضيه فيني؟؟
ــ بقولك شي واحد ...اليوم سمعتها تتفداك ..
بدر ـ لا والله؟؟ صدق؟؟ زيين ..الحمدالله ...
ابتسمت على ابن عمي المسكين ..الحين تطلع المها ..ويشوفها ..المها حلوة ..عيونها وساع وخشمها دقيق |..ولها براطم مثل اليسا ..يالله شيبي بعد هذي الموضة ..
ــ خليني اشوفها ..
طلعت ..ودخلت الغرفه كانت صج روعه ..لابسه بلوزة تركوازي مع تنورة بيضا ..لها حزام فضي ..والتنورة فيها كسرات ..وفاتحة شعرها ومسدلته على ظهرها ..واصل لين نص ظهرها ..ومكياجها متركز على عيونها ..
ـــ وااااااااااااااااااااااااو ..صرخة اعجاب لج يالمها ..
المها ــ مشكور يا عمي ..بس محرجة من عمتي رغد ..كل هالفن وهالدقة ماشاءالله عليها ..
رغد ـ بس للأسف نسيت عطوري في بيت أبوي مع شنط السفر ....والمها ماشايله عطر معاها ..
مها ــ كنت شايله الله يغربلج ياشيخه خذته مني ..
ــ والحين؟؟ لازم العطر يعني؟؟
مها ــ عمي فشيله ..
تذكرت شي ...ـــ لحظة ..
دخلت لغرفتي ..دورت العطر ..أذكر اني شريت عطر ..لقيته ..ما اذكر اني حطيته في هالدرج ..
رجعت لغرفة رغد ــ خذي ..
مها ـ وااااااااو ..ريحته فظيعه ..هممم
رغد ــ اييه ..يديد . ..حطي منه ..تراني جهزت العشا ..
تذكرت احساسي أول مرة شريت من هالعطر ..
مها ــ روعه يا عمي ..روعه ..انا جاهزة ..
ــ اللي يشوفج الحين ...مايقول انتي نفسج اللي من قبل شوي ترتعدين من الخوف ..
مها ــ عمي كنت خايفه اني مب مجهزة نفسي ..
ــ عنبوج ماتستحين؟؟
مها ــ لا عمي المستحى موضة قديمه ..
ــ نزلي قدامي لا احذفج من على الدري ..صج اللي استحوا ماتوا ..
نزلت مها ..وتميت معاها وأنا أشوف نظرة بدر المعجبه فيها ..والمذهولة ..
بدر ــ ها ابن عمي بتظل ويانا ؟؟
ــ شرايك؟؟ وين أروح؟؟؟
بدر ـ يقولون انك متزوج ..حس فيني شوي...اتركني اتكلم مع زوجتي بحريه ..
ــ عشر دقايق بس ..بطلع اشوف المدام جهزت للسفر بكره ولا لاء..
بدر ــ الله معاك ..
طلعت لرغد وانا مبتسم ــ جهزتي نفسج؟؟
رغد ــ خذيت اغراضي البسيطه اللي باخذها معاي وخليتها في بيت هلي ...علشان اذا مريناهم بكره ..
ــ وليش نمرهم؟؟
رغد ــ اذا نسيت ترانا معزومين على الغدا عندهم ..
تذكرت ان صالح اتصل فيني امس وعزمني ..
رغد ــ عطر مين؟؟
ــ عطر اشتريته ..
رغد ــ ممكن اسال لمين؟؟
ـــ لي ..
نزلت تحت ..
ـــ احم احم هابدر ..تفاهمت مع مرتك..
بدر ــ اييه وقالت لي تبي الشبكه الماس ..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك