رواية أبوي وهو أبوي لو صد عني ماترجيته -9
مها : يالله صكري وصلت الشقه ..؟؟عليا: مشكوره خليتني ارمس فارس بحجة اوراق واجباتج ...
مها: زين زين اقولج ما ابا حد يعرف اني رايحه شقة فارس ..ابا اتطمش لـ نوره اكيد جسمها متكسر ..ههههه خبرت عليها فارس و هو حرج مدري شو صار من بينهم ..؟؟
عليا: زين بتتاخرين ع دوامج..
مها: ابرايه الا هي ربع ساعه بروح اتطمش لحرمة اخوي ..وين قالج الاوراق موجوده ..؟؟
عليا : مدري قال بخبر نوره وين بحطها ...
مها : زين يالله ادعي لناا
عليا: هههههههههه مع السلامه ..
مها: فيمان الله ..
دقت باب الشقه كذا مره ما فتحت ..شو السالفه وينها !! معقوله ظاهره مكان بها
الوقت ..طلعت مفتاح الشقه الي عندي و فجيت الباب ..كانت ريحة الشقه دخون
...
طاحت اعيوني ع ورقة موجوده ع الطاولة الطعام ..عقدت حياتي معقوله فارس حط
ورقة واجباتي هني !! و ليش مربعنها جي ..
زقرت : نوره ...؟؟
ماشي رد ...؟؟؟
هزيت جتفي و شلت الورقه من ع الطاوله ...طلعت من الشقه ..و قفلتها ..فجيت
الورقه اشيك ع الواجب ...بس شي ثاني مكتوب شو الي قاعد يصير يعني نوره راحت
الضاحيه !! مينونه هذي ..
.ابتسمت .. و شقيت الورقه و عقيدتها باقرب زباله و فارس شدراه .زين يت منهاا
و فرت علي و على عليااا.و طلعت من البنايه ...اتصلت ابفارس
مها: فارس محد فتح لي باب الشقه ...؟؟
فارس : و الله يمكن نوره رقدت
مها: و الحينه شو بسوي برسب بسببك ..
فارس : هههههههه لا ما بترسبين ..انا بروح الشقه و بيبها لج ...
مها : امممممممم تدري خلاص بعتذر من الاستاذ باجر باخذها مب مشكله ولا اتعب
روحك ..
فارس: اكيد..
مها: هي اكيد "بس ما ابا يكتشف ان نوره طلعت من الشقه ابسرعه ..خلها تبعد
اكثر و اكثر .."
**
نزلت من التاكسي ..كنت متيه من الخوف الحمدلله طلع عنده ضمير .. ووصلني
بأمان ...دقيت الباب العود..فج خان دريشة حجرته الظاهر عرفني لانه ع طول من
جافني عفد و فج لي الباب ... و يلس يدور كأنه يدور فارس ..
قلته: فارس بعدين بيي
خان: بابا فارس ما في يسوي تلفون ...
نوره: ما عليه انت لا اتسوي له عن تخرب علي كل شي ..هو ابروحه بيي اليوم
..المهم انا بتم هني كم يوم ..
هز راسه دشيت و انا اقوله : اشك انك فهمت شي ..
دشيت ..خذت نفس طويل و انا اطالع الضاحيه يالله اشكبرها ...حسيت بالانتعاش
يالله يا نوره عدي الساعات لي ما يوصل فارس ...رحت صوب الفله ..دشيت المطبخ
..
جفت الثلاجه فاضيه امممممم لازم اسوي اكل حق فارس ... زقرت خان ..ياني
يتراكض من بعيد ..طرشته يشتري سامان ...
فـ البدايه كنت خايفه اتم ابروحي هني مع ها الهندي بس اذكر خالي حسن مره قال
انه معاهم من كان صبي و الحينه اجوفه شيبه يعني عادي ينوثق فيه ...
.دشيت الفله و قفلت علي البيباب علشان اتطمن ...ادري فارس بعصب علي .بس ييته
لي كم بتسوى حياتي كلها بتتغير .....يالله يوصل ابسرعه ...
**
فج فارس باب الشقه .. كان متعود يجوف نوره قاعده ع الكنبه اطالع التلفزيون
او يمكن انها تترياه ...عقد حياته يوم جافها مب يالسه ابمكانهااا ...
فارس : نوره ...؟؟ نوره ..؟؟
سرت المطبخ جفته فاضي .. و الظاهر انها ما طبخت .!! لا يكون زعلانه و راحت
بيت خالي حسن ..؟؟اتسويها !! ما اظن ...قمت ادور عليها في الحمامات شرات
المينون ...
اخرتها انتبهت ان شنطتها الصغيره محد..فجيت كبتهاا جفت ماخذه من ثيابها بس
باجي اغراضها موجوده ..؟؟ وينها !! راس الخيمه ..؟؟ اليوم وليد عنده سباق بـ
عوافي !!لالا نوره ما اتسويها ...اتصلت ابسرعه بـ منصور ..
منصور: هلا فارس ..
فارس يرمس ابسرعه: وليد وينه ...؟؟
منصور : وليد مب موجود ليش !
صرخ عليه محرج: اقولك وين وليد ...
منصور: نزل راس الخيمه من الصبح ..تدري عنده مسابقه في عوافي ..
فارس يرتجف : كم رقم موبايله ..
منصور : فارس شو مستوي ...؟؟
فارس محرج عليه: انته يا البارد عطني رقم موبايله ولا ترمس زود ...
منصور يعرف ان فارس يوم يحرج تطلع منه أي رمسه ..بس منصور كان خايف ان وليد
امسوي شي جايد.. و عادي فارس يجتله ...عطاه رقم وليد..و ما يعرف كيف فارس
حفظه مره وحده ..
اتصل فارس بـ وليد و كانت اصابع ايده ترتجف ..بس ماشي رد ..اتصل فوق العشر
ماشي رد..كان يمشي بالشقه شرات االوحش المفترس باي لحظه بنقض ع فريسته ..
.لمح التلفزيون ماشي فوقه موبايل ..يعني نوره ماخذه موبايلها ..اتصل برقمها
..بس عطاه خارج عن نطاق الخدمه ...
حس فارس انه فقد اعصابه معقوله نوره اتقص عليه ..هي ليش لا ..بعد الي سويته
البارحه ..اكيد ما بتم معاي لحظه وحده رن موبايله جاف المتصل خان
فارس : متفيج ها داق الحينه ...
..فر موبايله بعصبيه ع الارض ..و قعد ع الكنبه...شو بخليها اتروح مني جي بها
السهوله ...شل مفاتيح سيارته ..و طلع ناوي يلحق وليد و نوره ..
.و حلف بداخله اذا جافهم بجتلهم ...حرك سيارته باقصى سرعته ....يا ويلج مني
نوره يا ويلج مني ...انا الغلطان جان خليتج البارحه في شارع الامارات ابروحج
زين.
.و ضرب صدره بقوه..مالت على ها القلب الي يموت و يضعف جدام حرمه ....و هو
يضرب صدره فقد تحكم بسيارته و خاصه انه كان يسرع ..فانجلبت فيه .. و ظلمت
الدنيا بعيونه ...و فقد الاحساس بكل شي ..
**
ابتسمت نوره و هي اطالع الحوض الي كان موجود ورا الفله .. هني و بها المكان
...حست بشعور ..غريب بالنسبه لها بس حـلو .
.ما كنت تعرف ان الي يحب لازم يحس بها المشاعر ...
توها بس من جريب عرفت انها اتحب ..اتحب فارس ..اتجدمت .. و يلست ع الكرسي و
غمضت اعيونها تذكر قبل كم شهر ..
شو صار بينها و بين فارس ....الله يا روعة هالانسان يخليج اتحبينه غصبن عليج
ان كان رايق او محرج ...طالعت الساعه جفتها وحده فارس جريب يوصل ..ربعت صوب
المطبخ.. و طبخت له برياني...اخيرا ضبطت هاي الطبخه..سويت السلطه و الشاي
..ورحت اتغسل ...
طبعا دوم الفله مخلتنها مقفوله ...علشان احس بالامان اكثر ...خلصت يلست
اتريا فارس ...ماشي هني تلفزيون..؟؟ و الواحد يرتاح بها المكان يصفي افكاره
...غمضت اعيوني ..و غفلت..
.نشيت طالعت المكان..لمحت الساعه 4 العصر ..فارس ما يااه ..ربعت ادور عليه
من حجره لـ حجرة رحت المطبخ ...ما في شي يدل ع انه يااه...مستحيل فارس ما ايي
..مستحيل ....؟؟
حضنت ايدي مب امصدقه فارس ما يباني ... كنت واثقه اني بجوفه...اكيد صار له
ظرف و تاخر انا متاكده ..
.ركضت صوب شنطتي .. واتصل بموبايله بس ماشي رد...شو يعني !!! اتصلت اكثر من
مره ...
ما ايرد علي اخرتها غلق الموبايل ...طاح الموبايل من ايدي كنت مصدومه فارس
ما يباني ما صدق اني طلعت من عنده..يلست ع ركبي منهاره و قعدت اصيح ..
.طوال هاليوم ما اذكر اني كلت شي ...كنت كل اصيح ...اخرتها خففت عن نفسي
..اتذكرت نظرات فارس لي ابتسامته..لمساته لي ...
مستحيل ما يحبني ..معقوله ..كل جذب ..طالعت روحي بالمنظره جفت حالي ..اتذكرت
كلماته "بتدفعين الثمن " صج فارس حطمني دمرني و الدليل جوفوا حالتي خلني احبه
و اعشقه عقب ما كنت اكرهه ... لا لا ...
فارس يحبني ...بتريااه هالاسبوع .. و اذا ما يااه هذيج الساعه عندي حق ..اني
اقول ما يباني
مرت علي الايام و انا كل يوم ادعي ربي ..ان ايي فارس ..
مرات بلحظات ضعف افكر اتصل بـ زينب بس ارجع بقراري انا سويت كل ها علشان
اعرف موقف و مشاعر فارس صوبي بس للاسف ..طلعت الخاتم الي كان متعلق برقبتي عن
طريق السلسه ..دمعت اعيوني ..
معقوله فارس باعني ..ما يباني ..يستوي !! باجر الاربعاء مرت خمسة تيام و انا
عايشه ما بين جدران هذي الضاحيه حفظت كل شبر فيهااا ... كنت اعد الدقايق و
الساعات ...
و انا اتريا طيف فارس ايينـي بس للاسف ...الظاهر لازم اروح راس الخيمه
...حتى ما فكر يتصل فيني ...طلعت موبايلي ...اممممممم منوه بياخذني راس
الخيمه !! ما اتذكر رقم خليفه او حميد ..!! حميد ..
علشان يشمت فيني !! يا الله شو اسوي .
.فريت شنطتي بالارض و قعدت اصيح منهاره ...شسوي الحينه ..طاحت اعيوني ع ورقة
صغيره ..رقم نوف ..نوف هني ...محد بساعدني غيرهااا ..
طلعت موبايلي و اتصلت بالرقم الموجود ع الورقه و اصابع ايدي ترتجف ..ماشي
غيرها ..واذا ما لقيتها ..خلاص بكون ضعت ...
ارتحت يوم سمعت صوت نوف : الو ..
رديت ابسرعه : نوف انا نوره ..
نوف : هـلالالا نوره وينج انتي ..وين الي بتتصل ..
صحت منهاره: نوف ساعديني ..
نوف خايفه: الو نوره شو بلاج نوره ...؟؟
مسحت دموعي و مسكت اعصابي : محتاجتنج ..؟؟
نوف: بعدني ربيعتج لو فرقتنا الظروف ...وين انتي ..
نوره: انتي الي وينج ما بتنزلين راس الخيمه..؟؟
نوف : لا ما بنزل ليش ..
يلست منهاره : قولي و الله ""وصحت "
نوف: نوره ارمسي عدل شو بلاج .. وين انتي ...؟؟
بلعت ريجي و حاولت اتمالك اعصابي : انا بضاحيه فارس بالعجبان ..انا ابرجع
راس الخيمه انا ابروحي هني ما عندي غيرج ..
نوف : وينه ريلج..
نوره تمسح دموعها: مممممدري نوف ممممدري ..
نوف: سمعي حبيبتي ..اخوي بنزل بنزل معاه مب مشكله بس دليني وين الضاحيه
بالضبط..
نوره : ما اعرف ادليج بالضبط ..متى متى بتييني ...
نوف : بتصل باخوي و برد لج خبر ..
نوره: لا اتخبرين حد دخيلج..
نوف : ما يهمج بنكون ع اتصال ..بس لا اتصيح و اتسوين ابروحج جي ..
نوره : زين ردي لي خبر ابسرعه ..
نوف : ما يهمج ..
" خذ راحتك صبـــري على بعدك كبير ... لا تنزعج مني أبـــد دنياك عاشـرها
وســير لا تتعب أفكارك معاي أنا مجرد ذكريات ... راحت مع أحلام السنين هذا
المقدر والمصير ...خذ راحتك عيش الهنا عيش الوفا مع من تريد ... عسى الليالي
تسعدك وتهنى مع الجو الجديد "
وغلاك عندي ما حسدك ما دامك إنته المستفيد ... لكن ما خبي عليك ما عود لك
مهما يصير"\
مستحيل اعود لك يا فارس ...مسحت دموعي ..لو كان عندي اهل ..ما صار هذا حالي
.. لو كان عند اخوي يعتمد عليه ما كان صار ها حالي ...لكن عهدا علي يا فارس
...ان جمعتنا الايام في يوم ما اردلك ... ابوي صد عني ما ترجيته .ولا فكرت
ادوره .و انت من تطلع علشان اترجاك
عقب خمس ساعات ...وقفت سيارة اخو نوف حذال باب الضاحيه ...
كنت اجوف علامات الاستفاهم ابويه خان ...بس ما عطيته فرصه يسأل شكرته و
عطيته بيزات ..علشان الخدمه الي خدمني اياها مدة خمسة اتياااام..
و بالمره عطيته موبايل فارس بعد ما اغلقته و طلبت منه يعطيه لـ فارس اذا
جافه فـ يوم ...
ركبت سيارة نوف ...
حسيت بالاحراج لاني تعبت الجماعه معاي ..تميت طوال الدرب ساكته ..
و الدموع اتبلل غشوتي ... ودعت بوظبي وودعت اجمل و احلى ايام عمري قضيتها مع
اغلى انسان سكن و اتربع في عرش قلبي ...
يتبع >>>>>>
/////
كل الجراح تهون يا جرحي بذاتي..يا دمعه الليل الطويل يا سر احزاني...شايل
المستحيل والصبر عنواني..سيف الصبر ذبحتني يا سيف الصبر...غربه وغدر وآه آه
من الغدر...يا غربتي طالت معاك رحلتي..في دنيتي صرتي مساري وسكتي...بودعك يا
ليل العذاب ...بودعك وارحل على مثن السحاب...وبتشوفني مثل الضباب
مثل الوهم مثل السراب....لي مرت الذكرى عليك....ماردي لك لو هلت دموع
الندم...ماردي لك لو عيشتك صارت الم....يا غربتي طالت معاك رحلتي.....في
دنيتي صرتي مساري وسكتي.."
دخلت شقتي..شقتي انا و عمور .. انتهت رحلة عذابي .. رجعت ما معي غير دموع و
آهات ...و ذكريات حلوه بس تجرحني ..انتهى كل شي ...يلست اطالع الشقه .. و
كأني كنت في حلم .. و صحيت منه ..فارس آآآآآه يا فارس .. انت سبب جروحي و
عذابي ....غمضت اعيوني و اطلقت لـ عبراتي العنان ...
مسحت ادموعي يوم رن تلفون الشقه ..منوه بتصل فيني !!اكيد نوف انا عطيتها رقم
الشقه ..عقب ما عطيت الموبايل حق خان ..
نوف: شخبارج نوره ..
همست: الحمدلله ع كل حال ..
نوف: جان تبين بيي اقعد معاج هاليومين تدرين ريلي ما نزل ...شو قلتي ..
ابتسمت من خاطري فديتج نوف : مشكوره نوف ما ابا اتعبج معاي بس ..وقت ما
اتجوفين روحج فاضيه زوريني ..
نوف: ما يهمج ....تبين حايه اماره..
نوره: نوف ما ابا حد يعرف اني رديت راس الخيمه دخيلج أي حد يسالج عني قولي
مدري ..؟؟
نوف: ليش كل ها شو مستوي لج ..
نوره: بعدين بخبرج المهم مشكوره ع كل شي ..
نوف: العفو ..و ما يهمج ترانا ارباعه ..
نوره: تسلمين ...
نوف: يالله فيمان الله ..
نوره: مع السلامه ..
صكرت عن نوف .. و قررت اني انسى كل شي و ابدا حيااه يديده ابعيده عن فارس و
غيره ...و خل تتحسن اوضاعي عقبها بدور الحجه المناسبه علشان اخبرها حق قوم
خالاتي ....اتنهدت ..بس شغلي ..؟؟ من وين بدبر لـ عمري ...رحت صوب شنطتي و
طلعت بطاقة احسابي ...
اذكر انا امخليه مبلغ بقزر به اموري لي ما احصل لي وظيفه بس وين ...؟؟
اتنهدت و الله انك حطمتني و دمرتني ..يا فارس ..صليت العشى..ما كان لي نفس
آآآكل ..رقدت ع طول ..حاولت ارقد تميت اتجلب و اتجلب ..خيال فارس و صورته ما
اتفارقني موليه ...يلست اصيح و اضرب المخده ..ليش جي سوا فيني ...ليش
...؟؟
سميت بالرحمن و يلست اقرا قرآن لي ما حسيت ابراحه و رقدت ع طول ...فجيت
اعيوني يوم جفت اشعة الشمس متسلله ع غرفتي ..عفدت ابسرعه و صليت الفير
...حسيت اني متكسره وتعبانه ...قعدت ع الكنبه ...رقدت ساعه عقبها نشيت ..مدري
من وين يايني هالخمول كله ....
رحت المطبخ..شفته و كأنه مهجور من سنين ...يلست انظف الشقه و ارتبها ...دشيت
حجرة عمور ...هاجت فيني الذكرى..يلست ع شبريته و قعدت اصيح..ها يزاتي ...سويت
و سويت بس علشان ازوجك الي تسعدك و انت جوف شو سويت فيني ...؟؟
طلعت من حجرة و عمور و حلفت اني ما ادشها موليه ... عقب ما خلصت تنظيف البيت
..طلعت ...جفت سيارتي اموقفه..ابتسمت ..مدري ليش يمكن كل شي رد مثل اول ..بس
في داخلي ما ودي ارجع مثل اول بالعكس ابا اكمل حياتي مع فارس ..بس فارس ما
يباني ..
.اتنهدت تنهيدت عذااب ...حاولت اشغل سيارتي بس ما طاعت تشتغل و كيف تشتغل و
هي صار لها شهور ما اشتغلت ....وقفت تاكسي .. و رحت البنك ...
علشان اسحب لي مبلغ ادبر به حياتي بها الايام .... كانت صدمه بالنسبه لي
...ما صدقت حسبت ان شي غلط او افلوس نازله لي بالغلط..دشيت قسم الحريم
..استفسر و اتاكد من رصيدي ...
طلع صح ها الفلوس بالرصيد ..لي .. و ماشي أي غلط..طلبت منهم يخبروني متى
نزلت هالبيزات يمكن من عمور يستوي ...؟؟ عقب ما يلست اتسوي بالكمبيوتر قالت
لي كانت تنزل لي كل بدايه شهر ..خمستلاف درهم ...
شهقت : من أي شهر ..
ردت علي : اممممم من شهر سته ..
نوره: مشكوره خلاص عرفت ..
و طلعت من البنك فارس كان ينزل لي بحسابي كل بدايه الشهر ..بدال دوامي
..آآآآآه يا فارس ..شو اقولك عنك..بس ..بس حلفت بداخلي اني ما اصرف منها شي
..كافي البيزات الي عندي بتكفيني .سحبت مبلغ يكفيني اشتري لي موبايل .. و رحت
طلعت لي بطاقة تلفوني رقم جديد..
.احسن علشان محد يعرف رقمي ...عقبها رحت اشتري كم غرض ..لان ما بقى شي ع شهر
رمضان غير اسبوع ...فكرت امر العياده علشان اقطع الشك باليقين بس كنت خايفه
.. و بالمره حسيت اني تعبانه لاني اليوم لفيت وايد ..علشان جي ..طنشت و رجعت
الشقه ...
طارت افكاري صوب فارس ..ليش ما قال لي انه كان يحط لي مبلغ شهريا ...شو قصده
من هالحركه يعني كان متوقع ان نهايه علاقتي فيه ..بتكون جي ..ابتسمت اتطنز
يمكن ما يبا يحس انه ظلمني ..يوم طلعني من دوامي ...يلست اطالع السقف ..و
ادموع تنزل مني ..كنت احس اني اذوق طعم العذاب ...شسوي ..اروح لمنوه ...؟؟
منوه بساعدني ...؟؟ يالله شسوي ...بها العالم الكبير ابروحي ...في اليوم
الثاني اتصلت بي نوف .. و اتفجت معاها انروح العياده .. كنت متلومه لان اخوها
بياخذنا ..بس عقب قالت ان طريج العياده ابدربه ..
عقب ساعه كنت عند الدكتور ...فحصت لي و كنت ادعي ربي من كل خاطري ...ان
شكوكي تطلع مب في محلهاا ...بس للاسف ..مثل ها الاحساس صعب انج تنخدعين فيه
.
.بشرتني اني حامل من شهر و نص .. و باركت لي بس للاسف ما تدري انها طعنتني
في الصميم.. ها الخبر ما يااه في محله ابد ..طلعت و انا كارهه حياتي بس شو
اسوي كتبت ربي و لازم ارضى بقدري ...تميت ساكته طول الدرب مب رايمه اتكلم
...
نوف : نوره هاتي مفاتيح سيارتج بخلي عقاب يصلحها ..
رديت : لا ما يحتاي ابروحي بتصرف ..
نوف: لا انا خبرته خلاص هاتي لا تستوي سخيفه ..
ما تحملت حطيت ايدي ع ويهي و يلست اصيح منهاره ..شو اسوي ابروحي من غير ريال
لا شغل ولا مشغله و باجر بيكون في حياتي طفل كيف اوفر له حياته صحت كنت يأسه
من حياتي مب عارفه شسوي
حضنتني نوف : بلاج فديتج نوره شو صار لج ...
نسيت روحي و نسيت ان اخو نوف موجود حاولت امسك اعصابي بس ما قدرت كانت
مشاعري و دموعي اقوى مني بوايد ..
نوف: علشاني خاطري نوره لا اتسوين ابروحج جي ..
اخيرا وصلني الشعور يحسسني الي قاعده اسويه سخيفه ..نزلت ع طول من السياره
متلومه من اخو نوف ..
عطيتها مفاتيح سيارتي ... و رحت شقتي ..غطيت ويهي بايدي شسوي الحينه .. فارس
ما يدري اني حامل ...يالله شسوي ..حطيت ايدي ع بطني و رصيت عليها .. ما ابا
ولدي يطلع شراتي ..ينولد ع الدنيا و ما يعرف منوه ابوه ..انهرت ..و يلست اصيح
..
.ما ابا ولدي يطلع شراتي ..طحت ع الارض اصيح ..منو بخفف عني معاناتي ..منو
بمسح عني دمعي و يحضني .. منوه و منوه ..بت في ها العالم وحيده ...لا لي انيس
ولا ونيس ..محد يعرف عني شي ..حتى فارس ما تنزل يحاول يوصل لي ...ولا اهلي
..معقوله ما خبرهم انا انفصلنا ....
"من الهجر يا صاح شفت المضره...جرحي مثل جرحك له سنين ماطاب..حتى النظر
مايفيد وان جاك عذره..حبه سطى في الجرف والوجد نهاب...زوله وسط عيني وقلبي
مقره...لو غاب عني طيفه اليوم غاب...شوقه عذاب وشوفتي له بالحسره...ليته درا
في قلبي صار ...حتى النظر مايفيد وان جاك عذره...عمري مضى مابين حلوه
ومره....والعمر فاني والهوى كله اسباب...احبس دموعاً سالت اليوم نثره...واكتم
وداري دمعتك عند الاجناب"
..فتح فارس اعيونه طالع المكان مستغرب جاف كل حوليه اجهزه ...عرف انه فـ
المستشفى !!حس بصداع ..و جسمه و كأنه ذبلان مب رايم يتحرك ...
رجع و غمض اعيونه ..ما يتذكر شي شو الي صار له و ليش هو هني .. و من متى
...؟؟؟ رجع مره ثانيه و فتح اعيونه يوم سمع حوليه اصوات ..طالع ريال
مجابلنه..
منصور: فارس فارس ...تسمعني ..
تميت اطالعه منوه ها شكله مب غريب علي ..؟؟ ربع منصور برع يزقر الدكاتره
..شويه جاف الغرفه امتلت بالممرضات و الدكاتره كنت اطالعهم مستغرب شو السالفه
!! ..
سمعت الدكتور يقول : كل شي تمام ..الضغط و ضربات القلب كلها تمام ...
رفعت ايدي بصعوبه احاول اشييل الاوكسجين من ع ويهي ..ساعدني الدكتور و شاله
عني ..
الدكتور: الحمدلله ع السلامه ..أيه النومه الطويله دي يا فارس ..
حاولت ارمس ارد عليه بس ما قدرت ...
الدكتور : طبعا انا عارف ..مش قادر تتكلم..لسه ارتاح شويه و مع الوقت ان شاء
الله كل حاجه ترجع زي ما كانت ...
غمضت اعيوني شو السالفه شو مستوي ...رجعت بطلتها يوم سمعت صوت واحد
يزقرني
منصور: الحمدلله ع السلامه فارس ..
تميت اطالعه منصور ها منصور ..ريل زينب اختي !!!
رفعت ايدي و زخني ..جفت دموعه ع خده ..ابتسمت له اطمنه اني انا ابخير ...
منصور : كلنا خفنا عليك.. كلنا انحاتيك..توني اتصلت بخالي حسن الحينه كلهم
يايين ...يتطمنون عليك ...
الدكتور: ما تتكلمش كتير يا منصور ...
منصور: يا دكتور فارس حي ..
الدكتور: الحمدلله ...
عرفت اني كنت في غيبوبه بس مدري كم صار لي ...هني ..
منصور: متى بتاخذونه القسم ...؟؟ هو ابخير الحينه ..
الدكتور: حنعمل اشعه و تحاليل بعد ما نطمن ح، ننقله القسم ..
منصور: مشكور دكتور ما اتقصر ...
الدكتور: انا عارف انك اتصلت باهلك..بس مش عاوز امة محمد كلها تدخل الغرفه
دي شخصين شخصين بس ..
كنت اطالع الدكتور و منصور يسولفون ولا ادري شو السالفه ... ..دش علينا خالي
حسن ..بديت اتذكر هم واحد واحد ...
خالي حسن: دكتور ولدي ما يتكلم..
الدكتور: ان شاء الله بكره دلوقتي ما يقدرش يبذل أي مجهود ..سيبوو براحتو
..يالله يا فارس شد حيلك ..عاوزين هم و عزيمه علشان ترجع زي ما كنت و احسن
بكتير اوى ..
دش علي خالتي حصه كانت اتصيح و منهاره .. حتى مها كانت اتصيح ..و زينب كانت
تترجاهم انهم يسكتون علشاني ..ابتسمت لهم مرتاح ...ابا اقولهم انا ابخير بس
ما رمت احرك لساني كنت احس بثجل ..و اني ميهود ..في اليوم الثاني فتحت اعيوني
..
لقيت ابروحي بحجرة ثانيه .. بس من دون اجهزه ولا شي اللهم مغدي ...صديت
الصوب الثاني جفت خالد راقد ...
ابتسمت له : خا...خالد..
خالد :راقد ما يسمعني "
فارس: خالد ...
بطل خالد اعيونه ابكسل ثواني و عفد صوبي ..زخ ايدي :سلامات سلامت بو الفوارس
ما اتجوف شر ..
رديت عليه و كنت احس بحالي احسن عن امس بوايد : الله يسلمك ...
يلس جريب مني : افا و الله افا جي اتخوفنا عليك ...
فارس : شو استوا ما اتذكر شي ..
خالد: احسن علشان ما اتعب حالك ...
فارس: من متى انا هني ...؟؟
خالد: من3 شهور و اسبوع ..
طالعت برع : يالله كل هالفتره انا راقد بالمستشفى ..
خالد: هي كنت بغيبوبه..بسبب حادث ..
رن موبايل خالد .. كانت المتصله مها تطمن علي ..طالعت الدريشه حادث انا سويت
حادث هي صح ..كنت ابا الحق نوره .. نوره !! وينها نوره ...دمعت اعيوني ..و
غمضتها ..نوره شو سويتي فيني نوره ..يالله هالبنيه سبب عذابي بكل شي في
الدنيا ...و المشكله اني احبها ...بس بعد ما سوت سوتها ..حتى الاحتقار شويه
عليها ...خالد: بو الفوارس .
طالعته
خالد: الاهل بيون يتطمنون عليك..
فارس: ابا اطلع من هني ..
خالد: ان شاء الله بس اكيد مب اليوم ...
فارس: ليش انا ابخير ..هاه "و يلست احرك ايدي و ريولي ...بس حسيت ابويع يوم
حركت اريولي فصرخت صرخت الم "
خالد: قلتلك يبالك شويه اصبر ..
فارس: عندي وايد حسابات لازم اصفيها ..
خالد: اصبري الايام يايه ...
فارس: ابوي من زمان ما سرت له اكيد بحاتيني ..
خالد: فارس صل ع النبي شو بلاك ..
سكت ..شويه و دش منصور و خالي حسن و بو منصور ..اتحمدوا لي بالسلامه ..و
كانوا الممرضات كل شويه اييون ياخذون مني تحاليل و هالسوالف ...
بها اليوم مر من دون ما احس بالملل ..لان اهلي كانوا معاي طوال الوقت غير
ربعي الي يزوروني ...و عليا ما قصرت يابت معاها مسجله و حطت شريط قران علشان
احس بالراحه و حالتي النفسيه ترجع احسن عن قبل ...
في اليوم الثاني ياني منصور
فارس: اخوك وليد وينه ...؟؟
منصور: سافر الكويت اونه يبا يروح مهرجان هلا فبراير ...
فارس: ابروحه ...؟؟
منصور: ويا ربعه ليش ...شو سالفتك ويا وليد..
فارس: ماشي ..؟؟
منصور: فارس انت باليوم الي سويت فيه حادث اتصلت تبا رقم وليد و كنت معصب شو
السالفه وليد سوا شي ..
فارس: لا ..بس كنت ابا اتاكد من شغله ..دخيلك منصور عطني موبايلك شويه ..
منصور: اندوك بترمس منوه ..
فارس: برمس ابوي ...
اتصل بموبايل ابوي زين اني تذكرت رقمه ابسهوله ..
ابوي: السلام عليكم..
فارس: عليكم السلام ابوي شحالك..
احمد: فـااااااااارس اخبارك انته وينك ..ما من شر قطعتنا مره وحده ..
فارس : اسمحلي انشغلت و كنت امسافر ..
احمد: الله يا الدنيا زين اتصلت طمنا عليك..
منصور: قوله انك امسوي حادث ..
اشر له فارس انه يسكت علشان ما يسمعه ابوه ..
احمد: اخبارك و اخبار نوره ..هاي القاطعه قولها خالج احمد زعلان منج يلي ما
فيج خير ..
فارس مصدوم : هاه ..
يسال عن نوره ليش اذا مب معاهم وين راحت !!
احمد: هي نعم خبرها كلنا متضايجين منها حتى خالاتها ..
صار فكر فارس بعالم ثاني يعني وين راحت نوره محد بيعرف غيره وليد ...يمكن
سافرت معاه .لالالا عيل باجي الاوقات وين اتكون ..
فارس : ما عليه ابوي سامحها تعبانه هي و اوعدكم اني ايبها لكم..
احمد: بنجوف ...
فارس: يالله سلم ع الجماعه و ع قوم خليفه ..عمور شخباره ما يااه
احمد: عمور يتصل بي بس علشان يسال عنك الظاهر انت قاطعت الكل ..
ما عرف فارس شو يرد عليه فسكت ..
احمد كمل كلامه: عمور و خوله ان شاء بنزلون بالصيف عقب ما اتربي خوله ..
فارس : الله يردهم بالسلامه... زين ابويه سلم ع الجماعه..
احمد: الله يسلمك عاد لا تقطع ..
فارس : ان شاء اللهابويه فيمان الله ..
احمد: مع السلامه ..
منصور: ليش ما اتخبر ابوك عن حالتك هاه عيل ليش ابوك ..
فارس: ما ابا اخليه يحاتي زين انكم ما خبرتوه ايام كانت في الغيبوبه ..
منصور: دورنا رقمه بس مالقيناه ..فكرنا انروح راس الخيمه ...بس الحمدلله انت
فقت من غيبوبتك ..
اتنهد فارس : الحمدلله ..
يا الله نوره وين اختفت ..؟؟ دام ابوي يسال عنها وين سارت ...؟؟شهرين وين
بتكون ...؟؟؟انا لازم اطلع من هني و ادور عليها لازم ...شو اقول عمور لو
اتصلت به ..شو اقوله اختك شردت ..اختفت ضاعت شو اقول ..
فارس: منصور روح خبر الدكاتره اني بظهر من المستشفى اليوم ..
منصور: شوه اتخبلت انته ..
فارس محرج: رووووووح خبرهم ..
منصور: كيف بتظهر و انته ما اتروم تمشي حتى ..
فارس: شوه !! ما اروم امشي ...
منصور: لازم علاج طبيعي علشان اتروم تمش .
فارس: شو بلاها اريولي انا تشللت ..!! بس انا احس فيها احركهاا ..
منصور: فارس انته ما اتروم تمشي ..
فارس يصرخ عليه: انته شو اتقول ..روح ازقر الدكتور روح..
منصور: زين هدي لا اتعصب جي ...
فارس: اقولك روح
طلع منصور من الحجره ..و ضرب فارس بقبضت ايده ع الشبريه ..مقهور من كل شي
صار ..شو السالفه ..شو الي يصير ...شويه و دش الدكتور ..
الدكتور: خير يا فارس ..
فارس: شو بلاها اريولي دكتور ..
الدكتور : الحمدلله ما فيهاش حاجه..
طالعت منصور و رجعت اطالع الدكتور : شو نتايج الفحوصات و التحاليل..
الدكتور: كلها و الحمدلله سليمه..
فارس: عيل ليش ما اقدر اطلع ...
الدكتور : لازم تعرف يا فارس انت كنت في الغيبوبه مدة 3 شهور مش شويه يعني
..
فارس: شو يعني ..؟؟
الدكتور: يا ابني هو انت عصبي ليه ..
فارس: افففففففففففففففف
الدكتور: خلاص ما تزعلش..بعد يومين حتخرج بس حط في بالك انك بتطلع من
المستشفى و انت بالكرسي المتحرك..
فارس مصدوم: ليش ..ليش ما اروم امشي و انت اتقول كل شي سليم ..
الدكتور: طب خليني افهمك هو انت معطني فرصه ..
منصور: فارس صل ع النبي ..
فارس: عليه الصلاة و السلام بس انا ابا اعرف كل شي ..
الدكتور: طيب بالراحه ..اسمع يا فارس ... رجليك محتاجه تمارين خاصه علشان
تقدر تستعيد العضلات رجليك قوتها ..انا مش حـ اقول انك مش حتقدر تمشي لا يا
ابني كلهم شهرين او ثلاث بالكتير و ترجع زي ما كنت ...
فارس: شهرين ولا ثلاث بتم في كرسي متحرك .. و نوره !!
الدكتور: مين نوره ..
فارس: خلك من نوره ..الحينه بتم ثلاث شهور في كرسي متحرك..
الدكتور: قول الحمدلله يا ابني غيرك ما طلعش منها سليمه ..
سكت فارس هو متخوف انه ما بمشي ع طول ...أأأأأأه يا نوره ..محتاجنج بجنبي
بها الوقت بس انتي ما فيج خير ..خنتيني .تركتيني ..نار قلبي موليه ما بتبرد
الي سويته فيني مب شويه
الدكتور : رحت فين يا فارس ..
فارس: دكتور انا اروم اتعالج برع و ع احسابي بس دخيلك قول لي اذا ما بمشي لا
اتحط آآمال و هناك ما في شي ..
الدكتور: لاء لاء يا فارس ... انا بقولك الحقيقه.. و بعدين مين آآآآآل انك
حتفضل ثلاث شهور بالكرسي المتحرك..
فارس : و ابوي منصور جوف هالدكتور بخبل فيني ..
منصور: الله يهداك فارس شو بلاك مستوي عصبي اسمع رمسته ..انته..
الدكتور: هههههه ايه مالك يا فارس ... كل شي بالتدريج...يعني كرسي متحرك
..بعدين بالحديد و بعديها ان شاء الله حتمشى لوحدك ..
فارس: و كم كل ها ياخذ وقت ..؟؟
الدكتور : ع حسب نفسيتك بطل العصبيه دي و ان شاء الله زي ما قلتلك خلال ثلاث
شهور بالكتير حتتعفى باذن ربنا ..
كلام الدكتور ريحني ...كنت اشوف الثلاث شهور دهر بس لازم اصبر علشان اقدر
امشي و اجوف و اعرف وين اراضي نوره ..
**
طلعت نوره من غرفة الدكتور ه بعد ما تطمنت ع حملها ...ابتسمت يوم جفت بطني
...باجي اربع شهور ونص تقريبا بربي ...حسافه ان فارس ما يجوف ولده و هو يكبر
في بطني تنهدت .. رحت الحمام .. و انا طالعه ..انصدمت طاحت اعيوني بعيون خلود
بنت خالوه مريم ..
طالعتني امبهته و كأنها متشككه اذا كنت انا نوره او لاء ..كنت بخطف عنها ما
ابا اتجوفني و انا جي حالتي بس لي متى يا نوره بتهربين من العالم و من الناس
3 شهورو انتي وحيده
زختني خلود من ذراعي و حسيت الغبنه بصوتها : نوره !!
ابتسمت لها وحضنتها مدري ليش يتني الصيحه ..تمينا حاضنات بعض و الحريم واقفت
يبون يدشن الحمام..ييرتني و يلستني ع كرسي الانتظار ..
خلود: نوره انتي هني براس الخيمه !!
هزيت راسي بمعنى هيه ..طالعت بطنها خلود حامل ...؟؟
نوره: ما شاء الله حامل باي شهر ..؟؟
خلود : التاسع عاد بربي و انتي ..؟؟
ابتسمت لها : انا بشهر الرابع جريب ادش الخامس ...
خلود: ليش جي مستوي حالج شو بلاج بسم الله الرحمن الرحيم ..
نوره: شو اقولج يا خلود ...منوه يايبنج..؟؟
خلود: خليفه فرني و حرمته و قالوا عقب بمرون علي ..
نوره: خليفه و شيما شو اخبارهم ..
خلود: الحمدلله ...انتي شو اخبارج شو مستوي فيج نوره ..خبريني عنج ..وفارس
شو اخباره ..
رديت مصدومه : فارس !!
خلود: هي فارس شو بلاج..؟؟استغربتي ..؟؟
نوره: شو رايج اتيين معاي اوصلج ...
خلود: صبري بتصل بخليفه ..
نوره: لا اتخبرينه انج بتردين معاي ..دخيلج خلود..
طالعتني مستغربه : زين ما يهمج ..
وصلنا الشقه كنت اجوف علامات الاستغراب و الاستفاهم بعيون خلود بس ما قلتها
ولا شي لاني افكر ليش سالتني عن اخبار فارس معقوله ما يزورهم !! رحت المطبخ و
سويت لها شاي ...
نوره: اشتقت لايام قبل ...كل شي تغير ..
خلود: كل شي امايه كل يوم اتحن تبا اتجوف خوله ..
نوره: شو اخبارها ..؟؟
خلود: الحمدلله ..نوره شو مستوي ليش جي انقطعتي عنا حتى خوله كانت تتصل و
تسالنا عنج شو بلاج ..شو مستوي ..؟؟
يلست العب باستكانة الشاي محتاره شو اقولها سالتها: فارس كان يزوركم صح..
خلود: هي كل اسبوع ايي يسلم و يروح من خذج بوظبي ما قام ايي يتغدا ولا
يرقد..كنا نساله عنج..كان يقول ان الحمل متعبنج ..؟؟ علشان انا مستغربه كيف
انتي حامل بالشهر الرابع و فارس من تزوجج يقول ان الخط يتعبج ابسبب الحمل
..؟؟
اتنهدت : بخبرج بس بالاول انتي خبريني شو اخباركم خالاتي و خالي احمد خليفه
نهله كلكم ...
خلود: حرام عليج انشدي عن جسوم ...
نوره: ههههه فديته و الله كم عمره صار ..؟؟
خلود: غدا ريال يمشي و يراكض ...و يغار من الي فـ بطني ..
نوره: الله يعينه ...
يلسنا انسولف انا و خلود ..ما في شي تغير في حياتهم ..عرفت ان شيما للحين ما
احملت ولا نهله .. و ان خوله بتربي بالصيف عقبها بتنزل الامارات و بترجع
اتسافر بتقعد سنه مع عمور و بردون يستقرون في الامارات ...
و حميد للحين ما يبا يعرس الريال صامد ..ولا بعده ما شبع مغازله..
خلود: شخباره فارس ترا صار له كم شهر ما يانا شو سالفتكم...
نوره: تدرين انا هني براس الخيمه ثلاث شهور..
خلود: مصدومه: ليش ...؟؟
نوره: تزاعلنا انا و فارس ..اكتشفت انه ما يباني و وحده غيري في حياته و ما
خذني الا علشان ينتقم مني..
خلود: شو هالرمسه الماصخه نوره ..مستحيل فارس يحبج و الله ..
نوره: انتي ما تدرين عن شي ..و ها السبب الي كان مخلني ما ايي راس الخيمه او
حتى اتصل بكم كان يبا يحرمني منكم .."ترجيتهاا" دخيلج خلود ما ابا حد يعرف
اني موجوده براس الخيمه لي ما اعدل اموري ..
خلود: اهلج شو ذنبهم..
نوره: ما ذنبهم شي بس ما ابا حد يتشمت فيني ..اتني نسيتي فسخت خطبتي من حميد
و ع طول تزوجت فارس ..
خلود: الله يعينج بس خلينا ع اتصال ...و اوعدج محد بعرف انج موجوده هني ..بس
امانه نوره ..جان محتاجه بيزات خبريني ..
ابتسمت لها: ما اتقصرين ..الحمدلله الي عندي كافيني ...
طالعت بطني و ابتسمت: ما عرفتي شو فيج ..
هزيت راسي و قلت: سبرايز... و انتي..
خلود: ولد شو بعد كان خاطري في بنت ..
نوره: ههههههه ان شاء الله في المحاوله الثالثه ..
خلود: بعد سنين...يالله بروح عنج..
نوره: تعالي بوصلج
خلود: اوكى
وصلتها و عطيتها رقم موبايلي يمكن احتاجها او تحتاجني في شي ..حسيت ابراحه
..رجعت شقتي ..و يلست اسوي الصوف ع شكل صورة فارس ..علشان اسويها مخده حق
ولده ...صحيح اني احاول انساه بس صعب ..علشان جي قررت اني اكتم حبه في قلبي
...الي سواه فيني مب شويه ...
حطمني..اضطريت استخدم البيزات الي كان ينزلها لي كل شهر بس الحينه للاسف وقف
من رجعت راس الخيمه ما قام ينزل لي بيزات..الله يستر من اليااي ..يوم بتخلص
بيزاتي .. و يوم برجع عمور و خوله .. بالصيف اكيد بتفاجئون بجوفتي بس بعد
بكون توني امربيه ..
اتنهدت و كملت اشغل نفسي بالصوف الي عطتني اياه زينب ...ما اترياا الا اني
اجوف شكل البيبي يشبهني ولا يشبه فارس و ما اترياا الا ورقة طلاقي متى
بتوصلني
///////////////////
" تكون ظالم تكون خاين..تكون مهما تكون انت..أنا أهواك يا روحي..ومهما تكون
انت حبيب غدار انا راضي...ومهما راح يطول البعد واحس بنار من الماضي...انا
صاين هواك انت..انا اهوى هواك انت..تكون ظالم تكون خاين....تكون مهما تكون
انت...انا اهواك يا روحي.."
وقف منصور بسيارته جريب بنايه فارس ...رفع فارس راسه فوق طاحت اعيونه ع
دريشة شقته...كيف ادخل هاي الشقه ما اروم ما اروم ...
منصور: يالله بساعدك ..
فارس: صبر منصور ما ابا اروح الشقه ودني بيت خالي حسن ..
منصور: زين ما اتسوي هني ما عندك حد يساعدك و خاصه انت بها الكرسي ...يالله
سرينا ..
بلعت ريجي ..يا ليت كانت جي السالفه..بس كل السالفه اني ابا اهرب من كل شي
يذكرني ابنوره ...آآآآه يا نوره ...وصلنا بيت خالي حسن ..نزل منصور ..
و نزل الكرسي من دبة السياره ... و ساعدني ع ايلس عليه..عمري ما تصورت اني
اكون عاجز فـ يوم ...ما قد تخيلت اني اكون محتاج لـ حد ..يالله شو سوت فيني
هالانسانه ..
بالاول دمرتني و راغني ابوي البيت بسببها ..عقب ما اعترفت لها و سامحتها
...قامت و شردت مني ...أي كرهه يملي قلبها و أي حقد .. و أميرة الاحساس و لحن
الخريف و ربعهااا..يلوموني ابكل شي صار من بينااا.دخلنا انا و منصور بيت خالي
..حسيت بنظرات الاشفاق بعيونهم نزلت راسي بالارض ..
اتجربت مني خالتي حصه ..
و حضنتني و اتحمدت لي بالسلامه..كنت احس شكلي غلط..كنت عارف انهم يبيون لي
ان ها الشي عادي بس علشان ما يحرجوني بس عيونهم كانت تفضحهم واحد واحد...سلم
علي خالي حسن..
و خالد و مهايه و زينب ..حتى علياا كانت موجوده ..طالعتها و لو تزوجتها زمان
كنت مرتاح...صدق من قال ارتبط بواحد يحبك ولا اتفكر تاخذ واحد اتحبه ...شو
سوت فيني نوره ...
خالي حسن: شو بلاك فارس من ييت كل سرحان ما تكلمت ولا كلمه ..
فارس: شو تبغيني اقول ..
خالتي حصه: يمه احط لك الغدا ..خاطرك تاكل شي ..
فارس: ما ابا ..ابا اروح حجرتي ارتاح ...
عفد منصور : تعال باخذك ..هاه ترا عقب ما الله يشافيك بإذنه تعطيني احسابي
..
الكل: ههههههههههه
ودني حجرتي ...و كانت تحت مجابله المكتبه ..ساعدني منصور و سدحني ع الشبريه
...غمضت اعيوني و تنهدت تنهيده طويله ..
منصور: فارس بترقد..
هزيت راسي بمعنى لا ..
منصور: ابشرك جان بتم ع حالتك هذي ترا بطول في علاجك..
فارس: شو تبغيني اسوي منصور..
منصور: حرمتك وينها محد سمع عنها شي من سويت حادث ..وينها ..؟؟
فارس: ليش ما دقيتوا ع موبايلها ..؟؟
منصور: يعطينا مقطوع شو السالفه فارس ..
فارس: ماشي نوره طرشتها عند اهلي في راس الخيمه ..
منصور: ع بالك بصدقك .انت نسيت بهاك..
قاطعه فارس: منصور بس لا اتذكرني ..
سمعنا دقه ع الباب ..شويه و دشت عليا.. و شايله معاها صينيه ..
عليا: الحمدلله ع السلامه فارس ..
فارس من غير نفس : الله يسلمج..
منصور: شو يايبه تراني ميت يوع ..
عليا: عيل روح عند حرمتك اتزهب لك غداك ها الصحن خاص ابـ فارس ..
فارس: قلتلكم ما ابا شي ..
عليا: بس شوربه يعني بتردني ..؟؟؟
منصور: خلاص عيل انا بروجح اتغدا .. و بطرشلك خالد ." وطلع من الحجره"
عليا : يالله اساعدك علشان تقعد ...و تشرب شوربتك..
فارس: ما اشتهي عليا .
عليا "بدلع" عشاني
حاول يقعد فارس عفدت عليا و ساعدته..
فارس: اروم ايلس ..ابروحي مشكوره ..
عليا: ما عليه اعتبرني ممرضتك أي شي بس تحملني ...
و نشت قامت يابت صينيه الشوربه .. و الغاشوقه..في البدايه ما عيبني الوضع بس
بعدين استانست حسيت اني امدلع .. و يلست عليا اتشربني الشوربه بايدها ...جني
ياهل ..كنت اطالعها و ابتسم ..بس اختفت ابتسامتي يوم قالت :هني و عافيه ..
غابت صورة نوره في خيالي كنت اتخيلها نوره ..نوره نوره متى بتنجلع بالي و
تفكيري .. شرات النخله انغرست في تفكيري و صعب اني اشيلها من بالي ..
عليا: شو ما عيبتك الشوربه..
فارس: امبلى مشكوره عليا ..
عليا: العفو ..تراني انا مستونها لك..
فارس : تسلمين ...
عليا: شو رايك اخليك ترقد الحينه ...؟؟ و عقب برد اتطمن عليك..
فارس :..................."ماشي رد"
اترييت عليا تظهر من الحجره ..غمضت اعيوني ورقدت ع طول ..
عليا: خالد ممكن اتوصلني ...؟؟
خالتي حصه: يالسه ..؟
عليا: خلاص بروح عقب المغرب بيي ..
خالي حسن: ما قالج شي عن حرمته ..؟؟
منصور: نوره فـ راس الخيمه . .. ما تدري عن فارس ...؟؟
زينب: عيل لازم نتصل فيها ..لازم اتكون جريبه منه ..هوه الحينه محتاجنها
اكثر من قبل ...
مها : منوه قالكم نوره ما تدري ..انا ابروحي اتصلت ابها بس قالت ما تقدر
اتيي ..لان خالتها بعد تعبانه .. و محتاجتنها..
حصه محرجه: شو هالرمسه الماصخه بعد ريلها طاح 3 شهور فـ المستشفى ما تدري
عنه ...
مها: كانت تتصل فيني و اطمنها عليه..
زينب متشككه بكلام مها: نوره من متى قامت اترمسج بالتلفونات ..؟؟
مها : امبلى كنت ارمسها بس الحينه قطعت لان موبايلها انقطع فجأه ما اعرف شو
السالفه ..
خالد: خلاص خلوهاا ع راحتها ..يالله عليا مها يالله انروح ..
بعد ما روحـوا زينب: انتوا مصدقين مهااا ..؟؟
حسن: و شو الي يخليها تجذب ..؟؟
حصه: و ليش ما نصدقها ابراايها الواحد ينعرف معدنه و اصله وقت الشدايد..
زينب: امايه انتوا ما اتعرفون نوره ..
منصور: خلاص انزين ..فارس موجود بين اهله .. خلوه مرتاح و ان شاء الله عقب
ابروحه بحل مشكلته ..خلوه ع راحته ...
حصه: هي و الله ما بنقصر فيه ..وا عليه عليااا محد يسواها ..
زينب اتنافخ : منصور يالله نش خلنا نمشي ...
حسن: وين تو الناس ...؟؟
منصور: ما عليه بنيي ع المغرب نتطمن ع فارس ...
حصه: الله يحفظكم ..
فتح فارس اعيونه ..جاف عليا قاعده جريب منه ..
عليا: صباح الليل ...؟؟ ها الكثر ارقاد ...
فارس: جي جم الساعه
عليا: خمس العصر ..شو رايك نظهر برع ..عند عمي حسن .. و عمتي ..
فارس : مالي نفس ..
عليا: فارس ما يصير جي ..
فارس يصد الصوب الثاني : ابا ارقد تعبان ..
عليا وقفت: ع راحتك..من ساعه اخوك فيصل كان موجود .. انا بروح اسوي لك شي
تاكله..
فارس: ما ابا شي خليني ابحالي ...
عليا: انا مقدره حالتك النفســ
فارس مقاطعنها : لو سمحتي عليا لا تدخلين بشي ما يخصج ..
عليا شويه و بتصيح مجروحه من كلام فارس فهمست: اسفه..
سارت صوب الباب وقفت يوم زقرها فارس : عليا ..
وقفت من غير ما اتصد صوبه: انا اسف سامحيني ..
عليا اطالعه : ابشرط.."ابتسمت" نطلع برع في الحوي ...شو قلت ..؟؟
فارس يرد الابتسامه : اموافق ...
عليا اتجدم الكرسي : خلني بساعدك..
فارس : ما يحتاااي بس انتي بطلي لي الباب ..
راقبت عليا فارس و هو يتصارع مع نفسه علشان يقعد في الكرسي كانت اتحس ان
قلبها يتقطع عليه ..ارتاحت يوم طالعها و قال : جفتي كيف انا قوي ..
هزت راسها مبتسمه و راضيه و فجت الباب و قالت: خلني ادزك ..
فارس : اوكى ..
طلعوا من الحجره و راحوا صوب الصاله ...جافوا ما فيها حد ...
فارس : وينهم..
عليا: يمكن برع ...امممممم تقدر طبعا اتروح ابروحك برع ..
فارس: وين بتروحين..؟
عليا: امسويه لك فطاير بروح اييبها ..لك ..لا اتقول ما ابا ..
راقبها يوم ركضت صوب المطبخ ..فطاير نوره ما كانت اتعرف اتسوي شي الا
الفطاير ..طلع برع في الحوي ..جاف مهاا يالسه ع المريحانه و سرحانه من جافت
فارس ربعت صوبه ..
فارس : يعني انتي هني جي ما ييتي داخل..
مها: ما حبيت ازعجكم ..
فارس: تزعجينا..؟؟!!
مها: هي انته و عليا ..
فارس: مها ..نوره بعدها حرمتي ..
مها : وينها عنك انزين ..
فارس ............"ماشي رد"
مها : جوفني صرت شرات البطه ..
فارس : متى بتربين..
مها: عقب ثلاث شهور بالضبط ..
فارس : الله يسهل عليج ..
يت علياا و معاها الفطاير ..حطتها ع الطاوله و قعدوا يسولفون ..دش فيصل
..سلم ع فارس بس الكل لاحظ انه هادي و من غير عوايده ...فكر فارس يسال فيصل
عن وليد بس غير رايه و قرر انه ما يفتح الموضوع الين يتشافى موليه ..
فيصل: لين متى بتم ع هالكرسي ..
فارس: شكلي غلط صح !!
فيصل : ما اقصد جي ...
فارس: ما عليه كل صبح بروح المستشفى بسوي تمارين ..علشان تستعيد عضلاتها
..."وضرب ركبته"
عليا: باجر متى بتروح ..؟؟
فارس: ع الساعه عشر الصبح..
فيصل: تباني انا اخذك و اييبك ما عندي مشكله..
فارس: ما يحتاي الدريول موجود ..
عليا: انا باجر عندي موعد ب عيادة الاسنان ...عادي اتمر علي ..
فارس يطالع مها الي ابتسمت له : هي عادي ..
عليا: مشكور ...
فارس: وينه ريلج مهاا ..
مها: قال بيي عقب ساعه ..
فيصل: انا رايح حجرتي ..
كلهم طالعوا فيصل عقب ما اختفى ..
فارس: شو بلاه اخوج ...؟؟
مها: مدري عنه ..
عليا: الظاهر متضارب مع عايشه اختي حتى عايشه متضايجه مدري شو السالفه
...
فكر فارس يسولف مع فيصل و يعرف شو مضايجنه بس ما كان في مجال لانه ما جفته
طوال اليوم ...في اليوم الثاني ..كان فارس واقف عدال بيت عم اخوانه بيت خالد
..علشان ياخذ عليا معاه المستشفى..غياب نوره من حياته فتح المجال وايد ان
عليا تجرب منه...صج انتي بنت اصيله يا عليا ...الواحد ما ينعرف الا بوقت
الشدايد..
عليا: صباح الخير ..
فارس: صباح النور ..بطينا عليج..؟؟
عليا تبتسم: لا بالعكس ....بس انا الي خايفه اني مثجله عليك..
فارس: هاي رمسه ترمسينها عليا تبيني ازعل عليج..؟؟
عليا: طبعا لاء ..يهمني رضاك ...
ما عرف شو ايرد عليها ..وصلوا المستشفى ...رااحت عليا صوب قسم الاسنان .. و
اما فارس راح صوب العلاج الطبيعي ...
عقب ما خلصوا ...و هم رادين البيت ...
عليا: فارس شو رايك اتروح الضاحيه ..هناك نفسيتك بتكون وايد احسن..؟؟
فارس: اتصدقين اني فكرت بالموضوع بس قلت بعد ما اعتمد ع العصى و اودر
هالكرسي ..
ماحد يعرف اشكثر الضاحيه عنده غاليه ...اهناك ..ذكريات حلوه له مع نوره..
محد يدري بهاك المكان ..الوحيد الي احسن ان نوره اتغيرت و صارت تتقبله ..بس
كل شي طلع سراب و جذب ..بس المكان يتم ابمكانه و عمر الذكرى ما بتخفى عن باله
اتنهد
طالعته عليا: يعورك شي ..؟؟
فارس: لا ..شو رايج تتغدين في بيتنا ..."فكر ان عليا تستاهل الواحد يفتح له
صدره لانها صج راعيه واجب"
عليا: بس ما خبرت امايه ..
فارس : و شو يعني انتي مب رايحه مكان غريب ...دقي لها و خبريها ..
طالعته بنظرات ..حس انه وايد غلط لانه يحسس عليا انه تعنى له شي ...طالع برع
لازم يبين لهم ان ما تغير شي و انه للحين يبا زوجته نوره و بس رغم كل الي صار
..طالع فخذه متى بس اروم امشي .. و اعرف نوره وين اختفت ....و الله لاطلعج لو
كنتي تحت الارض ..
دشوا فارس و عليا بيت خاله حسن.. و كانت مهاا و خالد قاعدين ...و فيصل معاهم
...
مها : وين كنتوا تاخرتوا ..
عليا: من المستشفى للبيت ...صح فارس ..؟؟
فارس يهز راسه بمعنى نعم ..
خالد: شحالك فارس اليوم..
فارس:الحمدلله ابخير ...بس وايد تعبت..
فيصل: يمكن علشان اول مره ..
مها: ليش ما اتسافر برع فارس يكون احسن لك..
فارس ما يطاوعني قلبي اودر البلاد و قلبي هني و لا اعرف وين راحت ولا اعرف
وين اراضيها ...فجاه اختفت هذي هي نوره دوم شقاوتها امعذبتني ..
مها: فـــــــارس شو قلت ..؟؟
فارس: ما ادري افكر ..
خالد: زين قرر ..جان تبا بنرابعك..
مها: الله ..
عليا: لحظه لحظه وين تبين انتي بتربين نسيت موعد ولادتج..
مها: خســـــاره ..عيل خلاص لا اتسافر ..
فارس: هههههههه
فيصل: انا و خالد و منصور برابعك بس انته قرر ...
عليا: و انا ..
خالد: انتي وين داشه عرض ..
فارس: وين خالي ..
فيصل: راح يبا يتغدا بيت اختك.. و الوالده في المطبخ اتعابل بالغداا..
عليا: عيل بروح اساعدها ..
مها: برابعج..
و في الممر مها: عليا شو سويتي مع فارس ..
عليا زخت ايد مها من الوناسه: وايد تغير علي احسه قام يتجرب مني ..
مها طايره من الوناسه: قلتلج بس تختفي نوره من حياته و فارس بيرجع لج ...
عليا: ياخوفي من باجر ..؟؟
مها: ما عليج انا بزن عغليه يخطبج..بعد ما يطلق نوره..
عليا مصدومه: ليش ناوين ع الطلاق..
مها: هههههه انتي ما تدرين بالي صار ..هم خلاص انفصلوا..
عليا: شدراج..؟؟
مها: ترا نوره ردت راس الخيمه عقب ما عرفت ان فارس يحبج ...
عليا تحضن مها: فديتج مهايه محد يحس فيني و يدور سعادتي غيرج..
حصه: شو عندكن ...
مها و عليا متروعات : ماشي ..كنا ياييات نساعدج ..
حصه: لا و الله عثقب ما خلصت طوفن الصاله ...يالله جدامي ..
عليا و مها = ههههههههههههه
عقب الغدا....وبعد ما روحن قوم خالد و مها و عليااا ...
حصه: فارس يمه تبا شي ..
فيصل: يا ويلي حالي نسوني خلاص ..
فارس: هههههههههه
حصه: حتى انت غالي بس امك زعلانه عليك..
فيصل عفد من مكانه و باس راس امه: افااا ليش يا الغاليه كل شي ولا ام فيصل
..
حصه: ههههههه يا العيار ..
فيصل يرجع يبوس راسها : فديتج ..
حصه: بس زين هههههههه تبون شي قبل ما اروح ارتاح شويه ...
فيصل +فارس = سلامتج..
حصه: زين عيل بروح حجرتي...
طالع فارس فيصل عقب ما روحت خالته : فيصل شو بلاك ..؟؟
فيصل: آآآآآآآآه يا فارس الدنيا شو اقولك عن الدنيا..
فارس: انت بتخبرني عنها ..كلها بلاوي ..بس انته شو صابنك ..ترا الكل ملاحظ
انك متغير ..
فيصل: و شوه بعد..؟؟
فارس: حتى الكل املاحظ ان عايشه بنت عمك ما قامت اتيي البيت ...شو مستوي
..
فيصل: قبل ما اتقولي شو صار بينكم و بين نوره ..ليش اختفت ..
اتغيرت ملامح ويه فارس ...شو اقولك يا فيصل ...شوه ...
فيصل: طبعا ما عندك رد ...
فارس : فيصل صار لي ايام ابا اسالك عن وليد وينه...
فيصل : ما قالك منصور انه امسافر كويت...شو دخله وليد بالسالفه..
ما عرف فارس شو ايقوله ...طبعا مستحيل يقوله ان نوره زوجته ووليد كان يشك ان
بينهم علاقه و ان نوره ردت راس الخيمه مع وليد مستحيل يقوله هالرمسه ...
فيصل: فارس شو بلاك ..و جنك شايل هموم ما اتشيلها جبااااال...شو رايك نطلع
نتمشى بالسياره ..
فارس : احسن شي انسويه ..
طلعوا بسيارة فيصل ... و راحوا صوب البحر ...وقف فيصل سيارته صوب البحر و
نزل درايش السياره ...خذ نفس طويل ...تم فارس يتأمل البحر و يتذكر كل موقف
عاشه مع نوره ذكريات حلوه بس وايد تجرحه ...
فيصل : فارس ودي اقولك شو امكدرني بس خايف ..خايف ..
فارس: كلام يحسسني ان المشكله الي بينك و بين عايشه تتعلق فيني صح..؟؟
طالعته فيصل مستغرب فكمل كلامه فارس: لا اتقول لاء لان هاي النظرات تثبت صحة
كلامي ..؟؟
اتنهد فيصل و قال : في يوم عايشه يتني و قالت انها سمعت وليد يرمس مع نوره
بالتلفون ..
حس فارس برجفه هزت كل جسمه طالع فيصل حست ان الدموع بتنزل من عيونه بس قاوم
لان الكلام الي قاعد يقوله فيصل وايد مهم بالنسبه له
فيصل: انا بالاول ما اهتميت برمستها لان نوره تعتبر وليد شرات ما تعتبرني
اخوهااا ..بس قالت لي انه كان يتودد لها ..و كأنه كان يترجاها لانها زعلانه
...
ما يدري فيصل ان كلامه كانت طعنون مسمومه في صدر فارس ...بس فارس كان ماسك
اعصابه و متحمل ..عذابه غمض اعيونه و فيصل يكمل من غير ما يسوي حساب لمشاعر
فارس ..
فيصل : ما صدقتها و اتضاربت معاها ... لان مستحيل نوره اتسوي جي .. و عايشه
زعلت مني لاني جذبتها و صدقت نوره ... و من هذاك اليوم و نحن مقاطعين بعض
..
حاولت اسال وليد..بس كنت خايف عايشه فاهمه السالفه غلط و مب حلوه بحق نوره
ارمس جي عنها و من غير دليل ... لكن مدري شو صار من بينكم انت و نوره و تمت
السالفه امعلقه..
فكر فارس حتى لو كانت نوره اترمس مع وليد لازم يدافع عنها و يحفظ سمعتها
فيصل: شو رايك بالسالفه..؟؟
فارس: نوره مستحيل اتسوي جي..
فيصل منفعل: و انا قلت جي علشان عصبت ع عايشه
فارس: نوره انا رديتها راس الخيمه كانت مشتاقه لاهلها و بالرده سويت حادث
نوره ما اتعرف شي عني ..
فيصل: وو ليش ما تتصل فيها و اتخبرها ...؟؟
فارس يتنهد: ما اباها اتجوفني و انا بها الحاله ..بس انت يا فيصل لازم اتفهم
عايشه ان نوره ما كانت بينها و بين وليد ..أي شي ولا اتحاول تشوه سمعت
حرمتي
و حلف في خاطره لو اتاكد ان نوره صج اترمس وليد بجتله و بجتلهااا ..بس هوه
ما عنده شي يثبت هالشيء أأأأأأأأخ بس لو اجوف وليد ..حس فارس انه مخنوق خاطره
يعرف شو الي يصير حوليه...حس بتعب فضيع ..محد يعرف شو يصير له محد يعرف اشكبر
الهم الي شايلنه ..
رجع راسه وسنده ع سيت السياره .. وحاول يفج فصم ثوبه لانه مب رايم يتنفس
...
فيصل: فارس شو بلاك فــــــــــــارس ..
فارس بصوت ضعيف": مخنوق يا فيصل مخنوق ..
نقزت من مكاني حسيت اني مخنوقه حطيت ايدي ع رقبتي و كأني ادافع عن روحي
طالعت اتذكر انا وين ..مر شريط في بالي ابسرعه..رجعت و حطيت ع الكنبه اطالع
السقف كان فارس ..
.حتى بنومتي ما رحمي طيفه يزورني ليش دايما احلم انه يخنقني ليش لها الدرجه
حاقد علي .. زين هوه الي ما يباني شو اسوي له كل البشر اتغلط طلبت من السماح
بس هو الي باعني بالرخيص علشان وحده..يا خسارة كل لحظه حلوه مرت علينا .
يا حسافة كل شي كان حلـو من بينا..حسيت بحركه في بطني طيرت افكاري
كلها..حطيت ايدي مكان الحركه ..ابتسمت و همست شو ما ترضى ما ع ابوك انته
بعد..
حتى انا ما ارضى عليه بس ها قدري شسوي ...نشيت من مكاني كنت رايحه المطبخ
اشرب مااي ..بس رن موبايلي نقزت و كانت المتصله خلود..محد ايعرف رقمي غيرها و
نوف ..بس نوف رجعت بوظبي دار خلي هناك...غمضت اعيوني اففففف نوره عن الخبال
ها مب وقته ..
نوره: مرحبا الساع...
نهله: هلا و الله شحالج ..؟؟
نهله ! فكرت اصكر التلفون ابويها بس شي بداخلي منعني ...
همست: خلود وعدتني انها ما اتخبر حد عني ..
نهله: لا اتخافين ..حتى انا وعدتها اني ما اخبر حد...لا اتلومينها اهي مضطره
اتخبرني لانها تعبانه
رديت ابخوف: شو بلاهااا ....؟؟
نهله: خلود اليوم الصبح ربت ..بعمليه ..
نوره: و الله ...ليش ..شو حالتها ..؟؟
نهله : الحمدلله الحينه ابخير ..اهي قبل ما اتسوي العمليه طلبت مني
اخبرج...و انا ما فضيت الا الحينه ..
نوره: شو اخبارها انزين ..؟؟ و البيبي شو حالته ..؟؟
نهله : الحمدلله ابخير ..يابت عبود ..سوا لها عمليه لانها طوفت وايد عن موعد
ولادتها غير ان راس البيبي كان فوق ..
نوره: اهااا ...
نهله: شو اخبارج نوره طيبه ..؟؟
كنت افكر لو نهله خبرتهم اني موجوده في راس الخيمه شو بيصير الله يستر هاي
ام المشاكل منوه بسكتها ..
نهله: الووو
همست: انا ابخير انتي اشحالج.و شحاله ريلج..؟؟
نهله: كلنا ابخير ..ليش جي اختفيتي ..؟؟
اففففففففف ها السبب الي ما خلني اخبرهم اني موجوده هني في راس الخيمه
الحينه ليش و كيف و مدري شوه ...
نهله: الظاهر انج مشغوله ..؟؟
نوره: اشويه ...
نهله: ادريبج ما اتدانيني بس تسمحيلي ازورج لاني صج مشتاقه لج..
حسيت اني بصيح و انا اسمع رمسة نهله ...ما ادري اني فرقت بين اقلوب و دمرت
حياتي ابسباب افكار كنت اجهلهااا آآآآآآآه هاي يدخل شي ما يخصه يلاقي شي ما
يرضيه و انا ابد مب راضيه عن حياتي ..تذكرت نهله معاي ع الخط..
قلت ابسرعه: نهله
نهله: هااااا ع بالي صكرتي..
نوره: هههههه لا انا موجوده حياج وقت ما تبين بس دخيلج نهله اترجااااج
قاطعتني: ادري ادري محد بيعرف ...امانه ..
نوره: خلاص عيل بتريااج ..
نهله: اوكى متى اييييج..
نوره: حبيبتي وقت ما تبين انا ما عندي شي ..
نهله: نوره تغيرتي !!!
نوره: ههههه شكرا ..
نهله: ههههه يالله عيل سلمي ع فارس ..
نوره حست ان قلبهااا تقطع في لحظه فهمست: يوصل ..
نهله: مع السلامه ..
صكرت ابسرعه ..سلمي ع فارس و انا الي كنت اظن زمااااااان انهم بينهم علاقه
..طلعت بينها و بين عمور و فارس يداري عليهم آه يا ربي ...
.زين نهله بتييني بسالهااا و نهله بتاكد لي اذا ظلمت فارس صج او لاء ..
يتبع >>>>>>
///////////////////////////
خلصت تنظيف الشقه حسيت اني هلكانه يلست ع الكنبه ارتاح ...
شعور جميل انج تترييين طفل و شعور اروع و انتي تتمنين انج تضمينه بحضنج بس
لازم تتحملين التعب ما بقى لي غير اسابيع و بربي ...بصير ام ..
ابتسمت و انا احط ايدي ع بطني ابكل حنان..رفعت راسي يوم سمعت باب الجـرس هذي
أكيـد نهله ...
نشيت افتح لها الباب ...تدرون ما اعرف شو شعوري اتجاه نهله..بس بغيت اوضح
لكم شي نهله وايد طيوبه بس انا كنت اغار منهااا يوم كنت اظن شي علاقه بينها و
بين فارس !!!
ليش اغار معقوله ..كل الكرهه الي كنت اكرهه لـ فارس لانه تجاهلني و التفت
صوب نهله يصير جي !!
مدري بس شو الفايده خلاص صرت بطريج و فارس بطريج....انا ما اقدر ااكد
احاسيسي و شعوري بها الفتره ابسبب الظروف الي امر عليها ..
فجيت الباب ...دشت نهله ..ابتسمت لها حضنتني و حضنتها صدقوني ما كنت انافقها
حسيت ابشوق لاهلي ..سنه كامله تقريبا انحرمت من شوفتهن ...
نهله: وحشتيني نوره ..احلف لج وحشني لسانج..
نوره: هههههه انا بعد مشتاقه لكم وايد ..حياج دخلي ..
نهله: امممممممم حميد برع ..
ضاقت بي الدنـيا كافي ارجوكم حرام عليكم...من بقى ما عرف اني موجوده بداري
منوه...
نهله: سوري نوره ترا ما اثق الا بـ حميد محد غيره بوصلني عندج ...
حسيت مرتبكه مدري شو الي تغير فيني زماااااان كنت اعطي بالويه لكن الحينه
ادور كلمات مجامله..آآآآآه يا فارس شو سويت فيني ...جبلتني فوق و تحت شرات ما
جلبت حياتي ...
ابتسمت : زين خليه يدخله بروح البس عبايتي ..فشله يطالعني جيه..
نهله: هههههههه ما شاء الله ...
رحت حجرتي و صكرت ع نفسي الباب تمنيت اكون وحيده ..ابا اعبر عن مشاعري
ابراحتي ..حميد ما غيره ..ابا كل العالم يعرفون قصتي مع فارس الا حميد...ما
ابا يشمت فيني ..غمضت اعيوني و هزيت راسي بقوه .. و جني ابا امنع ذكرى يوم
خططت و رتبت لي ما صار حميد خطيبي بس الله راواني و بلاني ابفارس ...بلعت
ريجي . لبست عبايتي و شيلتي .. و طلعت دشيت الصاله كان هدوء حتى اتوقعت ان
نهله و اخوها طلعوا من الشقه بس كانوا يالسين .. و الصمت كان سيد المواقف
...
نوره: السلام عليكم..
وقف حميد مصدوم يوم جافني حسيت بالاحراج طالعت نهله ابعد نظراتي عن
حميد..
حميد: عليج السلام شحالج نوره عاش من جافج..
ابتسمت: عاشت ايامك اعلومك حميد..اتفضل استريح..
حميد: اعلوم الخير انتي شو اخبارج ..ما صدقت نهله يوم قالت لي انج هني
موجوده براس الخيمه..
ما عرفت شو ارد عليه فجذبت: اتفجت مع فارس ايي ارتاح هني لي ما اولد..
نهله: الله يقومج بالسلامه و عقبالي ..
نوره: آمين ..و انت حميد بعدك عازب ..
حميد: و مصر ..
نوره + نهله= هههههههههه
حميد: بس الزواج وايد يغير ما احس الي قاعده امجابلتني هذي نوره الشيطانه
..
ليش ما تدري ان احيانا الظروف و القدر ايحط ابمواقفك ايخليك تنسى انت كيف
اصلا ..
نوره .................."ماشي رد"
نهله : صدقك حتى انا احس اني اتغيرت ..
حميد: هي انتي تغيرتي للأسوء
نهله: يالله عااد حميد عن المصاخه..
حميد+ نوره = ههههههههههه
وقفت : بروح ايب لكم شي تشربونه ..
حميد وقف: لا لا ما يحتاي قلت بيي اسلم عليج .. و عقب بمر ع نهله عقب ما
تشبعون رمسه ..
استانست من الخاطر ها الي اباه ابا اسولف مع نهله ع راحتي ..
نوره: ما شربت شي ..
حميد: يالله اليايات اكثر من الرايحاات ..
شو قصده لا يكون ناوي يعسكر هني بالشقه لا ابوي خلوني ادور لي مكان غيره
...مدري ليش خطرت ع بالي ضاحية فارس ..بس شلت الفكره من بالي ابسرعه ...
اترييت احميد يظهر من الشقه رحت المطبخ و لحقتني نهله ...
نهله: اخبارها خوله اترمسينها ..
سوي عمري مشغوله بالشاي: طبعا اهي ابخير ... ليش ما تتصل ابكم..؟؟
نهله: امبلى من فتره لـ فتره ...متى بردون ..
جاوبتها و انا اتذكر كلام خلود: بعد ما تولد خوله ..بتربي الشهر الياي و الي
عقبه بيوون ..
نهله: و انتي ما شاء الله متى بتربين ..؟؟
ناولتها استاكنت الشاي : امممممم ان شاء الله عقب خوله ...شيما ما احملت
؟؟؟
نهله: سالتها من جم يوم قالت شاكه ..الله يعطينا..
نوره:آآآمين..وحشني خليفه .. قوم خالاتي كلهن وحشوني ...
نهله: ليش قطعتينا و حتى الحينه ما تبينا انعرف انج موجوده ابراس
الخيمه..
يالله هاي الحينه ارد عليهااا ...
نوره: ماشي اسباب محدده ...بس ان شاء الله افكر عقب ما اولد بفاجأ قوم خالتي
مريم و عايشه اضمن انج ما بتخبرين حد نهله مثل ما خبرتي حميد..
نهله ابتسمت متلومه : اوعدج صدقيني ...تعالي انروح نقعد في الصاله ..
نوره: اوكي تعالي الا بسالج ريلج شخباره مرتاحه معاه انتي ..؟؟
نهله ردت جنها توها عروس : وايد وايد مرتاحه باجي الله يرزقنا بـ النونو و
تكتمل وناستنا انا و سيفاني "سالتني"..حلو الزاج صح..
هزيت راسي بمعنى نعم.. انا بداخلي احس ان قلبي يتقطع و اتذكر كل شي حلو مر
بيني و بينا فارس
نهله: الا روعه ...الحمدلله اللي رزقني بسيف ..همه راحتي و سعادتي ...
سالتها: مب ندمانه انج خذتيه..
نهله: لا طبعا حرام عليج نوره لا اتقولين جي ..
نوره: هههههه تراني اذكر في البدايه كنتي رافضه..
اختفت ابتسامتها: تدرين كانت لي اسبابي "رفعت راسها و طالعتني" بس الحينه
مرتاحه ..
حسيت انها فرصتي اسالها عن سالفه زمان ..
نوره: مدري عن عمور و خوله ...مدري شو حياتهم بالضبط..
نهله: اكيد مرتاحيين قولي ان شاء الله ..
نوره: امممممم نهله في بالي سؤال ابا اسئلج بس لا تفهميني غلط بليز ..
طالعتني مستغربه : شوه ..؟؟
نوره: شي مضى و انتهى بس بالنسبه لي مهم ..
حسيت انها فهمت قصدي مدري ليش ملامح ويها اثبتت لي هالشي ..
نهله: .............."ماشي رد"
يوم جفتها ساكته: خلاص عيل انسي الموضوع ..
نهله: لا عادي قولي ...اتقولين شي مضى و انتهى يعني بالنسبه لي مش مهم ..
سالتها ابسرعه جني ما صدقت سمعت رمستها : تذكرين سالفه خالي احمد يوم راااغ
فارس ..
جفتها تبلع ريجها ابصعوبه هزت راسها بمعنى هيه ..
نوره: فارس كان مظلوم ..بس قولي هي ولا لاء .. صدقيني ما بسالج سؤال
غيره..
شلت نظراتها من ويهي و قعدت اطالع الارض و كأنها متلومه فقلت بصوت مرتبك :
اتبين الصراحه فارس مظلوم
رديت عليها بعصبيه: و ليش ما تكلممتي بهذاك اليوم ليش سكتي يوم انا اشرت ع
فارس ..
حسيت بها بتصيح: لاني كنت خايفه و كنت خايفه اكثر ان تنكشف علاقتي بـ عمور
..
غطيت ايدي بويهي آآآآآآآآآآخ انا حماره يوم سالتج ..يا ليتني ما سالتج يعني
السالفه صج..فارس ماله علاقه ..
نهله: نوره شسالفه ...؟؟هاي السالفه انتهت زمان ..كنا يهال ..
ما قدرت امسك عمري فيلست اصيح معقوله الحمل يخلي الوحده حساسه !!
نهله: انا اسفه نوره ..
حسيت ابعمري هبله مسحت دموعي ابسرعه : لا ما عليج انا الي اسفه ..
نهله مرتبكه: بتصل بحميد بخليه ايمر علي ..
هههههههههه كنت بضحك ابصوت عالي توني كنت بقول نهله انتي تغيرتي بس تبون
الصراحه هذي هي نهله جبانه و خوافه طلعت موبايلها و رد عليها احميد و قالته
ايي ايمر عليهاا
...ابتسمت لها: ما بتتعشين معاي ..
نهله: خليها وقت ثاني ..
نوره: خلود طلعت من المستشفى ..
نهله: لا بعدها ..بعد جم يوم بتطلع..
نوره: ابا اروح لها بس ما ابا خالتي مريم ولا عايشه يجوفوني عندها ..
نهله: اممممممممم ما عليه بندبرها لج انا و خلود ..
نوره : مشكوره ..
يلست احاوط في الشقه و انا ليش مستويه جي ع أي شي بصيح و بتضايج..خلاص ظلمتي
فارس و فارس دفعني ثمن غلطتي ..حق شو افكر و اتعب روحي ما يهمني غير الي في
بطني ..لازم ما اتعب علشانه ..ولا فارس خلاص انا و يااه تعادلنا ...
و انتهى من حياتي ..و هو ما همه شي حتى ما فكر يدورني او يسال عني بالعكس
حتى قوم خالي احمد قطعهم طقااااااااااق ..
هو الي خسران ..انا خسرته صح و خسرت حبي بس كسبت شي كبير و غالي علي
وايد...و طالعت بطني و ابتسمت ...
في اليوم الثاني ...اتصلت بي نهله تسالني اذا بمرون علي اهي و حميد علشان
اروح لـ خلود ..طبعا وافقت ...و في السياره ..
نوره: حميد ابا امر أي مكان اشتري شي حـق عبود ..
نهله: وين تبين بيبي شوب
نوره: أي مكان المهم يكون راقي ..
حميد: ان شاء الله اوامر ثانيه..
نهله+نوره: هههههههههه
نوره: ما اتقصر ..
مرينا كذا محل لللاطفال ما كنت مقتنعه بشي اخرتها اختار لي حميد و اصر اني
اشتريه و رضيت ..
حميد: اممممممم جنى هذي نوره الي انعرفها قبل ..
طالعته: انا ما اتغيرت حميد..
نهله: يالله متى بنوصل متفيجين..
نوره: بسالج انتي وين ريلج عنج لاصقه بـ حميد ..
حميد: هههههههههههه
نهله: توج يا حلوج امممممم ريلي بالدوام ما اجوفه الا باخر الاسبوع ..
نوره: الله يعينج..
حميد : حتى انتي نوره الله يعينج..
رفعت راسي اطالعه جفت نظره غريبه انرسمت ابعيونه كان يقصد شي بس ما فهمته
..مستحيل يعرف عني و عن فارس شي محد يعرف الا جان فارس خبره يمكن ليش لاء
..
.طنشته و ما رديت عليه ..وصلنا المستشفى ..قبل كنت وايد اخاف عن حد يجوفني
بس الحينه احس ما صار يهمني ..
سلمت ع خلود و كانت اتبين الحمدلله انها ابصحه و عافية ...
خلود: عقبالج بس ولاده طبيعية ان شاء الله ..
رديت مستانسه: ان شاء الله ..
شليت عبود حسيت ان حميد قاعد يراقبني مدري حسيت ان في باله نوايا شينه من
صوبي بس ما اهتميت .. و ليش بضرني دام اني للحين ع ذمة ريال ..
نوره: خلـود عبود يشبهج ما يشبه جسوم ولا ابوه ..
خلود: اقولهم بس ما يصدقوني ..
حميد: لا لا يشبهني ..
نهله: انتي بالاول حاشرنا جسوم يشبهك و الحينه افتريت صوب عبدالله ..
حميد: كل الاطفال يشبهوني لان ويهي طفولي..
نوره: يا حافظ..
خلود: هههههههههههههه
نهله: يالله عرس و ييب لك واحد..
حميد: ان شاء الله بس عقب ما اتربين ..
نهله: اتنكت اونك..
خلود: هههههههههه
نوره: محمد وينه..
خلود: من شويه كان هني رااح اييب خالوه عايشه..
شهقت: حميدان الشرده ..
صخيت طلعت مني كلمة حميداان عفويه بس النظرات الي جفتها بعيونه خوفتني وايد
ما ابااه يفهمني غلط..
نهله: صدقت بك حميدان يا ويه الطفولي...
قمت سلمت ع خلود.. و اتحمدت لها بالسلامه ..
خلود: خبرتي فارس ما اجوفه اتصل فيني .
ما عرفت شو اقول ابتسمت و قلت: ما عليج بهزبه علشان يتصل بج..
خلود: مشكوره هههههه
رديت شقتي و انا مرتاحه لاني طلعت و حسيت ان حياتي قبل شبه ردت طبعا من دون
خوله مستحيل اترد حياتي قبل فديتج خوله شو اخبارج الحينه..حتى عمور ولهت عليه
...
المهم و الاهم صحيح اني مرتاحه بس فيني خوف اكبير من حميد ..بس خليه يولي
..ما بحتك فيه علشان ما يتمادى معاي ...قبل لا ارقد رن موبايلي جفت المتصل
نوف ..نوره: مرحبا السااع..
نوف: هلا و الله اشحالج ..؟؟
نوره: طيبه طاب حالج اعلومج..
نوف : اعلوم الخير .هي ربيتي ولا بعدج...؟؟
نوره: ههههه بعدني الشهر الياي ..
نوف : الله يقومج بالسلامه بغيت اتطمن عليج ...
نوره: ما اتقصرين نوف لولا ما كنت عرفت شو بيصير لي ..
نوف: مالها حايه هاي الرمسه انتي اختي قبل لا اتكونين رفيجتي ..
نوره: تسلمين و الله ...وين انتي ..؟؟
نوف: في بوظبي ..بس اقولج وقت ما بتربيين دقي لي يمكن اكون هني برراس
الخيمه
نوره: فالج طيب ... بنات خالاتي ما بقصرن بعد...
نوف: زين الحمدلله اخباره ريلج ...؟؟
تنهدت و قلتها: ابخير ..
نوف: زين عيل ابرايج اسمحيلي جان دقيت لج بهاي الحزه..
نوره: افا عليج ...خذي راحتج..؟؟
نوف: سلمتي تصبحين ع خير ...في امان الله ..؟
نوره: و انتي من اهل الخير مع السلامه
حطيت الموبايل جريب مني و غمضت اعيوني هاااه يا نوف الله امطرشنج لج
اتساعديني وقت ازماتي ...تسلمين لي يا الغاليه ..
غمضت اعيوني و رقدت وهذي اول مره ارقد فيها مرتاحه من غير ما اتجلب و افكر
ابفارس ..مرت علي اسابيع و انا اتجاهل قوم خالاتي بس علشان حميد..بس في هذاك
اليوم الي .فجيت اعيوني ع صوت اذان الفير ..
نشيت اصلي و عقبت قعدت اقرا قرآآن لي ما طلعت الشمس ...بدلت ملابسي و عقب ما
سويت لي فطور ...فكرت اطلع اروح البنك اجوف كم صار احسابي ..لان البيزات بدت
اتخلص و فارس ما قام ينزل لي من رجعت من بوظبي ....و انا هالفتره وايد محتاجه
...
رحت صوب البنك..شيك ع احسابي صدق ما بقى شي يكفيني غير شهر لي ما اولد
..سحبت شويه علشان اشتري اخر اغراض البيبي لان ما بقى شي ولادتي ...
حسيت بالغبنه ..و الحينه وين اروح اييب لي بيزات ..اطر من منوه ...أي وظيفه
بتطلع لي بيوم و ليله ..حسبي الله عليك يا فارس ..ركبت السياره .. صحت بس
تداركت نفسي و مسحت ادموعي بقوه ..
.ما ابا اصييح انا وعدت نفسي خلاص ...حياة الهم و النكد ودرتها خلاص طلعت
السلسله الي متعلقه في رقبتي و فيها خاتم الي هداني اياه فارس اتاملته هاه لو
بعته اشكثر بييب لي بيزات ..بس قلبي ما طاوعني هاي الذكرى الوحيده من انسان
جرحني و انا حبيته من قلبي ما اقدر ابيعه ما اقدر ...رجعت و ضميته تحت ثوبي
عقبها ...
خطرت ع بالي بيزات مهري الي خليتها عند خالي احمد ابتسمت مرتاحه ...الحمدلله
اني خشيتهم عندهم ..و الحينه يااه الوقت الي اخذها بس كيف ..؟؟؟
اممممم ممكن عن طريج خلود..كنت سرحانه و مليون فكره في بالي لدرجه اني ما
انتبهت ان الاشاره كانت حمره طلعت و شي سياره غيرها يايه من الشاره الثاني
اتروعت الحمدلله اني ما كنت اسرع ضربت ابريك..بس للاسف سيارته ضربت سيارتي
..
حسيت الدنيا اتدور فيني للحظه حاولت اتماسك و انا اجوف جسمي يرتجف حطيت ايدي
ع بطني و كأني اطمنه و احميه فشيييييييييييله الناس قامت تتيمع صوبي ..
.نزلت الدريشه صاحب السياره الثانيه كان امحرج و ابويه شيبه جان الحينه
بتطلع الفضايح ...و انتن من يقبضكن ليسن و انت ما اتعرفن اتسوقن..و ابوي
هالرمسه سمعتها مليون مره الله يستر ..
نزلت الدريشه يالله نوره استعدي و زخي الرمسه الي يايتنج من ها الشيبه
المححرج ...بس صدمني انه يوم جافني و كأنه يعلم بحالي اشفق علي و صخ ...
جفته يتصل اكيد بالمرور ..يا فضيييييحتج يا نوره ..ابسرعه اتصلت ابخلود..بس
ما اترد علي اتصلت مره ثانيه و ثاله لين ما سمعت صوتها و جنها كانت راقده
..
نوره: سوري خلود ع الازعاج بس بغيت رقم خليفه ..؟؟؟
احسن لو اطلب خليفه ..ما ابا احميد يتدخل في حياتي خليه بعيد عني و انا بعيد
عنه
خلود متروعه: ليش شو مستوي ..
رديت ابسرعه : بعدين بعدين ..بس عطيني رقمه ..
خلود: خليفه امروح العمره مع قوم عمي و حرمته البارحه متى تدرين شوه ..؟؟
تحسفت: قولي و الله ..."قلتها بيأس " زين عطيني رقم حميد ابسرعه...
خذت عنها الرقم و ادري انها ملهوفه اتعرف شو السالفه بس صكرت ابويها
...اتصلت بحميد رد علي ابسرعه معلوم بترد ما اتصدق يظهر لك رقم ع الشاشه
...تبا تغازل الهرم ...
نوره: حميد انا نوره..؟؟
حميد و كانت نبرة صوته مستغربه: هلا نوره شحالج..؟؟
نوره: زينه بس انت وينك ...؟؟
حميد: انا بالدوام ليش شو بلاج ...؟؟ تبين حايه ..
نوره: اباك اتيي ابسرعه انا سويت حادث و ما عندي حد...
عطيته المكان .. و قبل ما يوصل حميد وصلت المرور ..الحمدلله بدت الناس تختفي
لان جافت حادث بسيط جدا ..
الشرطي: اختي ممكن الليسن ..؟؟
عطيته بطاقتي و ملكيه السياره و الليسن ...
الشرطي: ممكن تنزلين ..
نوره: لا ما ابا انزل ..
الشرطي: بس انتي جي امصكره الشارع ..
رديت امعانده: انا اتصلت باخوي الحينه بيي
الشرطي: زين نزلي علشان انحرك السياره ..؟؟
حاولت اشغل السياره : انا بحركها .."بس خانتني و ما اشتغلت حسيت بالغيض من
سيارتي بغيت هذيج الساعه احرقها "
الشرطي: اتفضلي نزلي ..
عاندته: قلتلك ما بنزل لي ما يوصل اخوي ..
الشرطي طفران: ع راحتج... و راح صوب الثاني يرمس مع الشيبه..شويه ووصل
حميد...حسيت بالراحه الحمدلله ع الي كله سويته فيه بس بعده اثبت لي طيبته
..
يااه صوبي ..
حميد: شحالج نوره ابخير "و فج باب سيارتي"
نوره: هي ابخير ..
اشر صوب سياره: روحي ركبي سيارتي لي ما اييج باخذج المستشفى ...
شهقت : ما يحتاي ..
و انا نازله حسيت بالم فضيع بظهري ..غمضت اعيوني ورجعت قعدت ابمكاني ..حسيت
بالاحراج لان حميد كان يراقبني سالني: نوره تعبانه اتصل بالاسعاف
رديت ابسرعه: لا لا انا ابخير بس الظاهر لازم اروح المستشفى ..
مد ايده :تعالي بساعدج ترا المرور تترياا
كنت برفض يوم سمعت اخر جملته مديت ايدي كنت بصرخ من الالم الي حسيت به و
كأنه بقسم ظهري قسمين ..بس تماسكت ووقفت ..
و بمساعدت حميد وصلت سيارته ..كنت ميته خوف ان يمكن اربي و انا بالشهر
الثامن ...جفت احميد ابسرعه يرمس الشرطي و ياه ركب ...طلع موبايله و رمس مع
واحد من ربعه يبا ايي هناك علشان سيارتي ...
سالني: شو اتحسين..
نوره: الحينه زنينه بس يوم اتحرك ظهري يعورني ...
ما تكلم ..ولا انا كلمته وصلنا صوب الطواري هذا حميد من عرفته دوم المنقذ و
انا الغبيه علشان غيرتي و انانيتي فسخت خطوبتي منه لو ما فسختها زماني كنت
مرتاحه ...
نزلت ابصعوبه كنت احس ان ظهري بنكسر كل ما تحركت ..دشيت غرفة العلاج.. و
الحمدلله تطمن ان كل شي ابخير .. و هاي الالام بسبب الحادث بس يومين ارقد ع
ظهري و كل شي بيكون تمااام ...
ما اتعرفون باراحه الي حسيت فيها و انا اسمع الدكتوره تقولي "الحمدلله
الجنين سليم و كل حاجه ابخير " يلست اصيح..اقولكم مستويه حساسه اوني عاااد
..حسيت ما يناسبني ها الدور بس شي و فرض نفسه علي ...
دش علي حميد: نوره ليش اتصيحين..
ابتسمت منحرجه منه: مشكور حميد ع كل شي..
قعد ع اكرسي: افا عليج ولد خالتج لازم بساعدج ...بس انتي لا اتصيحين قطعتي
قلبي ...
نوره: مدري ليش حسيت اني ابا اصيح يوم قالت لي الجنين ابخير ..
جفته يبتسم بس ما رد علي شويه و يت الممرضه و خذتني القسم..و حميد راح يسوي
لي اجراءات الدخول ...
الممرضه: خلج جي منسدحه ع ظهرج لا تتحركين و اذا بغيتي حايه دقي ع الدجمه
..
هزيت راسي بعمنى نعم: مشكوره ...
////////////////////////////فريت راسي اطالع برع ..حسيت بالوحده لا ام ولا
اب ولا اخ و اهل ولا زوج حسيت ابعمري وحيده في هالكون يلست اصيح من الخاطر
..
عرفت اني قاعده احصد كل الي زرعته زمااااان الكل تخلى عني ..ما بقى لي حد
بالدنيا غير الي في بطني و كنت اليوم بطيره مني ...
مسحت دموعي و حاولت اتماسك..و اريح اعصابي ..رفعت راسي اطالع السقف ..شو
بيصير لي بالايام اليايه ..غمضت اعيوني ..و تخيلوا اني رقدت يمكن من التعب
...سمعت صوت يزقرني هذا صوت فارس ..؟؟شو يابه هني ..؟؟ منوه قاله ..معقوله
حميد ..؟
ما ابا ابطل اعيوني ما ابا يجوفني زقرني مره ثانيه و ثالثه ..ما ابا ارد
عليه شو يبا فيني ...زخ ايدي نوره نوووووره فتحت اعيوني و شهقت يم جفت
الممرضه اتوعيني و انا ع بالي فارس ..كنت احلم ...
ابتسمت لي : شو نوره شكلج قاعده تحلمين..؟؟
هي كنت احلم بانسان " حبه سطى في الجرف والوجد نهاب..زوله وسط عيني وقلبي
مقره..لو غاب عني طيفه البوم غاب..شوقه عذاب وشوفتي له بالحسره..ليته درا في
قلبي صار ..حتى النظر مايفيد وان جاك عذره...عمري مضى مابين حلوه ومره"
الممرضه: يالله حبيبتي تغدا ..لازم اتخلصين كل الي في الصينيه..
هالمره ابتسمت لها : ان شاء الله ..
تغديت و شبعت لاني كنت ميت يوع ...و الغريب اني رجعت و رقدت لها الدرجه انا
تعبانه ..فجيت اعيوني و انا كارهه روحي حسيت بالملل .. و الضيجه لي متى بتم
هني ...
انتبهت و حسيت اني شي شخص معاي في الغرفه صديت الصوب الثاني جفت حميد قاعد
يطالعني ..عدلت شيلتي و رصيتها ع ويهي علشان اغطي شعري ..اتصدقون اني نسيت
احميد ...؟؟
حميد: الحمدلله ع السلامه..
رديت له: الله يسلمك ..خبرت قوم خالي احمد..
حميد: انتي ما تبين حد يعرف انج هني بالدار صح..
غيرت الموضوع: متى بظهر من هني مليت ..؟؟
ابتسم حميد: ان شاء الله باجر تحملي ها الليله ..يتج من ساعه جفتج راقده
..فرحت اشيك ع سيارتج..
نوره: و شو صار ..
حميد: كل خييير ..سيارتج ما فيها شي
نوره: و سياره الشيبه ...؟؟
حميد: اتنازل و قال بصلحها ابروحه ..
كنت بساله عن خلود و نهله بس رن موبايله فطريت اسكت و اطالعه يوم يرد ع
الموبايل الغريب ان يوم جاف شاشه الموبايل ابتسم و طالعني حسيت برجفه لا يكون
المتصل فارس ..؟؟
سمعته يبارك بعد ما خذ الاخبار و السؤال عن الحال ..الظاهر ان حد من ربعه
...بس تفاجات يوم مد ايده صوبي :حميد ارمسي ...؟؟
خذت عنه الموبايل و الف سؤال في بالي : منوه ..؟؟
ابتسم حميد: مفاجاه ...
غبيه ما خطر ع بالي انه يكون عمور الا يوم سمعت حسه يقول : آآآآآآآآلـو
نوره..؟؟
مدري شو اقولكم و لا أي شعور اوصفه لكم و انا اسمع حس عمور ..عمور اخوي
...ما رمت ارمس لساني انربط ..بلعت ريجي ابصعوبه سمعته يقول : بعدج زعلانه
علي مب قلب عليج نوره ..
حسيت من نبرة صوته انه يصيح ..
همست: عمور ...؟؟
بس دموعي سبقت أي كلمه كنت بعبر فيها عن شوقي و عذابي يلست اصيح و حميد كان
ما بين المتفرج و المصدوم ...
عمور: نوره شو فيج ...؟؟ نوره لا اتصيحين..
حاولت امسك عمري خذت نفس طويل و رمست : وحشتني موت انت وينك ..؟؟
عمور: موجود انا ابخير و خوله اليوم ربت يابت ولد ..
استانست من كل خاطري : يعني انا استويت عمه ..
عمور: هييييييي انتي عمه بس يا رب ما يطلع عليج..
و انا اصيح ضحكت من تعليق عمور : ههههههههههه
طالعت حميد جفته يبتسم ..اكيد يتحراني اتخبلت ...بس شل ابعمره و طلع من
الغرفه علشان اخذ راحتي مع عمور
كنت اصارع بيني و بين نفسي علشان ما اصيح: مبـرووك عمور و تستاهل سلامة خوله
..وينها ابا ارمسها ..؟؟
عمور: بعدها داخل عند ها الدكتوره ...انتي شخبارج فارس وينه من جم شهر ادق
له كل يعطيني مغلق ..شو اخباركم نوره ..؟؟
يا ليتك اتعرف شو بلاني ..ما رمت ارمس عدال حميد ..تميت ساكته حتى عمور ما
كنت ناويه اقوله ..
عمور: وينه عنج فارس ..حميد من ساعه خبرني انج برارس الخيمه بس فارس
وينه..؟؟
عرفت ان عمور امرمس حميد قبل هالمره.. و الظاهر امخبرنه عن كل شي الا اني
سويت حادث ..
عمور : نوره ليش ساكته الووووو الووووو
نوره: معاك عمور ..
عمور: شو بلاج شو مستوي ..
رديت اصيح يوم جافني اصيح علي صوته: نووره وين فارس حتى قوم خالي احمد ما
يعرفون عنه شي ..صابه شي ..؟؟
حرجت منه هذا هوه عمور فكر ان فارس مستوي به شي ما فكر انه يمكن ضرني لها
الدرجه واثق منه ..
رديت بصوت متقطع: م ..ا ..ادر..ي
عمور: كيف يعني ما تدرين ..؟؟ شو امسوي بج..؟؟هااه..
نوره................"ماشي رد"
عمور: انطقي ...نوره ارمسج انا .. و الله ايي باجر ترا ..
رديت ابسرعه: لا لا لا مب مستوي شي صار من بينا خلاف بس و انا رديت راس
الخيمه..
عمور: خلالالالالالاف ...بس خلالاف متاكده انتي ..؟؟
و الله مدري بعدني ع ذمة فارس ولاء .. محد يعلم..ولا اعرف عنه شي موليه
..
نوره: هي متاكده..؟؟
عمور: و انتي وين الحينه ..؟؟؟ و حميد شو يسوي عندج ارمسي لا اتمين ساكته
ارمسي اجوف ..
نوره: عمور لا اتصرخ علي جي ..
عمور: و انا اجوف حياتج منجلبه فوق و تحت و تبيني اسكت .. و الله يا نوره
اذا
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك