بارت من
0

رواية أحلى صدفه في حياتي -13

! Fares AL MoHra ! ! Fares AL MoHra !
رواية أحلى صدفه في حياتي - غرام

 رواية أحلى صدفه في حياتي -13

اخر الصف كان فيصل وجنبه فجر بعدين نوف ومها وشجون ..عبير وريم والعنود والهنوف ورغد وجلس جنبها وليد وجنبه مشاري اللي ما علق على الموضوع وبعده ماجد وفواز وطلال وتركي وسليمان ونواف وسعود...
سعود: نواف شفت بناتهم..
نواف: ايه شفتهم يشقون الراس..
سعود: أي والله وخصوصا ذيك"يقصد شجون"
نواف: لا نا عاجبتني الثانيه"يقصد نوف"
سعود: حتى هذي ما عليها..
نواف: خلاص لف وجهك عيب تناظر بنات الناس..
سعود: ما اقدر جمالها ما يخليني..
نواف الحين اخليك تلف وجهك صح"ومسك وجهه ولفه"
سعود: كذا احسن..
تركي منقهر:شوف وجه النحس"يقصد وليد"
سليمان: وش فيه؟؟
تركي: اليوم فالها معاها..راكب السياره جنبها والحين بعد جالس جنبها وانا حتى في السوق ما عطتني وجه..
سليمان: صراحه مالها داعي يجلس جنبها..
تركي: دبرني وش اسوي..
سليمان: لاتسوي شي وطالع الفلم..
تركي: اووووف قهر والله قهر..
مشاري في نفسه"وانا ما جلست الا بين ذولي ياليتني جالس جنب هنوفتي ام الدلع والدلال وتخيل انها معاه وعااااش احلامه"
وليد: احم احم رغد..
رغد بدون ما تلف عليه: هلا..
وليد: حلو الفلم مو..؟؟
رغد: هو بدى عشان تقول حلو..
وليد كان يطالع رغد ولا يدري وين ربي حاطه فيه: صح هو ما بدى ..بس انا قد شفته..
رغد: صدق!!
وليد: والله..
رغد: طيب خلاص..
وليد: تبيني اقولك القصه..
رغد بدون نفس: الحين بشوفه ما يحتاج..
وليد: طيب مليت خلينا نسولف لما يبدى..
رغد: سولف وانا ماسكتك..
وليد: طيب عادي اسال..
رغد: أسأل..
وليد: لو كان خاص..
رغد خافت فا ضطرت تقول:لا..
وليد: طيب ما راح اسال..سولفي انتي عن الدراسه عن طموحك عن الجامعه عن أي شي..
رغد تحمست: عندك استعداد تسمع..
وليد انبسط: اكيد..
رغد: انا حلمي يكون عندي لغه وخصوصا انجليزي..
وليد باعجاب: حلو...
رغد ابتسمت: ايوه..واكون بعدين شي مثلا ادرس برا واخذ الماجستير والدكتوراه..واحقق كل طموحاتي..
وليد: والله مستقبل وقسم مضمون..
رغد: هذا اللي افكر فيه..
وليد بعفويه: والزوج..
رغد مستغربه: وش فيه الزواج..
وليد: ما راح يكون عائق على طموحك..
رغد: لالا اشرط اني اكمل دراستي وابغى زوجي يكون عون لي..
وليد: ايوه<<يبي يجرها بالحكي..
رغد: وبس..
وليد: وش مواصفات فارس احلامك..
رغد حست انها عطته وجه بزياده: اقول بدى الفلم ولا ..
وليد: الا بدى..

رغد: ابي اشوفه..
وليد: اوكيه بروح اجيب لك ولي بوب كورن واجي اوكيه..
رغد: اوكيه..."ولما بعّد"ياربيه انا وش قلت عنده..وش قعدت اقوله..كل ما قلت بابعد عنه القى نفسي اقرب اكثر..حرام ماودي اكسر في خاطره..
بعد دقايق جا وليد وجلس..
وليد: تفضلي يا احلى رغد احلى بوب كورن..
رغد: تسلم..وصارت تطالع الفلم ووليد يطالعها..
رغد ما تحملت اكثر ولفت عليه: وليد وش فيك تطالعني..
وليد ارتبك: ها لالا انا اطالع الفلم..
رغد: اها..وكملت مع الفلم لانه رومنسي وجنبها الهنوف متمسكين في بعض..
ريم: شوفي الرومنسيه مو انتي الله يخلف عليك..
العنود: انتي خلي طلال يعطيني وجه واصيراحسن من هذي..
ريم: نشوف مع اني اشك ان ابو طبيع ما يجوز عن طبعه..
العنود:تشوفين..
نوف ومها وشجون يبكون لان البطل ترك البطله..
نوف: ليش حرام عليه...
مها: حقير والله حقير..
شجون تشاهق من الصياح.:حرام والله ما تستاهل كل هذا يصير لها..
عبير: وبعدين عورتي راسي..احسن تستاهل من قال لها تحبه..
شجون:الحب غصب عن الواحد مو بإرادته..
عبير:ولو هي غلطانه..
شجون: انتي وش علمك في الرومنسيه..
عبير: وانتي وش علمك في الحب..
ريم: ما عليك منهم تعالي معنا سولفي..
عبير: تراني رومنسيه بس اكابر..
العنود: واضح من عيونك..الرومنسيه تشع لدرجه ان عيوني عورتني من اشعاعك..
عبير: تتنطزين..اصلا انتي وش علمك في الحب والرومنسيه..
العنود: اعصابك يا جولييت ..اللي يسمعك يقول عايشه قصت حب..
عبير: وليش لأ..
ريم: يعني صدق تحبين..
العنود: ما عليك منها..لو قالوا عبير تحب كان الحب نفسه انتحر..مات..اي شي بس عبير ما تحب..
عبير: مالت عليك..
&&
فيصل ماسك ايد فجر ولاهين يطالعون بعض ويتغزلون في بعض وما يدرون عن اللي حولهم ..
بعد ساعه خلص الفلم ..وعند باب السنيما..
نوف كانت جنب نواف..
نواف: لو سمحتي..
نوف: انا؟؟
نواف: ايوه انتي ..مو انتي اخت فواز وطلال..
نوف: ايوه..
نواف: انا صديقهم نواف..<<اعصابك..
نوف: تشرفنا.
نواف: انا لي الشرف والله..
نوف: تسلم..تامر شي..
نواف: لالا سلامتك بس حبيت اعرفك بنفسي..
نوف: هلا والله..
وليد ورغد طلعوا مع بعض وهم يسولفون..
وليد: ايوه اقول لك البطل نفسه عندي له فلم خيالي..
رغد: قل والله..امانه امانه وليد تعطينياه.
وليد: فداك..واجيبه لك براس الخدمه..
رغد: تسلم والله..
وليد: كل اللي تبينه من افلام عندي.
رغد: يبي لي يوم اجي عندكم وألطش لي كم واحد واوسع صدري عليهم..
وليد: ا نشا الله اذا رجعنا..
مشاري: وش عندكم..
رغد: وليد عنده كل الافلام اللي نزلت هالسنه..
مشاري:ما عليك منه سارقها مني..
وليد: كذاب اصلا لو يحلم ما عطيته..
مشاري: مالت عليك..
فواز: الحين وين راح ترحون..
البنات: البحر..
العيال: المول..
مشاري: اتفقوا على شي..
البنات: البحر..
العيال: المول..
مشاري: حلفوا بس..
العنود: انا اقول البحر احسن وبكره المول..
البنات: ايه..
العيال رضخوا لطلبات البنات ..وقرروا يمرون اهاليهم..
ورجعوا للفندق..وقبل لا يصلون..
ريم: العنود الخطه..
العنود: ايوه صح الحين نطبقها..
ريم: اوكي..

الجـــــــــزء السـابع والعشـــرون..
ريم: العنود الخطه..
العنود: ايوه صح الحين بنطبقها..
ريم: اوكيه..
العنود: تصدقين خفت يصير لك شي ويأنبني ضميري..
ريم: روحي فداك يا قلبي بس انتي قوي قلبك وعزمك بعد..وانتبهي لعمرك اوكي..
العنود: اوكي...
وصل الجمسين عند باب الفندق نزلوا العيال و البنات..
بعض البنات والعيال راحوا داخل الفندق يبلغون الامهات والابوان..
العنود: ريم يله تحركي..
ريم: خايفه..
العنود: تشهدي وروحي..
ريم: اشهد ان لا اله الا الله.."ومشت ووقفت في نص الشارع وغمضت عيونها...العنود كانت تراقب الوضع بدقه..جات سياره وصارت تضرب هرن لريم عشان توخر ..ريم ترتجف في مكانها....قربت السياره بسرعه متوسطه وهي ما زالت تضرب هرن..العيال والبنات انتبهوا لريم وصار الكل يصرخ انها تبعد وهي واقفه....قربت السياره وما بقى الا كم مترين وربطت فرامل وفي نفس اللحظه انطلق شخصين...الاول كانت العنود..والثاني كان سليمان..والسياره راطبه فرامل بس ما بعد وقفت قربت من ريم وما بينهم الا كم خطوه..في نفس اللحظه رمت العنود نفسها على ريم وتدحرجوا..سليمان الي ما امداه على ريم لان العنود سبقته..السياره اللي لحد الان ما وقفت صدمت سليمان ورمته على الارض بقوه ونزل منه الدم على وجه وثوبه ....
ريم فتحت عيونها وهي تتألم: آآآآه...خلاص..
العنود: أأأأأي.. خلاص..
ريم: طيب قومي عني..
وقامت العنود وريم..لفت ريم وشافت شخص مرمي على الارض والشله تركض لجهته..
ريم خافت ونغزها قلبها: مـ..مين هذا..؟؟؟
العنود مصدومه: ما ادري..انا شفت واحد من العيال يركض معاي بس ما ادري مين بالضبط..
ريم خنقتها العبره وصارت ترتجف وراح لون وجهها: شكل هذا ..."بعلت ريقها وقالت الاسم بصعوبه" سليمان..."لفت على العنود" ..بس ليش الدم عليه كذا..
العنود خافت منظر سليمان ما يطمن: قومي خلينا نروح نشوف..
ريم مشت بخطوات مهزوزه ..كل شي فيها متلخبط..افكارها خطواتها..توازنها اختل ومسكتها على طول العنود وسندتها عليها...
عند سليمان...
بعض العيال حوله ومها اخته من البنات..
مها تصارخ ودموعها سيل على خدودها: سليمان قوم واللي يعافيك قووم..
تركي طاح على ركبته وجلس جنبه ويهزه بخفيف: ابو سلوم...ابو سلوم وش فيك ..انا اخوك..رد علي واللي يخليك لا تصير ساكت كذا..ابو سلوم زعلان مني..ما تحب حركاتي..طيب خلاص بأعقل..بس انت رد علي...ابو سلوم لا تتركني كفايه ابوي واللي يعافيك..
والبقيه يحاولون يهدون تركي ومها لانهم منهارين..
ريم وهي تقرب من عند سليمان والعبره خانقتها: العنود ..سليمان وش فيه ما يرد على مها..
العنود: ان شا الله ما فيه شي..
ريم: العنود قولي الصدق ليش ما يرد "وصارت دموعها تنزل من دون أذن"
ووصلوا واخيرا عند سليمان..
ريم جلست تطالع سليمان من فوق لتحت وحطت ايدها على فمها وبعد لحظات لفت على طلال..
ريم: طلال وش فيه سليمان..
طلال يطالع العنود وبعدين طالعها: ما فيه الا العافيه بس انتي اهدي.
ريم تصارخ وتهز سليمان بقوه: سليمان واللي يعافيك قوم شوفني بخير ...سليمان رد علي طيب رد على مها..سليمااااان..
العنود شالت ريم: اذكري الله ما فيه شي...طلال وش تنطر وده المستشفى ما تشوف الرجال ينزف ..
طلال : صح المستشفى صح..
راح هو وماجد وشالوا سليمان وركبوه الجمس..
وجات رغد واخذت مها وريم معها العنود ودخلوهم داخل..
داخل الفندق..
ريم تصارخ وهي منهاره: انا ..انا السبب ..آآآآ يا سليمان حرام زهرة شبابك..
مها جنبها منهاره اكثر واكثر: آآآه يا اخوي لا تروح وتتركني ترى والله مالي غيرك.. لا تتركني مثل ابوي..
ريم صدمتها الكلمه ولفت على مها وزاد اللي فيها: شوفي شوفي يا رغد شوفي اخته انا انا اللي حرمتها منه انا...
رغد بحزم: ريم وش فيك ترى كلامك ماله داعي اذكري الله ا نشا الله الولد ما فيه شي.
ريم: انتي ما شفتي الدم اللي عليه وعلى ثوبه..يا قلبي عليك يا سليمان..
العنود بأنكسار: ريم هدي وسليمان ما فيه الا العافيه..
ريم: طيب ليش ما يرد علي..
رغد: يمكن مغمى عليه..
مها زاد صراخها: وين امي....ابي امـــــــــــــي..
نزلوا في نفس الوقت الحريم ومعهم باقي البنات والعيال..
ام سليمان نغزها قلبها: وش فيهم؟؟
مشاري: ما ادري بروح اشوفهم..
راح مشاري عند رغد
مشاري: وش فيكم..؟
رغد: سليمان سوى حادث ..صدمته سياره..
مشاري طير عيونه: وش تقولين وش تخربطين؟؟
رغد: مشاري..سليمان قبل شوي صار له الحادث..
ام سليمان سمعت السالفه وراحت عند بنتها..
ام سليمان وهي تحاول قد ما تقدر تثبت: مها يمه ليش تبكين..؟
مها: يمه اخوي...اخوي بيروح مني..
ام سليمان اخذت بنتها في حضنها ودمعتها في هدب عيونها: ما في الا العافيه..سليمان قوي وانا متاكده ما راح يصير له شي..
مها : ا نشا الله يا يمه ا نشا الله .."وحضنت امها بقوه"
ريم تطالع ام سليمان ومها ويزيد عندها تأنيب الضمير : العنود انا اللي خليت ام تفقد ولدها الوحيد وخليت اخت تفقد سندها الوحيد..آآآآه يا رب خذني ولا يصير في سليمان شي..
رغد صارت تبكي: ريم...شوفي امه اقوى منك..والله قطعتي قلبي..وبعدين قلت لك الصدمه خفيفه..
عبير: ريم خلاص يا قلبي والله الصدمه خفيفه..
وتجمعوا البنات بعضهم اللي يبكي وبعضهم تحكم في نفسه والثاني منهم يهدي نفسه واللي حوله..
العيال كلهم راحوا لعند سليمان بالمستشفى..وبعد ربع ساعه لحقوهم الرجال..
الحريم والبنات تجمعوا بسويت واحد ينطرون منهم رد...
مرت ربع ساعه...نص ساعه....ساعه....ساعه ونص..
ريم تهمس للعنود: العنود..غلطنا غلطه كبيره يا العنود..
العنود: ما فكرنا بكذا.
ريم: هذا اللي ياخذ المواضيع بضحك..."وخنقتها العبره"تخيلي صدق لو صار فيني او فيك شي..
العنود: تكفين يا ريم لا تزدين علي..
ريم لفت عليها: طيب تخيلي يصير في سليمان شي..."ونزلت دموعها"..والله ما ادري وش بيصير فيني...لا لا يارب لا يصير فيه شي..
بعـــد ربع ساعه..
ريم بدى القلق يصيطر عليها: رغد تاخروا مره اتصلي عليهم..والله خايفه..
رغد: بسم الله عليه..وان شا الله ما فيه الا الخير..
العنود: ريم قلبي ادعي ترى الدعا زين..
ريم: يا ليتني ما سويتها يا ليتني..
العنود: الحين يا ليت ما تنفع ..اللي ينفع يا رب..
ريم: يارب خذ روحي بس سليمان لا يصير فيه شي..
بعد ساعتين ونص بالضبط اتصل مشاري على موبايل رغد..
رغد خافت: هذا...هذا مشاري..
ريم بسرعه: ردي عليه....ولا اقول لا تردين اخاف يقول شي عن سليمان..
العنود: ردي عليه..اكيد يبي يطمنا عليه..
رغد: احم...الو...
مشاري: هلا..
رغد بتردد: مشاري ....بشر..
مشاري: لا الحمد لله جات سليمه..صار يتدلع..
رغد ارتسمت على وجهها ابتسامه عريضه: الله يبشرك بالخير ..طمنتنا الله يطمن قلبك..بس وش صار فيه..
مشاري يضحك وهو يطالع سليمان: ههههه قطو بسبع ارواح... ما فيه الا كسر في ايده اليمنى ورضوض بسطيه بجسمه..
رغد: ايه الحمد لله على سلامته..اوكيه باي..
مشاري: طمني الباقي ..باي..
ريم سمعت الحوار اللي دار بينهم بس تبي تتاكد: بشري..
رغد: لا الحمد لله ما فيه الا العافيه..وصار كسر بالايد..
ريم قامت تحضن رغد: قلبي كان بيوقف عليه...وش اسوي احبه"ضحكت من بين دموعها"
العنود قامت معاهم وضمتهم: الحمد لله على سلامته يا ريم..
ريم: الله يسلمك..تعالوا نبشر امه..
راحوا لام سليمان...
رغد: ابشرك خالتي..
ام سليمان: ولك البشاره..
رغد: سليمان طيب وما فيه الا العافيه..بس كسر بالايد..
ام سليمان قامت تحضن رغد: الله يبشرك بالخير مثل ما بشرتيني.
وبعدها راحت تحضن مها اللي صارت تبكي من الفرحه..
الكل تاثر وصاروا يبكون...والحريم يهدون فيهم..
ام مشاري: قرت عينك يا ام سليمان..
ام سليمان وهي مبتسمه: قرت عينك بشوفت نبيك..
ام ماجد..وام فيصل..وام فواز: قرت عينك يا ام سليمان..
ام سليمان: قرت عينكم بشوفت نبيكم..
&& &&

↔

في المــســتشـــفـــــى
بعد ما تطمنوا الرجال و تحمدوا له بالسلامه رجعوا للفندق..
طلال: لو شفت وجه تركي كان قلت ايه هذا الصديق ولا بلاش..بس صاير كانك حبيبته مو صديقه..
تركي وهو جالس جنب سليمان وماسك ايده وكأنه خايف لايروح منه..
تركي: صديقي اذا ما خفت عليه..اخاف عليك اجل..
سليمان يطالع تركي بنظرات امتنان: الله يخليك لي..
تركي: بس اللي تنرحم مها اختك..
سليمان: اعرف اختي حساسه..بس ما طمنتوني على ريم..
مشاري: تطمن الحمد لله بخير..
طلال بأعجاب شديد: بصراحه العنود رهبيه في هذي المواقف ..انا ما قدرت اتحرك ..مشا الله انت وهي تحركتوا في نفس الوقت..
سليمان: الله يسلمك..
مشاري: هذا العشم بسليمان..رجال راعي مواقف..
تركي: مواقف بفلوس ولا مجانا..ههههاي حلوه صح..
العيال: ههه بايخه..
تركي: مالت عليكم..
مشاري: مشا الله العنود راعية مواقف..مو هذي اول مره ..
وقاموا العيال يمدحونها ويتذكرون وش كانت تسوي..لانها صدق راعية مواقف وتعجبكم..
طلال كان يسمع كلامهم وكأنه اول مره يفتح عيونه عليها..اول مره يدري انها كذا وشخصيتها كذا...ومنبهر من اللي يقولونه ..وكل يوم عن يوم يكتشف شي جديد ويزيد اعجابه بشخصيتها..
&& &&
طلعوا العيال من المستشفى وخلصوا اجرات الخروج لسليمان..ورجعوا للفندق..
سلم على امه ومها اخته .وتحمدوا له بالسلامه والبنات يطالعون الموقف ويبكون..
شجون: حرام شوفي امه وباين خوفها عليه بس كانت تكابر..
نوف تشاهق من الصياح: حرام عليه خوفهم كذا..
عبير: سليمان شكله يكسر الخاطر..
العنود ساكته وما علقت على شي..
ريم تطالعه بحب وبأبتسامه شاقه الوجه و دمعة الفرح بعيونها..
رغد: الحمد لله اللي جمعهم مره ثانيه..
الهنوف تبكي: تصدقين خفت يصير فيه شي..واهله من بعده يضيعون..
رغد: وانتي صادقه..طاح قلبي عليهم..
&& &&
ارتاح سليمان كم ساعه وقرروا العوائل يكملون ما كانوا بادينه بأصرار من سليمان وام سليمان..
وتجهزوا لرحلة البحر...وانطلقوا..
وبعد حوالي ساعه مشوار وصلوا نزل الكل اغراضه..وفرش الحريم لهم فرشه..والبنات نفس الشي..
والرجال والعيال مع بعض....
البنات مسوين دائره ويلعبون لعبة الصراحه..
رغد: اسمعوا اللي تجيه راس العلبه تسأل والطرف الثاني تجواب اوكي..
البنات: اوكي..
لفت رغد العلبه..وطلع شجون تسأل نوف..
شجون: امممممم..نوف من اكثر وحده فينا تعجبك شخصيتها..
نوف: بصراحه ..رغد..لاني احس انها كبيره وعاقله وفي نفس الوقت صغيره ومهبوله..
رغد: تسليمن يا قلبي والله انتي احلاهم..
ولفت العلبه..وطلع الهنوف تسأل رغد..
الهنوف: رغود قلبي..
رغد: سمي..
الهنوف:سم الله عدوك.. ممكن يجي يوم وتتركيني فيه"وخنقتها العبره"
رغد: قامت تحضنها: بس اذا الموت خذاني يا بعد قلبي والله..
الهنوف: بسم الله عليك..
ريم: خلصونا بلا رومنسيات وخلونا نلعب..
رغد مسحت دموعها ولفت العلبه..العنود تسال عبير..
العنود: ايوه واخيرا طحتي في ايدي..
عبير: اخلصي يله اسالي..
العنود: عبير وبكل صراحه انتي تحبين احد من العيال..
عبير بحيا: ايوه..
البنات انصدموا ..وكل وحده تقلب في راسها مين ممكن يكون
العنود طيرت عيونها وعلامات الدهشه والتعجب فوق راسها:ميـــــــن؟؟؟
عبير: اللعبه سؤال واحد ولا انا غلطانه..
رغد: ايوه سؤال واحد...
ولفت العلبه والعنود لف الف سؤال وسؤال في راسها"معقوله"
مها: ريم ليش اليوم بكيتي على سليمان..
ريم: لاني احس اني انا السبب في اللي صار له..
مها: بس هذا السبب..
ريم: ايوه..
لفت رغد العلبه...
عبير: وانقلبت الايه..عنيد وانتي تحبين احد..
العنود بسرعه:لا...ما احب احد..
عبير: كذاااااااابه..
العنود تقلد عبير: اللعبه سؤال واحد ولا انا غلطانه..
البنات يضحكون..
ولفت رغد القاروره...
ريم : فجيـــر..
فجر : يمه خرعتيني<<تهوجس في فارس احلامها..
ريم: قولي لنا عن مشاعرك اول مع فيصل والحين مع التغيرات اللي حصلت..
فجر: حشى كل هذا سؤال..
ريم: احمدي ربك طلع كذا..ولا كان ودي اغطي كل ما اقدر من استفسارات..
فجر: طيب..اول سلمك الله فيصل في حياتي ماله وجود وماله اهميه..او بالاصح ما كنت اشوفه قدامي..
ريم:والحين؟؟
فجر: الحين صار دنيتي كلها..ما اتخيل لحظه ما اشوفه فيها او اسمع صوته فيها ..واذا ما حصلي كل هذا ..افكر فيه..
البنات يصفرون:ياهووووووووه على الرومنسيه..
فجر ميته حيا: خلاص لا تحرجوني..
رغد اخذت العلبه ولفتها..
رغد: اووه الحين دوري..طيب مهاوي وش شعورك يوم شفتي سليمان بعد ما طلع من المستشفى بالسلامه..
مها وعيونها مليانه دموع: يوم لقيته لقيت الامان..اللي كان بيضيع مني في لحظه..لقيت الاب والاخ والسند ..وكل شي بحياتي ..وخفت كثير من فكرة انه يتركني وحيده.."وبكت"
البنات تأثروا..
رغد: خلاص بنات..والله جايين نغير جو..
العنود تبي تغير السالفه: اقول بنات عندي لكم مغامره واكشنات..
البنات: نورينا..
العنود: وش رايكم نركب اللنش..
ريم: يقطعك على هالفكره..وشلون ما فكرنا فيها من قبل..
العنود: انا العنود يا حلو غير عن الكل فاهمه..
البنات: درينا انك غير "وضحكوا لان العنود رافعه ايدينها ومسويه حركة اصبعين حقت يوسف الثنيان"
رغد: يله نبلغ الامهات اول وبعدين العيال نروح لهم شخصيا..
البنات: يلا..
وراحوا عند الحريم..
ام مشاري: براحتكم..
ام فيصل: والله كيفكم..
ام تركي: انا اقول خلوها بكره في النهار احسن..
ام فواز: وانا راي من راي ام تركي..
الهنوف: ماما..البنات كلهم بيرحون الا انا..
فجر: اسمعي يمه..انا تزوجت والحين انا في عصمة رجلي مالي دخل فيكم..
نوف: لا والله يعني انا الوحيده اللي ما اركب ما علي منكم...
ام تركي تطالع ام فواز: هاه وش رايك..
ام فواز: في النهايه بنقول ايه فا خلينا نخلص ...يلا روحي..
الهنوف ونوف: هيّــــــا...
ام ماجد طبعا ما خذوا رايها لان عبير والعنود ما يحتاج رايهم من كيفهم..
راحوا البنات لعند الرجال....طالعوهم كلهم رجال وعيال الا شخص اللي هي لين جالسه بينهم..
نوف: شوفي اختك لا حيا ولا مستحى..
فجر: انا اصلا متبريه منها من زمان..ما اعرفها ولا تعرفني..
شجون: طيب عادي صغيره..
فجر: أي صغيره..باولى متوسط ..مهما كان على الاقل ماتجلس بينهم ..تجلس عند ابوي او مع مشعل لحاله مو حاشره عمرها مع العيال..
نوف: خليني اناديها نستفيد منها..
نوف قربت شوي: ليــون...ليـــون..
نواف لف وطالعها وابتسم ..نوف طالعته واستحت ونزلت عيونها..
وصلت لين...:مناديتني خير..
نوف: روحي نادي فواز ولا طلال بسرعه..
لين: طيب..."وراحت عند العيال"..طــــــــــــــــــــــلال..طــــــــــــ ـــــلال.
طلال: نعم نعم تراني جنبك ماله داعي الصراخ..
لين: البنات يبونك..
طلال ابتسم: البنات يبوني..
مشاري: وش عندهم البنات شكلهم سحبوا علي..
طلال: خلاص انت طاح كرتك..وجا كرتي..
وليد: قوم روح خلينا نشوف اخر مصايبهم الا وحده..
مشاري: انا امنيتي اعرف من هالوحده.
وليد: بعدين ا نشا الله تعرفها..
تركي: ما يصلح ينادوني..
سليمان: من زين الوجه ينادونك..
سعود: يا اخي احس ان بناتهم غريبين..
سليمان: كيف غريبين؟؟
نواف: صادق سعود..يعني في عاداتهم وتقاليدهم غير..
تركي: هذولي من القمر واحنا من الارض...يا اخي في شي اسمه اختلاف وجهات..هم يحبون يعيشون كذا ومتربين على كذا..انت وش عليك..
سعود: احس انهم متفتحين مره..
سليمان: لا مو مره بس شوي..المشكله انت واشكالك اللي ما تعودوا على الخير..
نواف: لا يا اللي عايش في باريس ولا لندن ..تراك في الرياض ويخب عليك..
سليمان: وافتخر اني من الرياض واهلها...
&& &&
طلال وصل لعند البنات...والبنات لفوا عليه بشكل دائري ..
طلال: وش ناوين عليه..ترى اهلي يبوني..
فجر: من زينك عشان اهلك يبونك..
طلال يطالع البنات..طالع عبير ووقف شوي بعدين كمل وشاف العنود ووقف وابتسم لها..
العنود خلاص بتموت من الفرحه وبصوت واطي: رويم .رويم..شفتي اللي شفته..
ريم: شفت..هذي يا حبيبتي بفضل الله ثم بفضلي وبفضل افكاري الاكثر من رائعه...
العنود: انا اصلا ما حبيتك الا عشان افكارك الاكثر من رائعه على قولتك..
طلال: الحين جايبيني تطالعون فيني..وش تبون.؟؟
رغد: شوف طلال ..بصراحه نبي ناخذ لنش الحين..
ريم: بليز طلال..
البنات: بليـــــــــــــــز..
طلال : انا موافق بس في شي...
البنات: ايش؟؟
طلال: في ثنتين ما قالوا بليز..
رغد: مين...
طلال: الخوات الكريمات عبير والعنود...
رغد: عبير قولي بليز وخلصينا..
عبير: ما ابي اقول.."طبعا معصبه لانها شافت طلال يبتسم للعنود ولاحظت ان العنود فرحانه على هالشي"
رغد: طيب ليش؟؟
عبير: خلاص هونت ما راح اروح..
طلال: ترى ما راح يروحون بدونك..
البنات: عبير يلا عاد.
عبير تطالع اشكالهم: هههه والله كأنكم شحذات عند مسجد..طيب خلاص..بليز طلال..
طلال: يله الثانيه..قولي..
العنود بفرح وخفه: بليز طلول...
ريم فقعت ضحك على العنود لانها ما صدقت على الله ولا طلول بعد..
طلال: وبعد يدلعوني من قدي..يله الحين موافق ..تجهزوا..
البنات: تسلم والله.
وراح طلال..
فجر: ما ادري وش عنده طلالوه يتدلع..
العنود: خليه يحق له..
فجر: لا والله مالت عليه..
راحوا البنات مع العيال ...
اللنش الاول ركب فيه البنات ومعاهم مشاري وماجد..
والثاني العيال كلهم الا سليمان كان تعبان وجلس عند الرجال..
وانطلق اللنش وكانت رحله بالمره ممتعه داخل البحر ولا بالليل مره وناسه..
البنات يغنون ويصفقون بقيادة اكيد الطقاقه العنود..
العنود: عزاه يا قلبي من الهـم عـزاه
من يواسي دمعتي قـال خيـره
و اشلـون خيـره بعـد فرقـاه
لا تقولو خيـره خيبـه كبيـره
البنات ماشين معها في الخط انواع الردح..
وبعد حوالي نص ساعه من الدوران في البحر..حامت كبد البنات وقرروا يرجعون..
ووصل لنش البنات نزل مشاري وماجد..ونزلت ريم وكان السلم شوي يخرع نزلته صعبه لانه عالي..
ونزلوا بعدها البنات واخر ثنتين رغد والهنوف....نزلت رغد وساعدها مشاري ..وجا دور الهنوف جات بتنزل بس خافت تطيح.شافت البنات بيرحون عنها فا خافت زياده...وقررت تنزل بسرعه وهي تنزل دخلت رجلها بين درجات السلم وطاحت على قدااام بس مشاري على طول مسكها وطاحت في حضنه وتعقلت في رقبته..
مشاري ما يحتاج اقول لكم شعوره والهنوف في حضنه ولا ومتمسكه فيه بضمير شاق الخشه لابعد درجه...قام مسكها من خصرها ورفعها شوي عشان تطلع رجلها وطلعت بس الهنوف ما زالت متعلقه فيه...
البنات فاقعين ضحك على الهنوف..
ريم: الهنوف خلاص فكي رقبة اخوي عورتيه..
العنود بصوت عالي: شكل البنت مبسوطه..
الهنوف ما فكت مشاري خايفه من الفشيله وما تبي تشوف وجهه وفي نفس الوقت من داخل مبسوطه..
رغد حست بصديقتها فا راحت لمشاري وفكت ايدين الهنوف..الهنوف على طول ضمت رغد وخبت وجهها ما تبي تشوف احد..وراحوا البنات...
مشاري يطالع جسمه"انا الهنوف كانت في حضني قبل خمس دقايق من يصدق..خلاص انا ما اقدر اصبر خاطبها خاطبها.."
ماجد: مشا الله وش هالوناسه اللي انت عايشها..البنات في حضنك..
مشاري: اصلا البنات يموتون علي بس انا ما اعطيهم وجه..
ماجد: ايه واضح لان من شوي تقول في حضنك مليار دولار مو بنت..فاتح فمه ومبسوط..
مشاري: انت وش يفهمك ..امش بس..
ولنش العيال فلوها وقعدوا حوالي الساعه وهم انواع الاستهبال الاستعراض..
&& &&
الهنوف تبكي: والله فشله وموقفي بايخ وسخيف..
رغد تهديها: عادي عادي زوج المستقبل حلال عليه..
الهنوف ضربت رغد: انقلعي اتكلم جد..تمزح معاي..
رغد: اأأأأأي..وانا وش قلت..قلت زوج المستقبل يعني اتكلم في موضوع جدي..
الهنوف ابتسمت: طيب خلاص سكري الموضوع..
رغد: يمه منك..لهدرجه تحبين اخوي ..
الهنوف استحت: رغــــــــــد..صدق انك سخيفه..
رغد: هههه خلاص بأسكت..
جات عبير والعنود وريم..
ريم: وش عندك من شوي في حضن اخوي..ضايع لك شي..
الهنوف: ريم وربي مالي خلق لك..
العنود: لا والله نشوفك فالتها مع ولد عمي واسكت..انا أولى منك..
عبير: لا يا قلبي انا الكبيره انا أولى..
العنود: يا ربيه ما حلى هالمشاري الا يوم قلت اني ابيه..انتي كل شي لازم تشاركيني فيه..
عبير: عادي اختي..وبعدين انا الكبيره احترميني واحترمي قرارتي..
رغد: ما تملون هواش..24 ساعه هواش..خلاص راسي صدع منكم..
العنود: هذي غبيه وش يفهمها..
ريم: اقول بنات جوعانه متى يجي العشا..
عبير: اليوم عشانا دجاج مشوي..
ريم: الله فله من راح يسويه..
العنود: حبيبتي الرجال راح يسونه لا شغله ولا مشغله.
رغد: خلونا نروح نفلها معاهم و نساعدهم..
البنات: اوكيه..
ما راح كل البنات..راح بس رغد وريم والعنود وعبير والهنوف بعد اقناع صعب..
راحوا لعندهم وشافوا ارجال غاصبين العيال على الشغل..
ابو مشاري: وليد قم شفه استوى ولا لأ..
وليد :ابشر..
قام وليد وشافه: عمي ما ادري ..تعال شوفه..
ابو مشاري: عيال ما منهم لا شفع ولا نفع"وقام"..شوف اذا صار لونه مثل هذا يطلع استوى فهمت..
وليد: ان شالله..
ابو ماجد: مشاري تبل الدجاج زين هاه..
مشاري: ا نشا الله...اووف وش هالقرف اللي عايشينه هالحريم..
طلال: عادي يا ابن الحلال...عشان تطبخ عن زوجتك..
مشاري: والله تستاهل..
طلال: من الحين وهي مسيطيره عليك..
مشاري: حلال عليها..
طلال: لا شكلك رايح فيها..من هي اعرفها..
مشاري: انقلع بس..بعدين تعرفها...
ووقربوا البنات بالمرره..
ريم: الله ريحته حلوه..
العنود: جعت زياده..
عبير: خلونا نساعدهم حرام اشكالهم متوهقين..
رغد: صح ان ما عندنا خلفيه عن الموضوع بس احسن منهم..
الهنوف: والله مستحيه خلوني ارجع..
رغد: امشي واللي يعافيك....
ووصلوا عند فرشة الرجـــــــــــــــال..
@@
الجــــــــــــــــزء الثامـــــــــن والعشـــــــرون...
ووصلوا عند فرشة الرجــــــــــــال....
ابو مشاري: هلا والله ببناتي...
البنات: هلا فيك..
ابو ماجد وابو فيصل: هلا بالوجيه السفره ...اجلسوا..
ابو فواز: وين الباقي.؟؟
رغد: ماجوا عند الحريم..
ابو فواز: براحتهم...اجلسوا..
كان فيه عيال على طرف الفرشه..
ابوماجد: فواز واللي معه..قوموا جلسوا هناك خلو البنات يجلسون..
فواز: بعد ..حتى هنا لاحقينا...
طلال: يبه خلوهم يجون يساعدونا..
ابو فواز: هم كفايه عليهم شغل البيت.انت خلك بشغلك وانت ساكت..
سليمان: يا ويل قلبي..شوف ريم كيف طالعه اليوم حلوه بس مفروض تتلثم...
تركي: ولا رغد تشق الراس شق..
رغد: لا عمي عادي نقوم نساعدهم..اصلا احنا ما جينا الا عشان نساعدكم...
ابو مشاري: والله فيكم الخير..بناتي اعرفهم سنعات ورعيات واجب..
فيصل: ايه واضح..
قاموا البنات وراحوا عند مشاري..
مشاري جالس على كرسي طويــــــل بمالره وجنبه طلال وبعيد شوي سليمان وتركي وقدام الكرسي فيه طاوله وعليها الاغراض..
وليد بعيد شوي عند موقد الشوي ..
فيصل قرب من عندهم: الحين وين فجر..ليش ما جات..
ريم: فجر يقال انها مستحيه..
فيصل: هين اوريها...
رغد: يا عمري يا مشاري متوهق قوم خليني ادبرك..
مشاري: تعالي اجلسي جنبي عشان الشياب ما يفجرون فيني..
طلال: وانا من بيساعدني..
ريم: اذا تفكر اني اساعدك انسى..
طلال: العنود تكفين ساعديني..
العنود في نفسها"ما يحتاج كل هالموال..انت بس قول العنود وانا براس الخدمه"....:اوكيه ابعد شوي..
وجلست جنبه..
طلال: الله يسلمك..تعالي شوفي..سوي كذا وبعدين كذا<<ترى ما عندي أي خلفيه..يعني ربة بيت فاشله..
عبير: اجل انا بروح اشوف وليد واساعده..
الهنوف: وانا وش اسوي..
جا عندها تركي : وش جابك انتي هنا.كله رجال..
الهنوف: رغد هي اللي جابتني..
تركي ابتسم: اذا كان رغد خلاص اقعدي بس اخر مره..
وجلس على الفرشه قبال رغد ومشاري..
الهنوف جلست جنب رغد..
مشاري: الهنوف كيفك..
الهنوف تذكرت الموقف وخنقتها العبره...
رغد: مشاري اسكت عنها..ترها مفتشله من بعد الموقف اللي من شوي..
مشاري: اسف يا الهنوف...
الهنوف: ما يحتاج تعتذر انا اللي مفروض اعتذر منك...
مشاري: عادي اعتبريني مثل اخوك..
الهنوف: اصلا انا ما اعتبرك الا اخوي...
رغد اللي في الوسط: يمه منكم..
مشاري: وش فيك؟؟
رغد: على الدجاج اقول يمه منكم..
مشاري: انهبلتي..
رغد: تقريبا..
***
طلال: اقول العنود..
العنود: سم..امـــر..
طلال : ما يامر عيلك ظالم..بس كنت ابي اقول لك شي..
العنود: خذ راحتك...تفضل.
طلال: انا....انا...اسف لاني ما ادري وشلون كنت اعاملك قبل..وبصراحه كنت ماخذ عنك فكره غلط..
العنود ابتسمت: ادري ما يحتاج تقول..واسفك مقبول..وبعدين فكنا من الماضي الحين..احنا عيال الحاضر..
طلال فرح من قلب: ههههه والله انك شي...طيب وش رايك نتعرف من جديد يله تكلمي عن نفسك..
العنود: انا بثاني ثانوي..مواهبي متعدده وكثيره ..واغلبها ما اقدر اصرح فيها.وافكار كثيره وان شا الله قدر احققها وبس...يله الحين انت تكلم عن نفسك شوي..
طلال: انا ادرس بالجامعه..والاكيد بعد التخرج بأشتغل مع الوالد في الشركه.
العنود: اها...ما تلاحظ ما كنا عيال عم..
طلال: عادي نسولف..
ريم جلست بين العنود وسليمان..
سليمان قرب منها شوي..
سليمان: هلا والله وغلا..
ريم: يمه خرعتني..
سليمان: بسم الله عليك..
ريم ابتسمت: الهه يسلمك..
سليمان: وينك من زمان عنك..؟؟
ريم: بعد كسرت ايدك مالي وجه..
سليمان: افا..انا كلي فداك...
ريم استحت: تسلم..بس جد اليوم خفت عليك.طيحت قلبي..
سليمان: بس مو اكثر منك يوم تجيك السياره وما تحركتي..وش عندك في نص الشارع..
ريم توهقت: تصدق ما ادري وش فيني..كنت راح اقطع الشارع ابي المحل اللي في الشارع الثاني...بس يوم جات السياره وقفت في مكاني ما قدرت اتحرك..اطالعها وخايفه و رجولي ما رضت تتحرك..يمه كان موقف مره يخوف<<ويييييي طاع انواع الصواريخ..
سليمان: تصدقين لو صار فيك شي انا راح اموت بعدك على طول..
ريم: بسم الله علينا فكنا من سيرة الموت ترى ما احبها..
سليمان: تخافين علي..
ريم: اكيـــــد اخاف عليك"وبحيا قالت" وانت..؟؟
سليمان بصوته العذب: لو تنغزك بس شوكه انا اموووت مليون موته قبل لا تألمك..
ريم: هههه والله وصرت شاعر..
سليمان: عشانك اصير شاعر..
ريم : تسلم والله..هاه كيف تقديمك في الاختبارات..
سليمان: حلو...بس تكفين لا تذكريني بالهم..
ريم: بسم الله عليك من الهم ..
سليمان: ههههههه تبين تذبحيني...تبين تجلطيني..تراني ما اتحمل احد يدلعنبي..
ريم: هههه خلاص بأسكت..
سليمان بتردد: ريم................تحبيني...؟؟
ريم حمر خدوها وودها تقول اموت فيك ولا اقدر اعيش بدونك بس ما تقدر..
ريم: اكيد احبك....حالك حال مشاري..
سليمان: وانتي مصره على مشاري..غيري شوي..
ريم: تبي ولا كيفك..
سليمان: لالا راضي والله راضي..
ريم: هههه يا حليلك..
سليمان: لا تقولين يا حليلك..ترى انا مثلك..
ريم: اجل وش تبيني اقول..
سليمان: قولي اموت فيك..
ريم: في الحلم يا بابا..
سليمان: اجل دايم احلم فيها..
ريم: يعني تحلم فيني..
سليمان بنص ابتسامه تذوب: ايه مثل اختي مها..
ريم: يعني وحده بوحده..
سليمان: والبادي اظلم..
ريم قعدت تطالع سليمان بكل ما فيه..بعدين طاحت عينها على ايده..
ريم: ايدك تألمك..
سليمان: من يوم شفتك طابت..
ريم: لالا صدق سلوم ايدك تألمك..
سليمان: شوي..
ريم: تصدق جاتني فكره بأسويها ..لحظه شوي..
وراحت عند ابوها واخذت منه شي ورجعت..
سليمان: وين رحتي..
ريم: هات ايدك..
سليمان: وش تين فيها..
ريم: بأكلها...هاتها..
سليمان طلع ايده من ربطة الايد ومدها: خذيها واذا تبني انا كلي حاضر..
ريم ضربته وجهها احمر: بس ولا كلمه..
سليمان: ا نشا الله ابله رورو..
ضحكوا لانهم تذكروا ايام اول...
ريم: تصدق ايام حلوه..
سليمان: لانك فيها..هاه وش تبين في ايدي..
ريم: بأكتب ذكريات..
سليمان: يله..
ريم: وش اكتب .وش اكتب...ايوه...بس ما ابيك تشوف..
سليمان: طيب انا راح اغمض..
غمض عيونه وبطراف اصابعه مسك ايد ريم القربيه من اصابعه..
ريم طالعته وضحكت وما قالت له شي..
سليمان"الله يستر شكل ايدي الثانيه بتنكسر على الحركه اللي سويتها..بس خليني احلل الدقايق اللي اجلسها معها شوي..."
****
رغد بعد ما تبلت الدجاج قامت توديه عند وليد وعبير عشان يشوونه..
رغد: تفضلوا..
وليد: تسليمن..رغود تعالي شوفي الدجاج استوى..
رغد قربت من عند وليد لحد ما لزقت فيه بالضبط وهي ما حست بعمرها.وليد يطالعها بنظرات كلها حب وهيمان..
رغد: اتوقع هذي لا بس هذي ايه استوت..
ورفعت عينها وانصدمت من قربها ومن نظراته..
وليد بهمس: رغد..
رغد بعدت شوي ونزلت عيونها عنه: نعم..
وليد: لو اقولك كلمه بتصدقيني..
رغد: قول..
وليد: انا....انا أحبــــــــــــــــك..
رغد بسرعه رفعت عينها عليه..حست بمشاعر غريبه وكأن اعصار قاعد يهاجم قلبها الضعيف..تحس بحرارة عيونه وكأنها لهيب تستنى كلمه منها كلمه تطفيه...والكلمه اللي قالها كأنها فيضان اغرق كل ما كانت تفكر فيه..
وليد: وانتي يا رغد......؟؟
رغد الصمت نزل عليها والحروف ضاعت منها:...
وليد بحب وابتسامه: معليش راح اخذ الجواب منك في يوم ثاني...
$$$
في خاطري لك شي وودي اقوله..
مدري تصدقني او تقول كذااااب..
قلبي يحسك دايم الدوم حوله..
مع كل دقه يذكرك يا اغلى الاحباب.
تدري عليك الروح بالحيل تولــه..
وتدري بعد طيفك عن العين ما غاب..
انت الغلا بالكون عرضه وطوله..
وانت الحبيب الي بك الظن ما خاب..
فيك الحلا والزين كامل شموله..
دمك..وعيونك..والبها فيك جذاب..
هذا اللي كان بخاطري بقوله..
قلت وزاح الهم في صدري وذاب...
$$$
رجعت رغد مكانها وهي مصدومه وش اقول له..وايش اقول لعمري وش اقول للكل....خلاص افاكرها اتعبتها وخنقتها العبره وقامت..
ومشت متجهه لجهة الحريم...
تركي اللي كان مراقب الوضع لحق رغد بدون محد يحس فيه..
وتقربيا بعيد عن الحريم والرجال يعني في الوسط..
رغد كانت تركض ودموعها اسرع منها..
تركي صرخ: رغــــــــد..
رغد وقفت...
تركي قرب من عند رغد ومسكها من كتوفها ولفها لجهته:رغد..
رغد منزله راسها تخفي دموعها..
تركي رفع راسها وطالع عيونها: رغد انا ما ابي اشوف دموعك ابد...اذا نزلت دموعك تعورين قلبي..واصلا ليش الدموع..
رغد طالعته وبعدين نزلت عيونها مره ثانيه ما تدري وش تقول له بعد..
تركي: رغد انا ما ادري وش بينك وبين وليد..لكن يهمني اللي بيني وبينك........رغد انا احبك ...واموت فيك ولا اتخيل نفسي اعيش لحظه بدونك..
رغد رجعت تبكي" وهذا اللي ذابحني وهذا اللي ذابحني..انت تحبني ووليد ما اقدر اكسر فيه"
تركي: صدقيني يا رغد وصدقي كل كلمه اقولها.. وودي اقول لك شي تراني اغار عليك من وليد..ما ادري ليش احس اني انقهر منه وما ابغاك تكلمينه..فا اتمنى اني ما عاد اشوفك معاه..اوكيه حبيبتي..
رغد جات حبيتي مثل السكين على قلبها..
ومشت عنه وراحت"يا ربي ليش انا..ليش انا احتار بين اثنين..تركي ووليد..تركي احس اني اميل له..وليد ما اقدراجرحه ..يارب ساعدني ..ابي حل والله تعبت وماعاد فيني اتحمل"
&& &&
مشاري: وش فيها رغد..
الهنوف: علمي علمك..

طلال: واقول لك..ذاك اليوم جاتني بنت تتمليح..وانا كاتم ضحكتي لان شكلها تقولين مهرج..
العنود مولعه ومن بين اسنانها:لااااااااااااااااااا..
طلال: والله..المهم قالت لي لو سمحت..قلت انا نعم..قالت ممكن الرقم...تدوريني ما تلقيني فقعت ضحك..قالت وش فيك تضحك مستغرب عشان وحده حلوه عطتك وجه..قلت لها لا والله مستغرب وشلون القرد انحاش من القفص ههههههههه وهجت ولا عاد شفتها مره ثانيه..
العنود ومعها سكنيه وتغرزها داخل الدجاج:صدق بنات ما يستحون على وجيهم..
طلال: والله عندي قصص كثيره..اذا عندك وقت قلتها لك..
العنود بتولع الحين: عندي وقت بس غير الموضوع..
طلال: لالا هالموضوع يجنن على قولتك ..اسمعي هالسالفه..مره كنا بمجمع وكان السكيورتي واقف ما رضى يدخلنا..المهم احنا وقفنا برى شوي.. جتنا بنت قالت تبوني ادخلكم قلت انا وخويي اكيد قالت ابغى المزيون يعطيني رقمه طبعا اللي هو انا..قلت لها خلاص اوكي..
العنود ميته قهر: هي حلوه..
طلال: الصراحه عيونها تذبح ..المهم اكمل لك..دخلتنا والسكيورتي كان بيتكلم بس عطيته نظره وسكت..ودخلنا..قلت لها مشكوره اختي وما قصرتي وجزاك الله خير الله يغفر لك..طبعا استهبل عليها هي انصدمت بعدين قالت لي الرقم.. قلت انا مريني بكره ورحت وخليتها ههههههههه وش رايك..
العنود: رهيب بصراحه رهيب..شوف طلال نصيحه مني كا بنت لا تعطي البنات وجه..
طلال: شوفي انا على حسب مزاجي..
العنود انقهرت منه: انت وذا المزاج..اقول لك لا تعطيهم وجه تراهم غثى وبعدين عشان زوجتك حرام عليك..
طلال: اذا تزوجت عقلت..
العنود استغلت الفرصه: وانت تفكر بالزواج الحين ولا بعدين..
طلال: والله ما ادري وش الظروف وبعدين انا نفسي محتار بين امرين..
العنود تحمست: اللي هم..
طلال: شي خاص ما يصلح اقوله..
العنود تفشلت: طيب لا تقول..
طلال وهو منزل راسه ويطالع الارض ووده يعرف: وانتي لو جا احد وخطبك بتوافقين..
العنود تطالعه تبي تفهم له قصد من هالسؤال ووش قصده بس ما عطاها مجال:على حسب..
طلال: كيف على حسب..
العنود: على حسب الشخص..
طلال: اهاااا..
***
ريم مسكت ايد سليمان وصارت تكتب..
يا زهور الورد مع قطرات الندى..
يا ضيا الشمس في وقت الشروق..
يا قمر ليل بنوره يهتدى..
ارفق بقلب على شوفك شفوق..
ما هدا فكري وبالي ما هدا..
عيا قلبي يا حبيبي لا يروق..
لا تخليني عساني لك فدا..
لاجل غيرك على الخاطر ما يلوق..
......
حياتي بعد عمري لو صار ما صار..
انا للعهد والميثاق حافظه والله الدراي..
اعيش وحبك الجاري بدمي يبعث التذكار..
لعين اللي تشوفك طيف مر بليله الساري...
........
ابو سلوم لا تنسى دايما وابدا معاك رورو...اذا احتجت شي.. وكل ما شفت ايدك تذكرني بس لا تقول هي السبب قول عشانها اوكي...
وبــــــــــس....
.......
ريم: يله افتح عيونك..
فتح سليمان والتقت العيون...اللي كلها حب مفعم بالشوق..ريم ابعدت عينها عنه..
سليمان: هاه وش كتبتي..
ريم: لا تقراها لما اروح سامع..
سليمان: طيب ليش ما تقرينه لي انتي..
ريم بحيا: لالا انا ابيك انت تقراه..وبعدين بروح ..رغد مدري وش فيها..ما ادري وش قال لها ثقيل الدم وليدوه..
سليمان: اوكيه..
ريم قامت: يله باي..
سليمان: باي..
ريم: العنود تراني رايحه..وانتي يا الهنوف تراني بروح..
الهنوف: اوكيه انا جايه...يلا باي مشاري..
مشاري: ليش تروحين تو الناس..
الهنوف: ما عليش...باي..
العنود لريم: ليه وش عندك..
ريم: خلاص مشينا .ما مليتي من رمز الشقا طلال..
طلال: انا رمز الشقا..يا رمز الفقر والنحس..
ريم: احسن من وجهك..
العنود: ريم طلال خلاص..يله انا رايحه..
طلال: اقعدي ما بعد خلصت سوالف..
العنود في نفسها"اقعد عشان الهم"..:لالالا انا رايحه..
طلال: اوكي باي..
االعنود: باي...عبير تجين معانا..
عبير: اوكيه شوي و جايه..
راحوا البنات...وبعد ربع ساعه قررت عبير تروح..
مشت عبير لما بعدت عن الر جال ..لحقها طلال وسوى نفسه ما يدري ووقف قبالها..
عبير لفت يمين..لف يمين..لفت يسار..لف معها يسار..
عبير زعلانه: وبعدين..
طلال: ولا قبلين..عبير وش فيك متغيره هالايام..
عبير: انا؟؟....ما فيني شي..
طلال: لا صدق متغيره..اعتبريني اخوك وفضفضي لي ..مثلا البنات قايلين لك شي..متهاوشه معاهم..؟؟
عبير:لا....
طلال: اجل ليش تغيرتي..ما انتي مثل اول راعية حركات واستهبلات ودايم تضحكين...وش فيك؟؟
عبير: دوام الحال من المحال..
طلال استسلم: براحتك..بس اذا حبيتي تتكلمين اخوك طلال موجود..
عبير: تسلم..
وراحت..
عبير في نفسها" يا ربيه ليش اعامله كذا..يعني عشان العنود...العنود من زمان مع الكل والجميع..اجل ليش شاكه فيها..ما ادري بصراحه ..احس طلال تغيرت نظرته للعنود صار يطالعها باهتمام..بس ليش؟؟...و اللي ماني قادره افهمه انه حتى يهتم فيني..بصراحه حيرتني يا طلال..فتره حسيت انك تحبني..وفتره احس انك تحب اختي...لا تحيرنا يا طلال..لا تحيرنا..."
&& &&
خلونا نشوف اشخاص من زمان ما شفناهم او سمعنا اخبارهم...
لين: شعول..
مشعل: هلا..
لين: ليش انت متغير علي..؟
مشعل: لانك ما تفهمين..اقول لك ما يصلح تجلسين معاي 24 ساعه..اجلسي معاي اذا جاو البنات بس.خليني اجلس مع العيال شوي..فهمتي علي..
لين: بس انا ما احب اجلس مع احد غيرك..
مشعل: حتى انا يا قلبي..بس ما يصلح نجلس مع بعض دايم حتى خواتك يقولونه..
لين:طيب اذا سويت اللي قلته ما راح تزعل علي..
مشعل: ابدا.. بالعكس اشتاق لك..
لين: اوكيه خلاص ..باي..
مشعل: باي..
وراحت....
مشعل: اووف صدق صايره تطفش الواحد..
محمد: حرام عليك لا تقسى عليها مره..
مشعل: ماودي اقسى عليها بس هي اللي تجبرني على كذا..
محمد: تعال نلعب بلاي ستيشن محمول..
مشعل: يله ولأول مره بدون لين..
محمد: هههههههههه...
&& &&
عند البنـــــــــــــات...
ريم: رغد وش فيك..؟؟
رغد: محتاره يا ريم وراسي بينفجر من التفكير..
ريم: في ايش؟؟
رغد: خلينا نقوم نتمشى شوي..
ريم: يله..
وهم يتمشون على اطراف البحر والمويه تداعب اقدامهم..
رغد: ريم...اليوم وليد قالي كلمه خلتني اثبت في مكاني..
ريم: وش قال..؟؟
رغد: ريم .وليد قالي ...احبــــــك..
ريم انصدمت: قولي والله ما اصدق..
رغد: واللــــــه..
ريم: بصراحه كلنا ندري انه يحبك بس ما توقعت انه يقولها لك..
رغد: ولا يسألني انا وش أكن له من مشاعر..
ريم: ايوه وش قلتي..؟
رغد بقلة حيله: سكت ما قلت له شي..
ريم: ليش ما قلتي انك شخص عادي او أي شي..
رغد: انربط لساني ما قدرت اقول له شي...وبعدين رحمته ما ودي اكسر خاطره..
ريم: يا عمري يا سليمان كل ما قالي كلمه قلت له انت مثل مشاري..
رغد: ماشا الله عليك ..بس المصيبه مو هنا..
ريم:اجل وش بعد..
رغد: المصيبه ان بعدها على طول..تركي لحقني وقالي احبك واموت فيك وما اقدر اعيش بدونك..
ريم رحمت اختها.: وش قلتي له..
رغد: سكت وش اقوله بعد..
ريم : يا حرام والله انك مسكينه..وش بتسوين..
رغد: ما تشوفين راسي بينفجر ما ادري وش اسوي..
ريم: طيب انتي من تحبين..؟
رغد: شوفي انا بقولك وبكل صراحه...انا احس اني اميل لتركي..بس في نفس الوقت ارحم وليد ودايم اتخيل لو اني في مكانه وش بيكون مصيري..
ريم: بصراحه مشكله..بس انتي بتختارين تركي..
رغد بتعب: ما ادري يا ريم ما ادري..
ريم: بس لازم تحددين مصيرك..يا وليد..يا تركي..
رغد: العقل والقلب بيختار تركي والقلب يختار وليد..
ريم: خلاص واضحه..انتي تحبين تركي..اختاريه .انحلت..
رغد: طيب افرضي اخترت تركي وش اقول لوليد..
ريم: لا تقولين له شي ..ما لك الا انك تتجنبينه..
رغد: بس حرام لازم اقوله عشان ينساني ويدور غيري..فهمتي علي..
ريم: حيرتيني معاك.خليه بعدين يمكن يصير شي جديد ما تدرين..
رغد تبي تنسى شوي..ابتسمت: كيف سليمان..؟
ريم: سليمان يا حبي له ..يهبل يا حلوه ويا حلو كلامه..
رغد: هههه طيب واخبار عنيد وش عندها هالايام تقعد مع طلالوه رمز الشقا..
ريم تسوي نفسها ما تدري: بصراحه اشك ان العنود تحب طلال بس لاتقولين لأحد..
رغد فاهمه عليها:ريم اختي اعرفك..العنود قايله لك انها تحب طلال بس على بالك بتخلينه سر.تراه واضح..
ريم:هههههه طيب واضح عليها..
رغد: هو واضح بس محد راح ينتبه..
ريم: واذا قلت لك اني اشك ان عبير تحب طلال..
رغد: ما ادري ...عبير تحب احد بس مين ما ادري..
ريم: لازم نراقب حركاتها عشان نعرف..
رغد: صح..طيب افرضي ان عبير والعنود صاروا يحبون نفس الشخص..
ريم: احس بتصير الحرب العالميه الثالثه .اذا هم على كل شي يتهاوشون ..وشلون عاد على حبيب..
رغد: لالالا الله لا يقوله ..ترى هذي مشاعر حرام اختين يحبون نفس الشخص..
ريم: صادقه..تخيلي انا وياك نحب سليمان..
رغد: كان انا اخذته..
ريم عصبت: مسكينه ..اصلا حاولي تقربين لمه..
رغد: تتخيل وتعصب علي..طيب انتي اللي قلتي تخيلي وانا تخيلت..
ريم: غلطتي..مفروض ما اخليك تفكرين فيه..
رغد: من زينه..يله بس خلينا نرجع نتعشا تراني ميته جوع..
ريم: وانا اكثر منك...يله..
وراحوا وتعشوا....
وبعدها رجعوا للفندق..
وراح الكل لسويته والبنات لسويتهم والعيال نفس الشي..
العنود منسدحه وجنبها ريم..
العنود: قهرني يا ريم..تخيلي يقول لي مغامراته..
ريم: ههههه خليه يوسع صدره..

يتبع ,,,,

👇👇👇
! Fares AL MoHra !
! Fares AL MoHra !

روايات ممتعة

تعليقات
إرسال تعليق

اللهم لك الحمد حتى ترضى وإذا رضيت وبعد الرضى ,,, اضف تعليقك