رواية أخذيني مابيني -23
ولاء : انتي ديم اكيد صح ؟ انا بنت ام ياسرتفشلت : هههههه اهلييين هلا والله , شخباركم
ولاء : الحمد لله تمام انتوا شخباركم ؟ مبرووووك زواج أبوج
مبروووووك زواج امج
الثنتين سوا : هههههه
ولاء : هههههههه شنو هذا شالدنيا هذي ؟
ههههه مادري , مارح تجون من الرياض ؟ فكّوا عنها شوي
ولاء : هههههه بلى ان شاء الله الاربعاء جايين للملكه ان شاء الله
شدعوه تعالو قبل
مانقدر والله دوامات تعرفين
اممم صح الله يعينكم
طيب انا استأذن الحين دقيت ابارك بس ,, باركي لابوج وجدج ترا استحي اكلمه ههههههههههههه
عادي انتي متزوجه صح ؟
يسسس بس استحي بكيفي
. : يابنت بيصير زوج امج ليش تستحين
. : كيفي يختي استحي وبس
. : هههههههه تكككفين بس (وسكتت شوي ) عادي ترا شكلي خذت راحتي وياج هههههههه
ولاء : اوووو عاااادي حتى انا حسيت انج صديقتي منذ اول وهله
: ههههههههههههههه احلى يا أول وهله طيب انتي قدي صح ؟
. : اممممممممم لا انا اكبر منج بسنه اظاهر
. : اها , نو بربلم وميييين هذي النونو اللي تصيح عندج
ولاء وهي ترفع جوري لحضنها : وين نونو جوري عمرها 5 سنوات بس دلوعه من تشوفني ماسكه التلفون الا تبي تكلم كل العالم
. : وه ياقلبي عشان كذا تصيح ؟
. : ايه عفست لها وجهي وأشرت لها تروح عني وصاحت ههههههههههههه
يعمري عليها هاتيها بكلمها
ولاء : تحملي اللي يجيج اجل هاج
ديم تحمست : الووووو جوري
جوري بنعومه وهي تلعب بشعرها : الو انتي مين ؟
رفعت جوري السماعه وطالعت امها : ماما مين هذي؟
ولاء : ههههههههه هذي تصير امممم بنت زوج ام امج (نفضت راسها ) اقول هاتي بس
ديم : ههههههههههههههههههههههههههههههههههههه ياخال ابوي حك ظهري ههههههههه مسكينه شكلها تعقدت بوسيها بليز
: ان شاااء الله , يللا حبيبتي سلمي عليهم ونشوووفكم ع خير
: ان شاء الله ,, فمان الله
سكرت ديم والتفتت لهم وهي شاقه الابتسامه
حمود : هالحين من متى وهي صديقتج هاااا ؟
ابراهيم بهدوء : هذي بنتها ؟
حمود : انت يالمستحي مسوي نفسك ماتدري ايه بنتها
ديم خلاص بتتقطع ضحك : تبارك لكم تراها
حمود وابراهيم : الله يبارك فيها
ديم : والاربعاء بينزلون الدمام
حمود بأمر : اجل قوم اتصل على رجلها عطهم وصف البيت
ابراهيم : ان شاء الله
مشعل في الجهه الثانيه كان يدور بغرفته محتار كيف يضبط الموضوع اخيرا نقزت في باله فكره وعلطول راح اخذ جواله واتصل
هآآي آنت (عمتي ) مضاوي
مضاوي : هههههه مشيعل ؟ حسبي الله على بليسك
مشعل ضحك : شخبارك عمتي ان شاء الله بخير
. : الحمد لله , مشيعل اخلص شتبي ؟
مشعل : ههههه مره ماخذه فكره عني اني مصلحجي
. : يعني تبي شي ولا ؟
هههههه الا والله , اسمعي (وقال لها الفكره )
مضاوي : والله ياولدي فواز احبه حيل واحب قربه بس فاطمه اختي الله يهداها ماتحب تخلي احد يحتك فيه
. : يعني موافقه ع الفكره ولا لا ؟ عمتي ابيج تساعديني
. : ان شاء الله من عيوني والله
. : تسلمين
. : مشعل , كل هذا عشان فدوى ؟
تنهد مشعل وابتسم : حتى انتي ياعمتي تقولين كذا ؟
: ايه , انا ادري انك تحب فواز بس فدوى هي السبب الرئيسي صح ولا ؟
.
لاتستحي يامشعل , مافيها شي اذا انت تبي شي من هالدنيا لاتتوقع انها بتعطيك اياه لازم انت تكون اناني شوي وتتحداها
. : صح كلامج خالتي
ومايدرون عن فواز وفدوى !
رهف : فهووود قلبي يدق بقوه كل ماقربت الدقايق
فهد بهدوء : معليه حبيبتي الحين بدخل البيت وبكلمهم خليج جمب الجوال عشان ابشرج
. : مره واثق انهم بيوافقون يافهد ؟
. : ان شاء الله , هم من زمان يبوني اتزوج
سكر فهد منها ودخل البيت نافخ صدره وكان الكل مجتمع في الصاله وهالشي سهل عليه الموضوع دام اخوانه موجودين خلهم يعرفون مره وحده هو الكبير والمسيطر ماحد يقدر يمنعه عن اللي يبي
فهد : يمه
ام فهد : مصمّه شتبي
فهد وبعد مالتفتوا عليه الكل : كنت بقول لكم ابي اتزوج
ام فهد علطووول رفعت يدها تتطنز : لولولولولولييييييش مابغيت
ابو فهد وحاس بارتباك ولده : صبري يامره ,, من هي بنته اللي تبي تاخذها ؟
فهد بارتباك حاول يخبيه : اخت واحد من ربعي
فواز وفدوى منصتين بهدوء وابو فهد قام يسأله
. : شيقال لهم ؟
فهد منحرج شوي : الفلاني
ابو فهد : شسمها ؟
رهف
فواز طلع من سرحانه يركز بكلام اخوه من قال اسم رهف وحاول يتذكر هو وين سمع اسمها فيه
. : وش معنى هي بالذات انت شايفها بمكان ؟
. فهد حاول يدور تصريفه : لا ,,ها ؟ مره بالغلط وبصراحه . اعجبتني
ابو فهد عصب : وانت تحكم ع البنت من شكلها ,, اهم شي اخلاقها
# والاخلاق عاد !
فهد : ليه يبه انا اعرف اخوها ورجّال وانت أسأل عنهم
ابو فهد كنه مو مقتنع : لا لا ,, عندك بنات العايله كثار لاتاخذ من ناس مانثق فيهم
فهد انقهر وتوّه بيدور كلام الا وينط فواز : حرام ! خلوه يتزوجها خلوه
فهد انبسط لانه لقى احد يوقف معاه حتى لو كان فواز ,, اما ام فهد صرخت ع الولد : وانت شدخلك فيه يتزوجها ولا مايتزوجها
فواز مقهور : هو يحبها خلوه . يتزوجها
فهد طلعت عيونه من كلام فواز هذا ناوي يفضحه بغباءه
ام فهد رفعت حاجب : وتحبها بعد ؟ من متى ان شاء الله ؟
فهد حاول يدافع عن نفسه : لاتاخذين ع كلامه يمه , ماعليج منه , انا اقول لكم عجبتني والاخ يفهم على كيفه هو ومخّه ذا
ابو فهد عصب : فواز شقصدك يحبها تستهبل انت ؟
فواز قام واقف : مسكين ,, يكلمها كل يوم ,, يحبها ,, يبوسها احبج رهف رهف عمري حياتي رهف مسكين يحبها . يتزوجها خلّوه
ابو فهد قام واقف ووصلت معاه : بعااااااااااد تكلمها وتحبها بعد هاااااه ؟ وحركات قلة حيا بوس ومادري شنو
ام فهد هي الثانيه عصبت : لا لا منت صاحي احلم بس , تبي تتزوج لك وحده من اللي تعاكسهم وتنصب علينا
فهد قام واقف وراهم يحاول يجلسهم ويصرف الموضوع : لا لااا , يبه يمه هدّوا شوي انتوا مصدقين هالخبل هذا
انا مو خبل
فدوى : فهد انت تعرف ان فواز مايكذب
ابو فهد قام يصارخ : اسمع عاد ,, كلامي مارح اثنّيه هالبنت لاتحلم تتزوجها
فهد بترجي : يبه احبها والله احبها
ام فهد : ماعندنا شي اسمه حب ,, هذي تنصب عليك وتلعب معاك وزي ماتكلمك اكيد تكلم غيرك , وبعدين حظرتك رافع الكلفه معاها ذي ماتستحي على وجهها وجهها مرشوش بمرق
ابو فهد : اذلف عن وجهي هالبنت منت متزوجها ولا والله اموت وانا غاضب عليك
ام فهد تمشي طالعه : هذا اللي ناقص بعد
فهد غمض عيونه وكنه يمنع نفسه ينفجر وشوي لما حس بالقهر مالقى نفسه الا يمسك فواز بعنف من بلوزته ويصرخ فيه : انت حماااار ,, شسووووويت انت شسوووووويت
فواز ببراءه وخوف وهو يرجع على وراه : انا اقولهم , ,,, خلوه يتزوجها
. : لا انت حيوان انت متخلف وغبي انت خربت علي كل شي انت دمرتني غبي ماتفهم غبي وبتظل طول عمرك غبي
فواز وهو يحاول يفك يدين اخوه العنيفه : انااااااا مو غبي ,, احبك والله ابيهم يخلونك تتزوج
فدوى جات بينهم تمسك فهد تحاول تفكه بصعوبه والاثنين متشادين سوا فهد لما وصلت معاه فك فواز بقوه طيّحته ع الارض : انا اوريك يافواز اوريك
فدوى تصارخ : فهد حرام عليك هو مو قصده مسكين يبي يتوسط لك ماله ذنب
: خلّ ينطم بس ,, قالت ماله ذنب الحين ابوي وامي حلفوا ماآخذ البنت اللي احبها بسبّة غبائه , يعني خلاص انا انهدمت كل احلامي وامنياتي ,, وبسبة مين بسبب هذا الله ياخذك ان شاء الله وافتك منك
فواز والدمعة بعيونه : الله ياخذني وتفتك مني (وقام واقف ) احسن اموت احسسسسن
فهد راح لفوق وقلبه محترق ويحس انه وده يقتل اخوه ماله وجه يكلم رهف بس هو تعود يقول لها كل شي ,و مالقى نفسه الا يدق عليها ويقول لها عن اللي صار
رهف بسخافه : ياحبيبي هونها وتهون
. : صاحيه انتي وين اهونها ,, اقول لج اهلي حلفوا انج ماتكونين لي . خلاص انا بموت وربي بموت
. : ليه حلفوا اكيد معصبين , اصبر كم يوم ويروقون شوي وقول لهم ثاني مره
. : لاحوووول ,, رهف هذول اهلي وانا اعرفهم قالوا مافيه يعني مافيه
. : طيب والحل يعني مارح نتزوج ؟
جت بباله فكره جنونية : نهرب ونتزوج بعيد عنهم !
. : صاحي انت ؟ فهد وين قاعدين احنا
. عصب : مادري راسي بينفجر ,, رهف اوعديني انج تكونين لي تنتظريني العمر كله لين احاول بأهلي
. بمياعه : لا يافهد انا مستحيل ارضى اعيش وسط ناس ماتحبني ,, يعني حتى لو وافقوا اهلك بيكون بس عشانك وبعدين يمكن يتقصّدوني لا ماقدر
طلعت عيون فهد لبرا : يعني شقصدج ممكن افهم ؟
: يافهد انا قايلة لك إني مسمّية لولد عمتي بس ما أحبه احبك انت ,, لكن اذا انت بتعلّقني وبتعيشني حياة كلها مشاكل اجل اروح اتزوجه اصرف لي
فهد سكت مصدوم يدور ع كلام يقوله : بذمتج هالكلام من قلبج ؟
بثقه : أي اسمح لي احبك بس راحتي اهم
ضحك : احبك ؟ مادري حسستيني بكلامج انج ماتعرفين معنى هالكلمة !
رهف : لا والله انت تدري اني احبك ,, بس كل شيّ له شي
. عصب : لاتقولين هالكلمه , تحبين ها ؟ اللي يحب يضحي بس هذا حب الناس السنعه مو حبج انتي انا الحمار انا الحمار اللي مصدقج ورايح افاتح اهلي بالموضوع احسب امنياتج مثل امنياتي
. : وانا احسب اهلك فري بيوافقون وبيفرحون لي
. : اللهم طولك ياروح اللهم طولك ياروح
فهد حبيبي ,, شوف عندك اسبوع تقنع اهلك واذا مارضو انا بقول لامي اني موافقه ع ولد عمتي لانه قريب بيتخرج
فهد فقد اعصابه وحس انها تمنّ عليه بحبه لها : اقول رهف !
. : عيون رهف
خلي عيونج لج اهلي ماني مكلمهم ثاني مره ,, ولا رح اضحي بشي وولد عمتج روحي تزوجيه واشبعي فيه ان شاء الله ينضرب على راسه ويحبج
فهد شفييييك عصبت وخذت الموضوع جدي ؟ بليز فهد افهمني انا مو لعبه عندك تخليني انتظر
. : وانا مو بزر عندج تمشيني على كيفج ! رهف اسمحي لي انا ماتوقعتج كذا انا ضحيت عشانج ورحت كلمت اهلي واخرتها انتي تقولين كذا
كيف يعني الحب اللي بيننا ينتهي بغمضة عين . ؟
. : انتي دقّيتيني بكلامج روحي رهف الله يوفقج خلاص ماعاد ابي منج شي مو هذا كلام وحده تحب تقوله لحبيبها مالت عليج ومالت على حبج ومالت علي فوقكم
. : ليش ليش
لأني ماخذ الموضوع بجديه ,, ولما جيت اشب الفحم مارضيتي تحطين البخور ! خليتيه يحترق ويحترق ويحترق بس هين هين انا بخليه يطفى وربي يا رهف النار اللي شبيتيها انت وفوازوه بقلبي لا أطفيها والله لا أطفيها
فواز بهدوء : فدوى انا خبل لايكلّمني احد !
فدوى بحنان : بس قول لي فهّد عورك ؟
فواز يمسك يد البلاي ستيشن كالعاده بالمقلوب : .
انقهرت فدوى من حست بالقهر بعيون فواز وهدوئه يخوف كأن اللي صار( قشة قصمت ظهر البعير ) وعلطول راحت لغرفتها تفكر في الناس اللي يحبون فواز غيرها
اتصلت على خالتها مضاوي وكان جوالها مقفل احتارت موت والعبره خنقتها مافيه غير مشعل لازم تبدّي حبها لفواز على احاسيسها وحبها لمشعل وراحت لرقمه واتصلت وهي تنتفض
مشعل نطّ ذيك النطه ورد بوله : هلا والله هلا
فدوى باحراج : هـ هــلا
مشعل بوله : اممممم هاو آر يو ؟
. : الحمد لله , شخبارك
يتبع ,,,
👇
اللهم لك الحمد حتى ترضى وإذا رضيت وبعد الرضى ,,, اضف تعليقك