رواية أشكي للي بين ضلوعي -3
وتقبلهم للأشرطة الدينية فحبت تدخل بشلتهم وخطوة خطوة حتى تخليهم يحبون الاشرطة الدينية ويتركون المباريات والهواش اللي ماله داعي....شيماء** لولوه شوفي أريج تناديكِ...
لولوه** انـــــا
شيماء** ايه انتي....
لولوه راحت عند أريج اللي كانت بالصف الاول وكانت خارجه من برى وتوها دخلت الفصل... كانت استاذه ايمان.. واقفه عليهم انتظار.. استاذه ايمان استاذة الدين... محبوبة من الكل... ماتحب تهاوش وتصرخ وتستغل سيطرتها بتنفير البنات منّها وتعتبر مرحلة الثانوية ماهي مرحلة هواش..بالعكس الواحد لازم يفهمهم ويتكلم معاهم على انهم كبار.. ومتبعه اسلوبها مع الكل.. حتى انهم يحبوها اللي درستهم والي ماتدرسهم... وعشانها تلقي محاضرات احيانا وقت الجمعيات... فالمدرسة كلها تعرفها ويحبونها.......
لولو**وصلت عند اريج وقالت: نعم اريج...
اريج** استاذه ايمان تبيك...
لولو** (ببلاهه) تبيني انا...
وبدل ماتخرج برى.. بسرعه راحت للشله وقالت لهم استاذه ايمان تبيني.... وش سويت انا؟ ياربي.....
شيماء** روحي استاذه ايمان طيبة ما راح تسوي لك شئ...
امجاد**اللي من اول ساكته وتابع حديثهم بصمت بس تكلمت اللحين وردت على لولو وقالت: روحي.. روحي من قدك استاذه ايمان نادتكِ...
لولو** اخاف اكون مسوية شئ... والله اني خبله... استحي منها....
شيماء** يابنت روحي.. اللحين وش تقول عنك.. تخاف من أي شئ...
لولو** أي والله وبسرعه تروح....
خرجت من الفصل وسكرت الباب وراها تدري ان البنات بيراقبونها... تنهدت وقالت... اممممم.. استاذه ايمان....
استاذه ايمان.. كانت لافه الجهه الثانيه وما انتبهت على لولو وهي خارجه.... ويوم اتكلمت لولو... انتبهت لها....
استاذه ايمان** هلا لولو... وقربت الكرسي اللي جمبها وقالت اقعدي....خلنا نسولف...
لولو** ( انهبلت ) ها..لالالا..كذا مرتاحه...
استاذه ايمان ابتسمت وقالت:ى .. على راحتك.....
لولو** هلا استاذه تبين شئ.... طلبتيني....
استاذه ايمان** ما توقعت رد لولو كذا بس حست بالارتباك اللي فيها.. وانها ممكن تقول أي شئ....وقالت: ابي اسولف شوي معاك...
لولو** ليه مسويه شئ انا(تحس ان بين الاستاذه والطالبه مجرد درس وواجب وانتهينا)....
قامت تضحك استاذه ايمان*** تقريبا انتي مسويه شئ...
لولو** وشو؟؟؟؟
استاذه ايمان** يعني بصراحه انا مايهمني مستوى الطالبه الدراسي بمقدار المستوى الاخلاقي... الواحد تروح الايام وتجي ومايتذكر الا الناس الطيبه اخلاقهم... سلوكياتهم.....الاشياء الرائعة هي اللي تبقى... اما الشاطرات كل سنه فيها شطّار...
لولو نقز ببالها المباريات لايكون سمعتني وانا مسويه فيها قمة الاخلاق والا دب ... فشيلة.. لا وبعد قاعده اقول فريق الهلال قوه ووسامه واصرخ... انواع الفشايل.....
استاذه ايمان** لولو لي ماتجاوبين....
لولو** ليش وشو السؤال؟
استاذه ايمان** اقول الشقاوة والرجة اللي سويتها متى بتنتهي؟
لولو** المشكلة انها بدون تاريخ انتاج يعني من دون تاريخ انتهاء...
استاذه ايمان**هههههههههه.. ضحكت بصوت عالي من اول عاجبتها هالولو وتحس انها يبيلها شوية سمكرة وتطلع طالبة ماحصلتش....
قالت لها** يعني ما في امل العقل يرجع...
لولو** ماتدري ليش حست انها اهانةاو تعدي شوي عليها... سكتت شوي بس قالت مايصير تزعلين على أي شئ.... قالت لها... لا ان شاء الله يرجع العقل... وتجرأت وحطت عينها بعين الاستاذه وقالت... بابتسامه عريضة...
يعني الرجة اللي فيني هي سبب القلق اللي فيك....
قامت تضحك الاستاذه وقالت.. برافو جبتيها....
قالت: لولو... مايصير خاطرك الا طيب ان شاء الله...
الاستاذه: ان شاء الله....
لولو**تامرين شئ استاذه...
الاستاذه(بذهول)لا بس شدي حيلك....
لولو** ان شاء الله... ودخلت الفصل... وسكرت الباب وراها بشويش... واسندت راسهاعلى الباب من ورى... ..وتنهدت تنهيدة طويلة... وتذكرت ان الاستاذه قالت لها باسولف معاك شوي... الله يقلع التناحه... انواع الفشايل... بس يوم جن صديقاتها... نست كل شئ... وقعدن يسولفن ويخربطن... وجت الحصه اللي بعدها معلمة اللغة العربية... ترفع الضغط... وكلهم يكرهونها..وكم محاولة من لولو وشلتها يغثوها ويسولفون معاها عشان تروح الحصه وماياخذون درس.. وبدات الحصص وانتهى اليوم الدراسي... والكل فرحان.... اربعااااااااااااااااااااااااااء..... يا سلاااااااااااااااااااام....
*******************************************
قاعده عهود تفكر بالكلام اللي قالته يوم كانوا قاعدين مع بعض... لايكون احد زعل..طيب انا ماسويت شئ غلط..وما كنت اقصد شئ.. وانا ماقلت شئ يزعل... مسكت المخده الصغيره وضمتها بقوه... وراسها يفكر ودايخه من كثر التفكير..وكانت منسدحه على السرير..وانقلبت على جهة اليسار وهي تفكر.. لاتكونين موسوسه انتي ماقلتي كلمه مي زينه او جرحتي احد.. وقاعده تتذكر كلام خلود يوم تقولها انتي عديمة الاحساس.. من جد انا كذا.. لــــيــــــتــــــــــه.. انا كل كلمة افكر فيها...لايكون احد ما فهم وش قصدي..لايكون هو حساس وانا ارمي الكلام على كيفي... ياربي معليش عديمة الاحساس بس على نفسي اما على احد غيري لا.. انا اتطنز على البنات العربجيات اللي يرمون الكلام على البنات ولاينتبهون ان هالكلمات تجرح.. صح اني ما قلت لاحد واتطنزت عليهم بنفسي..بس لايكون ربي بلاني.. لا ان شاء الله... وقطعت تفكيرها ...وهي تقول لروحها انا قلت باقطع التفكير بالعواطف لانها ما تجيب الا الهم..وبس افكر باي شئ واشغل نفسي بهالخرابيط..لازم اصير مثل العيال..ما يهمهم أي شئ مو حنا البنات على أي شئ الدمعه تنزل... واحاسيس ومشاعر..وتفكير ..واحبسي روحك بغرفه.. وعواطف..وجروح.. (كلام تقول لروحه وتحاول تصدقه وتنفذه عشان تبعد عن المشاعر والحساسيه المفرطه اللي عندها)
وقامت من سريرها وراحت تدق على صديقتها تعزها مره بس بداخلها كبرياء يمنعها من انها تقول اني مره احبك...وهي واياها مره اكثر من صديقات ويقولون لبعض كل شئ بس هي تخاف تعترف لها عن مقدار معزتها تقوم تجحدها وتتركها او تتكبر عليها صديقتها..وتقول لنفسها الشيطان ما مات..وما ابي الشيطان يكون بيننا.. طلعت من غرفتها ونزلت للصاله... وجت عند التلفون ويوم جت بتدق قالت لها امها....
ام خالد: تبين تكلمين بالتلفون
التفتت عهود لوراها وشافت امها وقالت لها:أيــــه
وراحت بتاخذ التلفون...جت امها واقتربت منها وترددت بالكلام اللي بتقوله بعدين اتكلمت وقالت لها:بصوت حزين ..بصوت امومي خايف من التوقع السئ..بنبره عاطفيه شديده..بنبره اشبه للتوسل اكثر من انه أمـــر: لا تدقيـــــــن
عهود:انتبهت لامها بس حاولت انها ماتبين أي شئ وبداخلها انهار من الاشفاق على امها بس تحاول انها تكسر نظرة الخوف الي بامها ...ووتبعد القلق اللي بامها....
تشجعت وقالت: ليش يمــــه؟تسوي روحها مي داريه وش فيها امها...
ام خالد:نفس النظرات..ونفس النبره.. مازال الخوف يدب بداخلها..مازال القلق معاها.. بس هالمره اقوى..قالت بصوت كله امل ان الكلام اللي تقوله يتحقق: يمكن يدق خالد
عهود بابتسامه خفيفه وتحاول تقوي امها... وبنفسها راحمه مررررررره امها: ما راح يدق
ام خالد بحزن وكانها بهالوقت تبي احد يوقف معاها ويشيل عنها همها ويصبرها باي شئ..يسقي لها بذور الامل بداخلها.. قالت: ليش مايدق؟
عهود: يمه خالد وتعرفينه زيــــــــــــــــن هذا طبعه..تحاول تقوي امها..
ام خالد: ايه بس له اسبوع طالع من البيت ومادق الا مره وحده
عهود: الحمدلله انه دق بعد...يمه لاتحترين خالد هو كذا مايحب احد يخاف عليه او يحتريه... لاتشيلين همه..وبعدين يمه تراه كبير هو مو صغير.. وولد يعني العيال مايحبون احد يسأل عنهم او ينشغل باله عليهم.. وان شاء الله مو صاير له شئ..
ام خالد: كانها تواست من كلام بنتها بس ودها احد يهدي عليها ويطمنها لان بالها مشغول مره عليه وحاسه انه صاير له شئ..ومن يوم ما قالت عهود لامها ان خالد مو جاي البيت وهي تحن فوق روس بناتها عشان يعلموها وش اللي صار.. بس هم انكروا ان فيه أي شئ وقالوا لها تعوذي من ابليس.... وحاولت ابو خالد انه يشوفه يسال عنه بس مو راضي يقول هو رجال..مايصير نسال عنه... بس ماهي مطمئنه ودها لو تشوفه ..لو نظره تحس انه بخير... أي شئ عنه يبشرها انه بخير...
عهود: ها يمه وش قلتي؟
ام خالد: بايش؟
عهود: اقولك ما يخالف اكلم بالتلفون
ام خالد: ايه بس لاتطولين...
عهود: ابشري يمه...واتصلت على صديقتها نوف...
ام خالد ما هي متمطئنه مشت بخطوات ثقيله ببطء وجت بتخرج من الصاله بس ما طاوعها قلبها لان املها كبير بانه يدق.. وعشان جواله طول الوقت مغلق..والا كان باليوم اكثر من مره تدق عليه.. رجعت عند عهود وقالت لها..
عهود يمّه لاتطولين يمكن يدق
عهود ما قدرت ترجع وتعيد نفس الكلام ..مع ان بداخلها حاسه بامها وحاسه بالخوف والقلق الي عايشته امها..واتبي تاكد لامها هالشعور وما تبي تحسس امها بانها منشغل بالها عليه لانها قالت اللي عندها بالاول وماتبي ينعاد هالكلام وبنفس الوقت شفقانه على امها حيـــل..ودها تساعدها باي شئ..
ردت على امها بابتسامه عاديه خاليه من أي تفسير لام خالد: ابشري يمه...
وردت تكلم صديقتها نوف....لانها اتصلت وما مداها تتكلم الا وامها قاطعتها..
عهود: ايه نوف وين وصلنا...
نوف: عهود لايكون امك تبي التلفون
عهود: لا امي ماتبيه..اصلا امي ما تكلم بالتلفون كثير.. واذا دقت تدق على خوالي يوم الجمعه...
نوف:ههههههههه... اشوى.. ايه وصلنا عند سلمان...ما كملتي لي السالفه يوم تحكينها بالجامعه وتجي سيارتي واخرج..
عهود: ايه صح ما كنتي موجوده..وتحمست عهود وهي تحكي لنوف السالفه...اسكتي بس.. لو تدرين ذاك اليوم.. الصراحه قلبي وقف.. قسم بالله احس ان شعري وقف من الخوف
نوف تستهبل: أي شعر
عهود:ههههه..ملزمه تعرفين
نوف: اكيد
عهود: منب قايله..كل شعري وقف...خايفه احد يكشفني اويدخل علي سلمان..انواع الفشايل؟؟ المهم افتح درج تحت سريره.. وشكله درج خااااااااااص.. استغليت الفرصه كلهم مسوين سناعه ورايحين المطبخ..وخلود وليلى جايبين فلم هندي مدري من وين ويشوفونه... تخيلي يعني واحد ماتدرين عنه ولاشئ غاااااااااامض هالسلمان..حتى خواته مايحكوني شئ عنه...ولايسولفون عنه كثير مثل احمد..المهم فتحت الدرج بشويش وطبعا كنت مسكره باب الغرفه ومحد فقدن..على بالهم اني بالملحق افتش ورى العيال..متعودين علي..حتى عيال خالتي لاجيت ضفوا كل اغراضهم اللي بالملحق..يدرون اني اتفقد اماكن العيال..ودايم يتطنزون عليّ بس ما علي منهم..اهم شئ اعرف وش ورى العيال...عاد اول مافتحت الدرج..الاقي اشرطة اغاني بس الغلاف من دون الشريط.. وتجراف لونه احمر.بس قماشه شئئئئئئئئ..مدري وش اسمه بس غالبا بالهدايا اشوفه
>>نوف داخله جو بالسالفه ومتحمسه عل الاخر.. ايه كملي وش شفتي بعد
عهود: وش تقولين انتي...نظري سته على سته ... الحمدلله والشكر...
نوف:عهود والله مني رايقه لمزحك الثقيل تكفين كملي
عهود: اصلا ولا انا رايقه لاني صدق متحمسه بالسالفه
وتكمل.. المهم حاولت افتح التجراف مو راضي ينفتح مثـل الحبال عليه مدري شلون صايره..وعشان كذا مايفتح..وما ابي افتحها بعدين يعرف..حاولت افتحه شوي بس اشوف مكتوب فيه شئ..من هنا من يمين ومن شمال..لو كلمه..بس مرررره ما طلع معاي شئ.. لقيت سديهات واحد مكتوب عليه منوعات وواحد برامج الويندوز وخرابيط الحاسب والباقيات مو مكتوب عليها ولا شئ..بس واحد لقيته باخر الدرج مكتوب عليه(خاص جدا) ياربي مره اللقافه ذابحتني ودي اعرف وش فيه ولاجبت اللاب توب اشوف..واخاف يفقده لو اخذته..وتدرين العيال بهالاغراض مافي احرص منهم..المهم تركته مكانه وقلبي يتقطع حسرة والما ولقافه عشان اعرف وش محتواه... وبعد ين وش تتوقعين لقيـــــــــــــــــت
نوف: وش لقيتي
عهود: توقعي
نوف: مما بالي شئ...ومن الحماس قالت: اليوم عقلي عاطل عن التفكير
عهود: اجل ماينفع اكمل لك السالفه اليوم..اذا عقلك مو موجود...
نوف: تكفين ما اقدر والله من اللقافه ما اقدر انام
عهود: مره مايمديني..جربي ليله بدون نوم..عشان تتفكرين في نعمة النوم..
نوف: بلا بياخه عهود كملي..
عهود: رحمتك والله..بس بكره او بالجامعه ازين اعلمك..لاني كنت ناويه ما اعلمك موليا..بس هونت..
نوف: والله انك بايخه.. من جد يبي من يكفخك.. بس هيّن خليها تجي سوالف مثل كذا انواع النذالة بتشوفينها...
وبعدين كملت بحسرة وطنازة على نفسها: المشكله اني خبله اعلمك بكل السالفه بعدين اتذكر
عهود:هههههههههههههههه... يالله عنوني امي فوق راسي اكلمك بعدين او بالجامعه المحاظره الثانيه ماعندنا شئ اقولك وش لقيت..بس ذكريني..مع السلامه
نوف: مع السلامه..
عهود ما كلمتها امها ولاشئ بس تشوف نظرات امها اللي تقطع القلب ... وامها تعرفها زين ماترجع وتعيد الكلام وبنفسها وودها تتكلم..بس نظراتها تكفي.. من يوم ماشافتها تروح وتجي على الصاله وتناظر عليها انتهت من المكالمه والا لا..عشان كذا انهت المكالمه بسرعه لانها خافت مره على امها..وحالتها ماتسر لاصديق ولا عدو..هذا قلب الام مابيدها شئ..الله يهديك يا خالد تعال وريح امي...
*****************
عائلة ابو سلمان...
خوال عائلة ابو خالد..
حنان: اكبر وحده بعائلة ابو سلمان.. عمرها 26 سنة ممرضه..بعد الثانوي دخلت كلية التمريض سنتين وكانت متفوقه ولقت تعيين بسرعه..تحب عملها مرّه.. وتشتغل في مستشفى حكومي...ملتزمه مره اكثر وحده من عائلتهم ملتزمه..
سلمان: اكبر ولد عمره 25سنة ..آخر سنه بالجامعه..المفروض انه منتهي من الدراسه بس اهماله رسب سنتين..
احمد: المفروض يكون بثاني جامعه بس اللحين بثالث ثانوي.. السنة الثانيه اللي يعيدها.. عمره 20سنة.. بايع الدنيا ومايهمه شئ اهم شئ وناسته حتى انه اهمل بعض حقوق اهله ..ومتأذين اهله من طناشته الزايده عن اللزوم...
ليلى:بثاني ثانوي..عمرها17 سنة صديقة خلود الروح بالروح..كل اسرارهم عند بعض.. وصديقات كل وحده متعرفه على الثانيه.. وداخلين كلهم قسم ادبي يقولون اسهل ولازم مثل بعض.. بس كل وحد بمدرسه لان كل وحده داخله المدرسه القريبه من بيتها.. يحبون يقعدون الحالهم كثير وبس يسولفون مع بعض ومايخلون بخاطرهم بشئ الا قالوه لبعض..واغراضهم حت المدرسه مثل بعض يشترونها وكل وحده اذا لقت شئ زين اشترت للثانيه..
رانيه:بثاني متوسط هاديه مره وماتسولف كثير..غالبا تكون مستمعه الا اذا احد سألها تجاوب.. واللي بعمرها مبسوطين لانهم لقوا احد يسمع لهم.. عمرها14سنة..
خرج احمد من غرفته وراح لغرفة سلمان دق الباب ويسمع صوت سلمان من الغرفه يقول:ميـــــــــــــن؟
احمد: انا احمد
سلمان:بشر امك..وش تبي؟
احمد:اقول افتح الباب
سلمان:الباب مفتوح
احمد: يمال المنيب قايل وفتح الباب..ولقى سلمان يحوس باحد ادراجه قرب عنده وقال:تبي مساعده حاضرين احنا
سلمان:ابعد راسك هناك..لو تترك اللقافه هذي افضل مساعده... وسكر درجه وراح قعد جمبه على السرير...
احمد:اخوي الكبير وتمون...
سلمان:خير وش ورى هالادب
احمد..بلا مقدمات ولا لف ودوران قال: ابغ فلوس
سلمان:والله اني شاك يا رجال خاف ربك امس معطيك300 ريال
احمد:والله امس العشا علي .. وعبيت بنزين.. وشريت لي طاقيه وتيشرت
سلمان: ماشاء الله مسلسل هندي قلبتها..الكشخه الزايده بطلها .التيشيرتات مليانه بدولابك.. والعشا ماله لزمه انت بطل فزعات وتمسك فلوسك
احمد:يعني..
سلمان:وش قصدك
احمد:بتعطيني والا لا
سلمان:لا
احمد:طيب هالرجه والزحمه اللي سويتها اللحين ليش من الاول قول وخلصنا
سلمان: ابيك تمسك قروشك يا الخبل
احمد ولا كلف نفسه يلتفت له خرج من الغرفه وترك الباب مفتوح عشان ينقهر سلمان ...احمد ولا اهتم بكلام سلمان ولا اثر فيه وعشانه اخذ المصروف الشهري من ابوه يعني لو يموت مايعطيه ابوه الا اذا كان محتاج مره..بس دايم ياخذ من اخوه سلمان واخواته دين وغالبا مايرجع الدين...راح لغرفة اخته حنان.. دق الباب بشويش..
حنان:ادخل..
احمد: السلام عليكم..بابتسامه عريضه...
حنان:وعليكم السلام.. ردت الابتسامه بهدوء... سكرت الكتاب اللي كانت تقراه ونزلت نظراتها اللي كانت عليها...
وناظرت احمد..اللي قال بسرعه..ما في ادخل تفضل
حنان: تفضل..
جلس احمد بالكرسي اللي مقابل حنان وقال ببرود وبلا اهمية او خجل
احمد: بدون مقدمات محتاج فلوس
حنان ابتسمت لاحمد وردت:كم تبي؟
احمد:تعجبيني انتي مو هالبخيل سلمانوه...
حنان:ردت بهدوء:والله انت اللي مسرف..اذا لاقدر الله مابقى لك سلمان والا انا شلون تتعود على المصروف..
احمد:تفائلوا بالخير تجدوه
حنان: لا والله صدق اتكلم ماشاء الله المصروف بالنسبه لك زايد شوي تقدر تدير مصروفك... اما اذا اتعودت على الصرف..ماتقدر تدير فلوسك لو دخلت الجا معه او بعدين اذا توظفت..
احمد: طيب ان شاء الله بس اللحين ابغ فلوس ومستعجل...
حنان:الله يهديك
احمد:آمين
حنان: كم تبغى
احمد:انتي كريمه وانا استاهل
حنان:تكفيك خمسين
احمد:وش تسوي ذي ولا بنزين
حنان:ميه
احمد:ولاميه
حنان: كم؟
احمد:يعني خمسميه..ثلاثميه..حق ثلاث ايام
حنان:ول عليك هذا والوجبات الاساسيه بالبيت ومصاريف الدراسه من ابوي.. عموما انا باعطيك ثلاثميه غيره مافي وخليها لاخر الشهر ترى مافي احد بيعطيك...
احمد:خلاص ان شاء الله بس بسرعه بالله...
حنان:طيب واعطته الفلوس وخرج بسرعه من عندها... بس خرج احمد غير عرف ان اخته صادقه وشديده معاه وامه ماتعطيه لان ابوه قال لامه لاتعطينه ولا شئ الا باذني..وسلمان تهاوش معاه..يعني لازم يهتم ومايصرف يمين وشمال...
احمد ما يهتم بالمصاريف ومن وين وكثير يتسلف من سلمان وحنان واحيان يضطر ويكلم ابوه.. مايهتم بالحياة وبحقوق الاهل..اهم شئ وناسته مع العيال وبس ومرات يسهر لاخر الليل واحيانا اليوم كله ماينشاف..وابوه يكلمه بس مو شديد عليه يكلمه بشويش وبهدوء الين كبر وتعود على هذا الوضع وتعودو اهله عليه..اللي مطايح مقهوره منه صدق وحاسه بالمشكله العميقه اللي طايح فيها احمد هي ليلى بس مي عارفه شلون تكلم امها وابوها ..وحاسه ان حالته زادت الا متى وهو على هالحال متى يعقل..متى يحس بالمسؤلية.. احيانا ترمي عليه كلام ويتهاوشون هي واياه... ويقولها صوتك ما ابي اسمعه..اللقافه بطليها.. وعرفت ان مافيه امل من الكلام معاه.. وهو ولاعبرها ولا اهتم بكلامها ومازال على طيشه وعدم اهتمامه....
************************
اليوم خميس في شقة خالد... قام من النوم وهو وده يرجع ينام مره ثانيه... الاسبوع الي مضى كله يقضي وقته بالنوم ومل من النوم بس هو اللي يبعده عن الحاله اللي هو فيها... صار يتقلب بالسرير يمد لحافه ويغطي اطراف اصابعه اللي كانت باينه وما زال يتقلب بسريره وتذكر انه ما صلى الفجر قام من السرير وهو متعب مره من كثرة النوم ومن كثر انسداحه على السرير... قام هو يتسنّد باطراف السرير وبشويش يقوم .. اول ما قام ظهره اوجعه مره مسك اخر الظهر وعلى اخر الفقرات ضغط بقوه عليها وبدا ياخذ هوا ويكتم نفسه شوي ويرفع جسمه ويوقف باطراف الاصابع بعدين يخرج الهوا ويغمض عيونه بقوه يحس بالالم يخف شوي وهو يتالم مره من اخر ظهره..وتجيه آلآم بظهره بقوه ويحس مثل النغزات الحاده كأنه سكاكين تجي على اخر فقره وورى بعض وبقوه وهو نادر يجيه مثل هالحاله ...فقد توازنه وقعد بطرف السرير وهو متألم حيل من هالنغزات واهاته مكتومه ويتألم بصمت اللي باين انه يتألم هو انه يغمض عيونه بقوه... وانسدح على السرير وصار يشد على نفسه ويحاول ان ظهره يشده معاه بس زاد الالم مرّه وما تحمل هالشد... قام من السرير وهو يالله يالله يرفع نفسه يحس روحه ثقيل مره.. وقف وحاول يخلي ظهره مستقيم..وشوي شوي تحامل على نفسه وعدل ظهره وخلاه مستقيم وبعدين يميل على جنب اليسار شوي شوي وكل مايزيد بالميلة يزيد الالم الف مره عن قبله ويرجع يميل على جهة اليمين ونفس الالم بس اخف مو مثل جهة اليسار.. بدا يحس بالراحه شوي او خف الألم تحامل على نفسه وراح توضى وصلى الفجر... ورجع قعد على المقاعد الارضية اللي بالصالة اسند راسه على ورى وهو مليان هموم وغموم... اما عينه حمره ووضحت التجاعيد اللي فوق وتحت العين وجسمه ضعف عن اول بكثير ما ياكل باليوم الا قليل بس عشان يقدر يروح الدوام... ويحس بصداع نصفي فضيع ووجهه صاير اسمر من قل الاكل...وصاير يشرب ترمسين قهوه عشان يخف الصداع.. تنهد تنهيده كبيره وقويه يبي يخرج منها همه المتجدد يبي يخرج من باله الشئ اللي صار له مع خواته.. المه الجسمي مايهمه كثر المه الروحي ..خواته..السياره..التمشية اللي كان راسم لها انها احلى تمشية..تغير نمط كلامه..ابتسم وضحك معاهم ..وخلاهم يسون شاهي وهم متحمسين وبالنهاية..آآآه من النهاية..ليت الزمن يرجع والغي التمشية مره وحده.. آآآه ليت الآآآآآه تنفع.. طعون بصدري عيّت تموت ..كل ما مر عليها زمن اقول انتهت ماتت..راحت..ترجع اقوى واقوى من كل مره.. رجع بالذاكره لورى..تذكر همه وغمه اللي عيّا يموت.. آخر مره اللي قبل خواته كان مع صديقه اسامه..ما كان يمون عليه وطلب منه انه يوصله لبيته ..واتفجأ من اللي شافه وانصدم وتفهم الوضع بعدين..كانت قويه وما اتوقعت ان بيجي اللي اقوى منها.. آآآآآه ياربي..يارب طلبتك موّتها او موّتني.. يارب ارحمني يارب.. وقويني على المواجهه الصعبه مع خواتي... كانت تبي تخونه دموعه وتنزل بس ماقدرت الا خالد مايقدر ينزل دموعه ..بكل مره يقول انا ضعيف... هالمره قويه وتحاول الدمعه تنزل بس مايقدر الا الدمعه .. دموع الرجال قمة الضعف اذا نزلت.. قمة الهوان..قمة التحطيم العالي اذا نزلت.. آآآآآه... رحمتك ياربي.. وكان بيتصل على امه بس صوته ولا حالته تأهل انه يتصل.. راح شغل قناة المجد وقلب على قناة القرآن ورفع الصوت شوي ..عشان يرتاح نفسيا لانه من كثر التفكير زاد الصداع وزادت نبضات قلبه.. الشيخ:مشاري العفاسي يقرا بتلاوه خاشعه قطعت تفكيره وريحته شوي.. صار يتابع الايات ويتأمل بالايات.. وبدا يحاول يقرا معاه لانه كل شوي ينقطع تفكيره ويجي التفكير المؤلم.. وتبدا الافكار الشينة براسه وتفكيره يتشوش وترجع له الآمه.. و بدا يقرا معاه وبدا يحس بالتحسن.. بدا يحس ان نبضات قلبه هدت..وحس ان الصداع بدا يخف ..زود على صوت التلفزيون...واسند راسه على ورى بس هالمره مرتاح باله.. يحس بالقوه بدت ترجع لعروقه..رجع الدم يمشي بمكانه..حس ان بداخل جسمه كل شئ يتحرك..عاد كل شئ لطبيعته.. صار يقول لروحه لازم انا اتحرك..ارجع مثلهم..انا تعبت وتعب كل عضو معاي وبعدين بفضل الله ارتحت وكل شئ رجع للشئ السابقة الا انا... اللي قدر يسويه بهاللحظه هو اتصاله على امه اللي ماصدقت ان خالد قاعد يكلمها..تسأل عنه وعن صحته ..اتعشيت..اتغديت..ووينك..وشلونك..وعساك مرتاح.. وترجته انه يرد للبيت...خالد انطعن بكل سؤال توجهه له امه..وكل مايحس بنبرة الحزن اللي بامه يزيد المه الاف المرات.. ويوم ترجته..حس بالام وطعون تجمعت عليه..وصار يقوي نفسه ووعدها انه يرجع بس عنده شغلات مهمه ومضغوط بعمله يخلص منها ويرجع.. اتصاله على امه ريحها كثير وفرحت بهالاتصال ويوم وعدها انه يرجع زاد فرحها مره واطمئنت مبدئيا عليه لانها ما راح ترتاح الا اذا شافته... اما خالد كان بالنسبه له استرجاع للالام واسترجاع لهمه.. وغمه اللي معذبه...بعد يا يمه انا معذبك..حتى انتي الغاليه ماسلمتي مني.. لو تدرين فيني كان ماطلبتيني ولاترجيتيني..امي الحنون تعذبت بسببي..ماخليت احد يرتاح..آآآآآآآآآآآآآآه..يارب رحمتك وعفوك يا كريم...خالد وعد امه ولازم يوفي بوعده..يمكن هو مايقدر يرتاح ...بس قام يذكر نفسه انه هو مو مرتاح لا هنا ولا عند امه.. اللي شاغل باله مواجهته مع خواته.. وشلون يرجع عندهم ويسكن معاهم..يارب قويني وخليني امسك اعصابي...وقويني اكثر يارب...
((الجزء الخامس))
تصلت على صديقتها شيماء.. وهي متحمسه مره مع المباره..وحاسه انها بتطير من الفرحه وفيه نوع من الخوف..احلى يوم عندها اليوم اللي فيه مباره..
لولوه: السلام عليكم
شهد:وعليكم السلام
لولوه عرفت صوت شهد لانها دايم مسنتره عند التلفون ويسمونها سنترال البيت..وقالت:شخبارك شهد؟
شهد:الحمدلله.. شعلومك؟
لولوه:والله الصراحه اخباري اسألي عنها بعد المباره
شهد:هههههههه... اجل مثل شيماء محتاسه اليوم كله ومسويه رجه عشان المباره
لولوه: ايه ترى اليوم عل الكاس مو أي مباره..امممممم وين شيماء...
شهد: ثواني اناديها اوكي...
لولوه: اوكي...
شهد اكبر من شيماء بااولى جامعه راحت لغرفة شيماء اللي مي فاضية قاعده تزين شرايط بغرفتها ابيض وازرق..متيمه بالهلال هالبنت.. دقت شهد على غرفة..شيماء..
شيماءبصوت عالي وبدون نفس قالت: ميـــــــــــــــــــــــــــــــــــــــــــن؟
شهد: افتحي الباب انا شهد
شيماء:مني فاااااااااااااااضيه كم مره اقول لك
شهد: اوكي باقول للولو منتي فاضيه....
شيماء من سمعت اسم لولو نقزت وفتحت الباب بسرعه وابعدت شهد من طريقها وراحت للمجلس وردت على لولو ونفسها يجي ويروح من الركض
شيماء : الو ..ها ها ها..تلهث بقوه من الجري
لولو: هلا والله .. بشويش من وين جايه لايكون من السطوح..
شيماء: لا والله من غرفتي جايه بس جايه جري
لولو: ههههههههه... بسرعه بعد السلام عليكم وشو شعورك مع اقتراب موعد المباره؟
شيماء:وعليكم السلام..لالالالالالالالالا(شنو شعوري)لالالالالالالا....شئ خيالي ما اقدر اوصفه..احس اني خايفه وفرحانه(ولولو تسمع بانصات)يوووووووووووه وش اقولك اليوم ما قدرت اتغدى يوم قالي بدر لو خسر الهلال وش بتسوين.. صد نفسي عن الاكل..والله احس اني خبله.. بس وش اسوي غصبن عني والله مو بكيفي...وتدرين الوالده انواع التهزيئ..لاني خايفه ومرتبكه وما كملت غدا وقريت كل الجرايد..الرياضيه وكل الرياضه والجرايد الثانيه قسم الرياضه بعد قريته..متوتره لابعد درجه.. ياربي لو تشوفين شكلي انواع الهستره.. قالبه غرفتي ابيض وازرق.. كلها شرايط وقاعده تساعدني الشغاله...وامشي بالبيت واقول( الليله ليلتك يا هلال) المهم احكي لي عن شعورك...
>>ولولو داخله جو مع هالشعور وتسمع بانصات للشعور..
لولو: يوووووووه..اول شئ تلفزيون سلطان مره كبير وهو اللي فيه الحماس اخذت سبير لمفتاح غرفته قاصته للحالات الضروريه لاني داريه انه اذا خرج يقفل الغرفه وراه..المهم اني اشتريت بطاطس ليز حااااار..وبيبسي..وامي هاوشتني لانها منتجات امريكيه..بس مالقيت الا هي..وانا ما اعرف اتفرج الا ومعاي بطاطس عشان يخف التوتر وادخل جو بالمباراه... بس تدرين اللي يقهر وشو؟
شيماء:وشو؟
لولو: اليوم خميس ويوم الي يجون فيه اختي ومرة اخوي..ودي اقترح عليهم يحطونها يوم الجمعه..انواع الطفش مافي شئ جديد..استغفر الله صح يوم فضيل بس مافيه أي شئ
شيماء:أي والله بس انا اقرى روايات يوم الجمعه
لولو: شلون روايات عبير وماشابهها
شيماء: لالالا عبير مره وحده.. لا اختي شروق قالت لي مي زينه ولاتقربين منها
لولو: عشانها وصخه صح
شيماء: غير انها وصخه هذا مفروغ منها.. تقول وحده من صديقاتي كانت مدمنه روايات عبيروكانوا ينصحونها البنات بس هي تقول عادي ما تأثر ومدري وشو؟ المهم يوم انها تزوجت ..كانت تسولف لاختي تقول عجزت اتاقلم مع زوجي..اذا جا موقف او شئ اتذكر بالروايه كيف هو يعامل زوجته وانا شلون...وردة فعله مو مثل ردة فعل ذاك.. والله غصبن عني مو بكيفي كل ما حاولت ابتعد ما اقدر... من جد شئ يخوف..عاد عقب ما قالت لي هالكلام بطططططططططططلت تفكير اصلا فيها
لولو: يــــــوه...لا اجل معك ما اقرى ولا شئ منها وبابطل تفكير حتى انا.....بس وش تقرين احس بملل اذا قريت
شيماء: اول شئ اختاري شئ حلو مو أي كتاب.. بعدين انا منوع اللي تبين.. اقرى لاجاثا كريستي.. ومصطفى لطفي المنفلوطي.. وقماشه العليان...وكتب علم النفس اختي شهد وشروق مدمنين عليها مرررررررره..يقولون تغيرت عادات سلبيه كثيره فينا..وانا الى الان ما قريت منها...
لولو: تصدقين والله حمستيني اجل يوم السبت تجيبي لي أي كتاب منهم..اذا قدرتي طبعا..ورضيت لك الانسه شهد او شروق...
شيماء:هيّـــــن لوما رضت الصرقه بهالحاله جايزه...
لولو: اسسسسسمعي صوت الجماهير بدا عرض المباره...مع السلاااااااااااااامه
شيماء: مع السلااااااااااااامه
وركضوا شيماء ولولو على التلفزيون المباره ما بدت بس من يوم مايجيبوا الصوره هم عند التلفزيون مسنترين....
بدت صافرة بداية المباره..واللي يبدا هو فريق الاتحاد.. وسماح وابوها وامها واخوانها واخواتها كلهم اتحاديين وماتابعين المباره بحماس.. والكل على اعصابهم مسابقه على نهائي..مو أي مباره.. بدا اللعب وبدا الحماس باللعب..وجت هجمه خطيره للهلال محمد الشلهوب عدى من الوسط واعطى الكوره لسامي الجابر على خفيف ومن جهة سامي سدد بسرعه بس حارس الاتحادي صدها..الجمهور صرخ بهالوقت وانطلقت صرخه من بيت لولو وشيماء.. ليش ضاااااااااااااااعت ياربي..وتعالت صرخات وصيحات.. واشتدت المباره والحماس من الطرفين للحصول على الكاس.. والشوارع كلها فاضيه بكل انحاء المملكه..العيال ماليين المقاهي والكازينوهات.. والبقية المتبقية ببيوتهم.. وتجي هجمات خطيره للاتحاد من الجناحين الايسر والايمن بس هم لاعبين الاتحاد يضيعوها..ودفاع الهلال مو مركزين على هجمات الاتحاد... انتهى الشوط الاول على التعادل السلبي للفريقين(صفر_صفر) وبدا التحليل الرياضي يبينون اخطاء الفرقيقن ونقاط الضعف وكل لاعب وآداءه.. بدا الشوط الثاني.. وبدا الحماس بكل مشجع.. وكل واحد على اعصابه لاعبين ومشجعين وجماهير بالمباره والمدربين ولاعبين الاحتياط..كل واحد ناشف يبي يعرف وش النتيجه.. دخل بالدقيقه 75 نواف التمياط والجماهير انواع التصفير والتصفيق والتشجيع.. ويدخل يلعب وبالمقابل دخل حمزه ادريس وتشجيع من الاتحاد وتصفيق وتصفير.. وكالعاده غنوا الاغنيه المعتاده(اوه يا حمزه..اوه يا حمزه) واشتدت المباره وصارت اخطاء اللاعبين كثيره بسبب التوتر.. جت هجمه خطيره للاتحاد من ركلة زاوية وبراس اسامه المولد اللي ماشاء الله راسه غالبا ما يخطا.. وهداااااااااااااااااااف.. طبعا صوت المذيع.. قوووووووووووووووول....قول قول ..وش هالخطاره يا اسامه..هدف ولا اروع في شباك الهلالين... هدف في الدقيقه 80.. وبدا التوتر وتضيع الكور وبدت الكروت الصفرا كالعاده من شدة التوتر.. اما بيت سماح صار رجه وصجه من الحماس والتصفيروانواع الفله عندهم وارسلت رساله على جوال ام لولو اللي طبعا كان مع لولو.. وكانت الرساله(( مهزوووووووومين لا تتابعين المباره)).. انقهرت لولو مره وانشدت اعصابها عل الاخر ...اما شيماء قامت تصيح ما تقدر تكتم دموعها.. شهد تقول شيماء تراها مباره . وتحاول تصبرها بس مافي امل..دموعها تزيد اكثر من كل مره..
شهد: مايصير يا شيماء
شيماء:...............
شهد:شيماء شوفي شوفي هالهجمه...
رفعت راسها شيماء.. على هجمه خطيره للهلال من نواف التمياط يشوتها للشلهوب اللي كان بمنطقة ال18 وركلة قوية منه وتدخل بشباك الاتحاد على الدقيقه85.. قامت تنقز وتصرخ من الفرح وتمسح دموعها اللي مازالت باقيه..
لولو.. نقزت فوق سرير سلطان ونقزت على الارض وتصرخ هدااااااااااف...وتصفر.. ياهووووو ..العن ابو الاهداف.. روح يا الشلهوب الله يسعدك.. وجماهير الهلال صرخت وصار المذيع يالله ينسمع من الصيحة ..الجماهير الهلالية اللي هي اكثر من جماهير الاتحاد لان المباره بالرياض... لولو على طول ارسلت رساله لسماح: ((نامي يا عمري ناااااااااااامي.. اليوم ازرق ناظري للسما...))
سماح انقهرت من لولو ..واهلها كلهم متذمرين من هالمباره...
اشتد اللعب اكثر واكثر وماباقي على المباره الا خمس دقايق..ومايعرفون كم الوقت بدل الضياع.. انطرد بهالمباره من الاتحاد رضا تكر بسبب لعبه الخشن.. و4كروت صفراء للاتحاد..والهلال كرت احمر لباولو ديسلفا اللاعب البرازيلي و3كروت صفراء.. جت هجمه خطيره للاتحاد واللي يلعب محمد نور من الجناح الايمن يشوتها لحمزة ادريس اللي كان عليه رقابه عاليه من الدفاع الهلالي وابعدها فهد المفرج بركلة للوسط للشلهوب.. الشلهوب قام يحاور لاعبين الوسط تعدى من الاول والثاني والثالث يوم عدا منه على جهة اليسار لمرمى الاتحاد يسقط عليه المدافع رضا تكر ويكسره بحركة المقص الحكم طلع كرت احمر لرضا تكر واعترض الجمهور واللاعبين لكن الحكم اصدر الحكم محد يقدر يعترض جا حمزه ادريس ومسك اللاعبين وهداهم وما خلاهم يعصبوا وقال لرضا تكر يوقف قدام الحكم عشان يعطيه الكرت وفعلا وقف واعطاه وخرج برا الملعب وعلى اخر دقيقه من المباراه .. مكان كسر اللاعب محمد الشلهوب اللي طبعا خرج من الملعب وماقدر يكمل المباراه ..لعب الخطأ اللي ارتكبه رضا تكر اللاعب البرازيلي المحترف في صفوف الهلال ..كماتشو.. صفر الحكم ولعب كماتشوا وركز على الزاوية التسعين طبعا الحارس عرف المكان..ولف على الزاوية بس ضربة كماتشوا كانت اسرع واقوى بحكم خبرته بهالضربات.. واعلنوا الهدف.. صرااااااااااااخ وحمااااااااااااااس... لولو قامت تنقز وتصرخ فاااااااااز...سجلللللللللللللللللللل... واااااااااااااااااااااااااااووووووووووووووووو.... وصارت دقايق الوقت الضايع تشوفها وهي واقفه ... دخل سلطان عليها وهي واقفه وشاف شكلها وغرفته اللي صارت شقة عزابية..البطاطس بجهة والبيبسي بجهة والفص فص بجهة... جا عندها
قال:ماشاء الله فاتحه الغرفه...
لولو ولا ردت عليه متحمسه مع المباراه ولا ردت عليه واقتربت من التلفزيون اكثر وهي واقفه...
وقالها: حجيه انتا في مخ كويس وجا قدام التفزيون ووقف ولا هو راضي يبعد..
لولو: وخر عن التلفزيون...
سلطان قام يعاندها ويوقف قدام التلفزيون...ويقول: الحمدلله انا ولد وماتابعت المباراه.. وانتي غلبتي على فارس ولد جارنا...
لولو: بس دقيقه يارب انتهي على خير... يارب... ماترد على سلطان الي قام يغايضها... وجت هجمه خطيرة للاتحاد.. صارت لولو ماسكه المخده وواقفه..وتقول: الدعيع تكفى لا اوصيك اخر دقيقه لاتفشلنا..خليك قدها...
ويسجل الاتحاد هدف على اخر دقيقه ولولو وشيماء يصرخوا لا..حراااااااام على اخر دقيقه ياربي اللحين اشواط اضافيه ولبنتيات...بس طلع الهدف تسلل والغى الحكم الهدف...صارت تنقز يا سلام عليك.. ذا الحكم والا بلاش.. وصفر الحكم معلنا عن نهاية المباراة ونهاية دوري خام الحرمين الشريفين الملك فهد بن عبدالعزيز... وصراااااخ لولو وصارت تدور ودقت على سماح تبي تغايضها لقت الجوال مقفل.. ارسلت رساله.. ((قلنا لك ناااااامي.. الليله زرقه هاهاهااااااي))... وارسلت لباقي صديقاتها مباركه بمناسبة الفوز.. واتصالات بس بعد ما اعطوا الكاس لفريق الهلال والميديلات الذهبية.. وميته من الفرح...
سلطان: روحي كلمي صديقتك
لولو: اكيد شيماء... وبسرعه راحت ترد عليها وتحليل عن المباراه..وشفتي الشلهوب شكله تعبان.. اما نوااااااااااف ياختي عليه يجنن..وتغزل وهبال وصرقعه ويفكروا بيوم السبت وش يسون.. واتفقوا على شئ..خطيــــــــــــر...
يوم السبت الموعد اوكي
اوكي....
لولوه صح تتابع مباريات بس مستحيل تسمع اغاني تقول احس بشئ يخوف مره واخاف ان ربي يسخط علي..بس تسمعها من البنات وتردد الاغاني معاهم.. ولاتحب لاعب معين وتجمع صوره ومن هالخرابيط ابدا ماتقرب منها تخاف من هالاشياء حدها بس انها تشوف المباراه والتحليل الرياضي ... وشيماء مثلها..بس باقي البنات عادي عندهم....
راحت للمقلط وسلمت عليهم وردوا السلام وكان موجود امها ولطيفه ونهى...
نهى: ها لولو من فاز
ابتسمت لولو وفرحت ان احد معطيها وجه ويتكلم معاها بخصوص المبارايات..
لولو: اكيد الهلال فيه غيره بالسما عالي...
نهى: ماشاء الله مبروك
لولو:الله يبارك فيك... تعجبيني يا نهى انتي اللي فاهمتني...
لطيفه: الله من الملح..اقول لاتنجين علينا تعالي تعشي...
لولو: مالي نفس..
نهى: المفروض تخلصين العشا اليوم من الفرح
لولو:ههههههههههه من قالك اصلا توني اكله ليز كبير كامل ابعد التوتر عني..
ام محمد: ماشاء الله بعد تقولين تعالي يالله تعشي غصبا عنك
لولو: والله مالي نفس بس عشان ام محمد بآكل...
ودخل محمد بهالوقت وابتسم لنهى.. اللي ملكت روحه.. اللي يفقدها على طول.. رجعت له الابتسامه بحياء...
جا محمد وحب راس امه وقالها:شخبارك يمه؟
ام محمد:الحمدلله وينك يا وليدي تعال اتعشى..تعال جمبي اقعد وكل..انتبهت ام محمد للابتسامه المتبادله واشتعلت بقلبها نار الغيره....
ونهى اللي تمنت انه يقعد جمبها وياكل بس ماتقدر تتكلم ... اتعشوا ويوم خلصوا جا محمد وقال لنهى يالله البسي عباتك بنمشي
ام محمد:تو الناس ياوليدي
محمد:تاخرنا يمه.. تامرين شئ
ام محمد:سلامتك يا ولدي
محمد :الله يسلمك والتفت لنهى وقال يالله انا بالسياره...
نهى:ان شاء الله
وراحوا محمد ونهى لبيتهم..وقعدت لطيفه ببيت امها ويجي زوجها بعد صلاة الجمعه وياخذها.. ولولو هي الي استانست مره رغدوه بنت اختها والفوز اجتمعوا مع بعض..مستانسه عل الاخر....
*********************
تتمشى بحوش بيتهم اللي يشرح الصدر.. ثيّل(عشب اخضر صغير) على اطراف جدار الحوش بس المساحه كبيره شوي..في مكان بطرف الحوش فيه ثيل مره كثير.. اكثر منطقة موجود فيها الثيل عشان الواحد اللي يحب يقعد فيها ..ويستمتع بالطبيعه.. فيه جلسات ارضيه والجانب الثاني جلسات على الكراسي.. لفت الحوش حقهم خمس مرات تدور وتجي وفكرها مشغول مره مع مشكلتها.. تحس نفسها مكتومه..مضيق النفس عليها..ودها تستشير احد عنده خبره بس ماتعرف مين..ماتحب تضايق امها لانها تشوف ان امها كبيره بالسن والمفروض نريحها مو نزيدها هموم وغموم... قرت رسايل جوالها مرتين كلها.. قلبت بالارقام واحد واحد.. وصلت عند رقم تحس هو المنقذ الوحيد.. هو الحل الاخير.. تحمست مره لتنفيذ الفكره..ترتبت العمليه اللي بتسويها بكل بساطه..ماحست بصعوبة الحل ابد..كل هالمده وانا افكر واتعب وراسي وتعب وملل من التفكير وبكل بساطه هالحل هذ هو...مو معقولة.. دق جوالها وهي كانت تتأمل الرقم وبالها راح بعيــــــــــــــــد وتخرعت وكان بيطيح الجوال...وردت وهي تضحك..
الجوهره:هلا وغلا...
مشاري: هلا بك..السلام عليك
الجوهره:وعليكم السلام..
مشاري: وش اخبارك؟
الجوهره قعدت على احد الكراسي وهي تقوله:الحمدلله..اخبارك انت؟
مشاري:بخير نسأل عنكم
الجوهره:تسأل عننا شئ طيب انك تسال..وتكلمه بصوت تمثل انها معصبه وتقول:وش هالجحده..مره من زمان عنك..لاتسال لاتتصل ولا حتى رساله احس انك عايش...
مشاري: معليش والله من حقك..انا والله قصرت مره مع الكل..انتي سددي لي الفاتوره وانا اتصل عليك يوميا.. ..
الجوهره:هههههه..لا يقالك العذر فواتير..
مشاري: يالله عاد انتي كريمه وانا استاهل...ماتحبين العفو
الجوهره:امممممممم.... اصلا اتصالك ذا هو العفو..
مشاري: اشوى..طيب جوري انتي اللحين مشغوله...
الجوهره: لا..تامرني شئ
مشاري:لاجوري ابي الصدق
الجوهره:والله فااااااااضيه وقاعده بالحوش اتمشى...
مشاري:طيب تعالي وافتحي باب البيت
الجوهره: احلف عاد..عند الباب انت..
مشاري: ايه عند الباب
الجوهره:..يالله ثواني وافتح الباب ..فمان الله..
مشاري:فمان الكريم...
وفتحت له الباب اول ما دخل طلع راسه وقالها: بوووووم... سلام الله عليكم
الجوهره: عليكم السلام...
وسلموا على بعض ..ويسألون عن الاحوال...
مشاري: يعني ما ادخل..مافيه تفضل..على الباب نتكلم
الجوهره:والله معليش من الفرحه كم عنك يا رجال....
مشاري:هههههههههههه.. الله يسلمك..
الجوهره..تفضل بس تبي بالحوش والا داخل....
مشاري: بعد ايش تفضل..قصدي الحوش اشرح للصدر من البيت..بس ابدخل اسلم على الوالده وناخذها معانا بره...
الجوهره..يالله.. وقاموا يسولفون مع بعض إلين دخلوا البيت....
مشاري فيه شئ من الغموض..لكنه طيب لدرجه مي معقوله ..مايحب المشاكل ولا الزعل.. هادي..وحبيب.. يحب يقعد مع البنات ويسولف معاهم..يحس بروح الدعابة معهم مو مثل العيال اللي هوشه وطقاق ..ويحس ان البنات ارتقوا بكل شئ حتى يوم يتكلم مع البنات ويتكلم مع العيال خصوصا اذا فتح احد المحاور او المواضيع يلاحظ الفرق الكبير بينهم.. من ناحية الثقافه وطريقة الكلام...
مشاري اسمر عيونه واسعه شوي.. شعره قليل شوي مو ناعم بس ابتسامته هي اللي معطيته الوسامه.. بسيط بكل شئ..مايلبس الا اثواب ولانه نحيف مره ..نحفه اللي خلاه يجزم ويصر انه مايلبس جنزات او ترنقات... مشاري يصير اخو الجوهره من الرضاعه..اكبر منها بسنه.. كانوا هم وجيرانهم مره مع بعض واكثر من الاخوان يوم كانوا بالديره..ويوم جابت ام الجوهره الولد اللي قبل الجوهره توفى ورضعت ولد جارتها بعد موافقه من ابو الجوهره ..لان ام مشاري جاها ضعف مره يوم ولدت مشاري ونزل معدل دمها الى 4 .وتعبت مره.. فرضعته... وماشاء الله مازالوا متواصلين ..كلهم نقلوا للمدينه بس مازالوا متواصلين خصوصا مشاري..
دخل مشاري والجوهره ولقوا ام الجوهره قاعده تخيط ثوبها.. جا مشاري وحب على راسها وجت بتقوم ام فيصل بس هو مارضى وسلم عليها وهي قاعده.. راحت الجوهره تزين القهوه.. ركبت الماء على النار..واخذت جوالها واتصلت على فيصل
الجوهره: السلام عليكم..
فيصل:عليكم السلام..
الجوهره: اقول فيصل ترى مشاري عندنا تعال بسرعه ..
فيصل:خلاص شوي وأجي..
الجوهره:لاتتاخر..اخاف يروح ومايتعشى عندنا..
فيصل:ان شاء الله شوي وجاي..
الجوهره:فمان الله..
فيصل:مع السلامه..
وراحت الجوهره عندهم بالصاله وقالت يالله يمه..يالله مشاري..قو للحوش..
ام فيصل:ايه ازين برا...
مشاري: يالله ..قــوه..
وطلعوا بالحوش وقعدوا على الجلسات الارضية..مالها داعي يتقهون وبكراسي..
ام فيصل: وش اخبار دراستك مشاري..مير مره انقطعت عنا..مانشوفك..
الجوهره:ايه عليك فيه يمه..هاوشيه عشان مره ثانيه مايقطع...
مشاري: الله يستر منك يا السوسه ... والله يا يمه اني الفتره الماضيه استلمت شغل وصاير مع الشغل والدراسه مشغول مره وطلبات البيت.. ومشاويرالاهل.. مافي الا انا.. وهذانا ماشايين بالدنيا...
ام فيصل: الله يعينك..واخبار امك..
مشاري:بخير تسلم عليكم..
ام فيصل: الله يسلمها..هي الى الان تشكي رجلها
مشاري:الى الان بس الحمدلله اخف من اول..وكانت تبي تجي بس ماتقدر تمشي زين من رجلها..وقلت لها يوصل سلامك ان شاء الله
ام فيصل :الله يجزاكم خير..اشوى انها ما جات.. دامها تعبانه ازين لها الراحه
مشاري:وحركات الديره مانستها جايبتن تنكة كليجه
ام فيصل:حليلها ..الله يجزاها خير من زمان عن الكليجه
الجوهره:ههههههههه,,,تتطنز على حركات الديره
مشاري:الا والله انها معجبتني واتمنى نرجع مثل اول
ام فيصل: أي والله عادتنا زمان ازين من اللحين.. جارنا اللي جمبنا مانعرف عنه ولاشئ ولو يشب ببيته نار مانعرف..
الجوهره: يمه حنا ماقصرنا نجيهم بس هم مايجونا وسوينا اللي علينا..هم اللي مايبون
ام فيصل: كل شئ تغير مو على الجار...
مشاري:تذكرين يمه سالم اللي موذي الديره
ام فيصل: ايه اذكره مدري الى الان بالديره والا راحوا
مشاري:لا ماراحوا بس عقل ماشاء الله عليه وصار مطوع الديره ومسك المسجد وماشاء الله عليه الله هداه ...
ام فيصل:ماشاء الله وش هالاخبار الزينه
مشاري:لا وبعد عرسه الاربعاء الجاي
ام فيصل:لا اله الا الله.. والله العيال كبروا..على طاري العرس ما دريت يا مشاري وش صار على الجوهره...
الجوهره انقبض قلبه.. تكفين امي لاتتكلمين..ايه امي على عيني وراسي بس ولو انا بنت واستحي.. يمه تكفين..كانت تكلم روحها وتتمنى ان مايصير اللي بالها لكن امها ماتبقي بقلبها شئ...
مشاري:خير يمه..وقام يشد على اعصاب الجوهره
وقال: جوري هاليومين مي عاجبتني اكيد مسويه شئ كذا والا كذا
الجوهره: وانت شدراك اصلا هاليومين منت عندنا والا الطير الاخضر
مشاري: بالضبط الطير الاخضر هو اللي قالي...والتفت على ام فيصل
وقال: سمي يمه بس كنت ابي جوري تعصب شوي...
ام فيصل: الجوهره بارده ماينفع معه شئ..المهم الجوهره....
يوم قالت الجوهره ..وهي تزداد نبضات قلبه ياربي يمه والله مايصير كل شئ تقولينه وكأنه سالفه عاديه..تكفين يمه....بس امها كملت كلامها...
ام فيصل: الجوهره انخطبت
مشاري:ماشاء الله ...على البركه...منهو عريس الغفله
الجوهره:كلن يرى الناس بعين طبعه
مشاري:اححححححلى العروس زعلانه بس ماقلتي لي يمه منو العريس
يتبع ,,,,
👇
اللهم لك الحمد حتى ترضى وإذا رضيت وبعد الرضى ,,, اضف تعليقك